‘An Matinao Bebendisyunan’

HALOY nang importanteng kabtang kan tunay na pagsamba an pag-atang. Nag-aatang an mga Israelita nin mga hayop, asin haloy nang midbid an mga Kristiyano sa saindang “atang nin pag-umaw.” Pero, may iba pang mga atang na ikinakaugmang marhay nin Diyos. (Heb. 13:15, 16) An mga atang na ini nagtatao nin kaugmahan asin mga bendisyon, arog kan ipinapahiling kan minasunod na halimbawa.

Si Hana, na sarong maimbod na lingkod kan suanoy na panahon, gustong-gustong magkaaki nin lalaki, pero baog siya. Sa pamibi, nagpromesa siya ki Jehova na kun magkakaigwa siya nin aki, ‘itatalaga niya ini ki Jehova sa gabos na mga aldaw kan buhay kaini.’ (1 Sam. 1:10, 11) Pag-abot nin panahon, talagang nagbados si Hana, asin nangaki nin aking lalaki na nginaranan na Samuel. Pakabutas ki Samuel, dinara siya ni Hana sa tabernakulo, arog kan iprinomesa kaini. Binendisyunan ni Jehova si Hana huli sa pagigin mapagsakripisyo kaini. Nagkaigwa siya nin lima pang aki, tapos si Samuel nagin propeta asin kagsurat kan Bibliya.—1 Sam. 2:21.

Arog ni Hana asin Samuel, may pribilehiyo man an mga Kristiyano ngunyan na gamiton an saindang buhay sa maimbod na paglilingkod sa saindang Kaglalang. Nanuga si Jesus na abundang bebendisyunan an ano man na sakripisyong ginigibo ta sa paglilingkod ki Jehova.—Mar. 10:28-30.

Kan inot na siglo, midbid an Kristiyanang si Dorcas sa saiyang mga “ginibong karahayan asin itinaong tabang sa mga pobre”—mga pagsakripisyong ginibo niya tanganing tabangan an iba. Pero “nagkahilang siya asin nagadan,” kaya ikinamundo iyan na marhay kan kongregasyon. Kan mabaretaan kan mga disipulo na yaon sa lugar ninda si Pedro, pinakiulayan ninda siya na magduman tulos sa sainda. Isipa na sana an kaugmahan ninda kan mag-abot si Pedro asin buhayon si Dorcas—an inot na rekord nin pagbuhay liwat nin sarong apostol! (Gibo 9:36-41) Dai nalingawan nin Diyos an mga pagsakripisyo ni Dorcas. (Heb. 6:10) Iiniba sa Tataramon nin Diyos an saiyang marahayon na rekord nin pagigin bukas-palad bilang halimbawa na puwede tang arugon.

Nagpahiling man si apostol Pablo nin marahayon na halimbawa nin bukas-palad na pagtao nin panahon asin atensiyon. Sinabi ni Pablo sa surat niya para sa saiyang mga tugang sa Corinto: “Sa parte ko, kaugmahan ko nanggad na itao an gabos asin magsakripisyo nin lubos para sa saindo.” (2 Cor. 12:15) Nanudan ni Pablo sa mga eksperyensiya niya na kun an saro nagsasakripisyo alang-alang sa iba, bako sanang personal na kaugmahan an makakamtan niya kundi—an mas mahalaga—pati man an bendisyon asin pag-uyon ni Jehova.—Gibo 20:24, 35.

Talagang nauugma si Jehova pag ginagamit niyato an satong oras asin kusog tanganing suportaran an intereses kan Kahadian asin tabangan an satong mga kapagtubod. Pero may ibang paagi pa daw na masusuportaran ta an gibuhon na paghuhulit kan Kahadian? Igwa! Apuwera sa mga pagtabang na ginigibo niyato huli sa pagkamuot, matatawan niyato nin onra an Diyos paagi kan satong boluntad na mga donasyon. Ginagamit iyan tanganing masuportaran an gibuhon na paghuhulit sa bilog na kinaban, kaiba diyan an pagtabang sa mga misyonero asin sa iba pang nasa espesyal na bilog na panahon na paglilingkod. Dugang pa, an pagpreparar asin pagtradusir nin mga literatura asin video, an pag-ayuda pag may kalamidad, asin an pagtugdok nin bagong mga Kingdom Hall gabos iyan sinusuportaran kan satong boluntad na mga donasyon. Makakasigurado kita na ‘an matinao bebendisyunan.’ Saro pa, pag itinatao ta an satong mahalagang mga bagay ki Jehova, natatawan niyato siya nin onra.—Tal. 3:9; 22:9, An Marahay na Bareta Biblia.

