TEMA SA COVER | MGA ANGHEL—TOTOO DAW SINDA? KUN TAANO TA MAHALAGANG MAARAMAN IYAN
An Totoo Dapit sa mga Anghel
Gusto mo daw maaraman an totoo dapit sa mga anghel—kun siisay sinda, kun sain sinda hali, asin kun ano an ginigibo ninda? An ipinasabong na Tataramon nin Diyos, an Bibliya, iyo an pinakamarahay na sumimbag sa mga hapot na ini. (2 Timoteo 3:16) Ano an sinasabi sa sato kan Bibliya?
An Diyos espiritu, pati an mga anghel. Dai sinda nahihiling huling sinda “daing laman asin mga tulang.” Nakaistar sa langit an maimbod na mga anghel asin puwede sindang makarani sa presensiya nin Diyos.—Lucas 24:39; Mateo 18:10; Juan 4:24.
May beses na nagsusulot nin pisikal na hawak an mga anghel tanganing gibuhon an itinao nin Diyos na mga asignasyon sa daga. Pagkatapos kaiyan, minabalik sinda sa pagigin espiritu.—Hokom 6:11-23; 13:15-20.
Baga man sinasambit sa Bibliya na an mga anghel lalaki asin pirmi sindang nagsusulot nin pisikal na hawak na lalaki, mayo talagang lalaki o babaying anghel. Dai sinda nag-aagom o nangangaki. Saro pa, bago nagin anghel, dai nguna sinda nagin umboy, aki, o adultong tawo digdi sa daga. Linalang ni Jehova an mga anghel; kaya inaapod sinda sa Bibliya na ‘mga aki nin [tunay na] Diyos.’—Job 1:6; Salmo 148:2, 5.
May sinabi an Bibliya manungod sa “lengguwahe nin mga tawo asin nin mga anghel,” na nagpaparisang may lengguwahe asin kakayahan na makipag-ulay an mga anghel. Dawa ngani ginamit sinda nin Diyos para makikomunikar sa mga tawo, dai niya kita tinutugutan na sumamba o mamibi sa sainda.—1 Corinto 13:1; Kapahayagan 22:8, 9.
May manampulong ribo nin manampulong ribong anghel, na tibaad binilyon an bilang.a—Daniel 7:10; Kapahayagan 5:11.
An mga anghel ‘[makakamhan] sa kapangyarihan’—mas makapangyarihan kisa sa mga tawo—saka nakakalabing marhay an saindang intelihensiya. Kaya nindang makaabot tulos sa sarong lugar sa rikas na dai kayang maimahinar nin mga tawo.—Salmo 103:20; Daniel 9:20-23.
Sa ibong kan saindang nakakalabing intelihensiya asin kapangyarihan, may limitasyon an mga anghel, asin may mga bagay na dai ninda aram.—Mateo 24:36; 1 Pedro 1:12.
Linalang an mga anghel na may personalidad, mga kuwalidad na arog kan sa Diyos, asin libertad na magdesisyon. Kaya, arog nin tawo, puwede sindang pumili na gibuhon an tama o sala. Nakakamundo, pinili nin nagkapirang anghel na magrebelde sa Diyos.—Judas 6.
a An sampulong ribo na minultiplikar nin sampulong ribo katumbas nin 100 na milyon. Pero, sa Kapahayagan may sinambit na “manampulong ribo nin manampulong ribo” na mga anghel. Nangangahulugan iyan na ginatos na milyon, o puwedeng binilyon pa ngani, an bilang kan espiritung mga linalang!