Igwa Ka Daw nin Guardian Angel?

Dai itinutukdo kan Bibliya na may guardian angel o anghel de la guwardiya an kada indibidwal. Totoo, sinabi kaidto ni Jesus: “Siyertuhon nindo na dai nindo paghamakon an saro sa mga tawong arog nin sadit na mga aki [mga disipulo ni Cristo], huli ta sinasabi ko sa saindo na an saindang mga anghel sa langit pirming yaon sa atubangan kan sakuyang Ama na nasa langit.” (Mateo 18:10) Dai sinasabi digdi ni Jesus na may anghel de la guwardiya an kada tawo, kundi sinasabi niya sana na interesadong marhay an mga anghel sa kada disipulo niya. Kaya, dai isinasapeligro kan tunay na mga parasamba an saindang buhay paagi sa mangmang saka daing ingat na mga gibo, na nag-aasang ililigtas sinda kan mga anghel nin Diyos.

Nangangahulugan daw iyan na dai tinatabangan kan mga anghel an mga tawo? Dai man. (Salmo 91:11) May nagkapira na talagang naniniwala na prinotektaran asin giniyahan sinda nin Diyos paagi sa mga anghel. Iyan an namatian ni Kenneth, na sinambit sa inot na artikulo. Posibleng tama siya, kaya dai ta dapat ipirit an sadiri tang opinyon. Parating nahihiling kan Mga Saksi ni Jehova an ebidensiya kan pagtabang nin mga anghel sa saindang paghuhulit. Minsan siring, huling dai nahihiling an mga anghel, dai ta masasabi kun sagkod sain sinda ginagamit nin Diyos para tabangan an mga indibidwal sa manlain-lain na paagi. Pero, bako man salá na magpasalamat sa Makakamhan sa Gabos para sa ano man na tabang na posibleng itinao niya.—Colosas 3:15; Santiago 1:17, 18.