Kun Paano Nagkokontribwir an Iba Para sa Pambilog na Kinaban na Gibuhon

Arog kan panahon ni apostol Pablo, dakul ngunyan an ‘nagtatagama’ nin kuwarta tanganing ihulog sa kahon nin kontribusyon sa kongregasyon na may nakasurat na “Worldwide Work.” (1 Cor. 16:2) Kada bulan, ipinapadara kan mga kongregasyon an mga kontribusyon na ini sa sangang opisina kan Mga Saksi ni Jehova na nakakasakop sa nasyon ninda. Puwede ka man na direktang magpadara nin donasyon sa legal na korporasyon na ginagamit kan Mga Saksi ni Jehova sa nasyon kun sain ka nakaistar. Tanganing maaraman an pangaran kan panginot na legal na korporasyon na ginagamit kan Mga Saksi ni Jehova sa saindong nasyon, kontakon tabi an sangang opisina. Mahihiling an adres kaiyan sa www.jw.org. Depende sa mga kamugtakan sa saindong lugar, an mga klase nin donasyon na puwede mong direktang ipadara iyo an minasunod:

DIREKTANG DONASYON

Donasyon paagi sa electronic bank transfer, debit card, o credit card. Sa ibang sangang opisina, posible man ini gamit an jw.org o iba pang designadong website.
Donasyon na kuwarta, alahas, o iba pang mahalagang personal na pagsadiri. Iiba an sarong surat na nagsasabing an kuwarta o an mga bagay na iyan direktang donasyon.

AREGLO SA KONDISYONAL NA DONASYON

Donasyon na kuwarta na may kondisyon na puwedeng ibalik iyan enkaso kaipuhanon kan nagdonar.
Iiba an sarong surat na nagsasabi na iyan kondisyonal na donasyon.

PLANO PARA SA PAG-ABULOY

Apuwera sa mga regalong kuwarta asin mahalagang personal na pagsadiri, may iba pang paagi nin pagdonar para makatabang sa gibuhon na pang-Kahadian sa bilog na kinaban. Nakalista iyan digdi. Ano man na paagi o mga paagi an gusto mo, kontakon nguna tabi an sangang opisina na nakakasakop sa nasyon nindo para maaraman kun arin diyan an puwede. Huling nagkakalain-lain an legal na kahagadan saka ley sa buhis, mahalagang kumonsulta sa kuwalipikadong mga parakonseho sa buhis asin sa ley bago pumili nin pinakamarahay na paagi nin pagdonar.

Insurance Asin Retirement Plans: Donasyon na an korporasyon kan Mga Saksi ni Jehova an ginigibong benepisyaryo nin life insurance policy, individual retirement account, o retirement/pension plan.

Deposito sa Bangko: An deposito sa bangko puwedeng gibuhon na payable sa korporasyon kan mga Saksi pagkagadan kan nagdeposito sigun sa lokal na mga kahagadan kan bangko.

Stocks Asin Bonds: Idinodonar ini sa korporasyon kan mga Saksi bilang direktang regalo o paagi sa nasusurat na kasunduan na ibabalyo an mga ini pagkagadan kan nagdonar.

Real Estate: Madaling ikapabakal na daga, harong, o edipisyo na idinodonar sa korporasyon kan mga Saksi, puwedeng paagi sa direktang pagregalo o, kun residensiyal na propyedad, paagi sa pagkaigwa nin kontrata na puwedeng padagos na mag-istar diyan an nagdonar sagkod na siya nabubuhay (life estate).

Testamento Asin Trust: Propyedad o kuwarta na puwedeng ipamana sa korporasyon kan mga Saksi paagi sa sarong legal na testamento o trust agreement na nagsasabing an korporasyon an benepisyaryo kaiyan. An areglong ini puwedeng magtao nin nagkapirang bentaha sa pagbuhis.

Siring kan ipinaparisa kan terminong “plano para sa pag-abuloy,” an mga klaseng ini nin donasyon nangangaipong pagplanuhan kan madonar. Para matabangan an mga indibidwal na gustong magkontribwir sa pambilog na kinaban na gibuhon kan mga Saksi paagi sa sarong klase nin pag-abuloy, igwa kita nin brosyur na Charitable Planning to Benefit Kingdom Service Worldwide na makukua sa Ingles asin Kastila. Ginibo an brosyur na ini para magtao nin impormasyon dapit sa lain-lain na paagi nin pagtao nin regalo ngunyan o pag-abot nin panahon, arog nin pagpamana pag nagadan. An impormasyon diyan tibaad bako gabos aplikado sa sitwasyon mo huli sa ley dapit sa buhis o iba pang ley sa nasyon kun sain ka nakaistar. Sa paggamit kan siring na mga paagi nin pag-abuloy, dakul an nakatabang sa pagsuportar sa satong relihiyoso saka humanitaryong mga aktibidad sa bilog na kinaban asin lubos na naaprobetsaran an itinataong diskuwento sa buhis. Kun igwa kan brosyur na iyan sa saindong nasyon, puwedeng maghagad nin kopya sa sekretaryo kan kongregasyon nindo.

Para sa dugang pang impormasyon, i-click an link na “Magdonar sa Samong Pambilog na Kinaban na Gibuhon” sa parteng ibaba kan arin man na page kan jw.org/bcl, o kontakon an sangang opisina.