Sararong Nagsasamba ki Jehova
1 Ilinadawan kan salmista an satong sararong pagsamba kan sia sumurat: “Uya! Kanigoan karahay asin kanigoan kaogma na an magturugang mag-ontok na sararo!” (Sal. 133:1) Paagi sa pagtalubo sa tamang kaaraman asin pag-aplikar kaiyan sa aroaldaw, napagdadanay niato gabos ‘an saro sanang pag-isip asin saro sanang paghonahona.’ (1 Cor. 1:10) An satong pagkasararo nadugangan sa nakaaagi pa sanang mga taon paagi sa paggamit kan librong United in Worship of the Only True God, na ilinuwas kan 1983. Maninigo na orog pa niatong apresyaron an librong ini mantang pinag-oorolayan niato liwat iyan sa satong Pag-adal sa Libro kan Kongregasyon magpoon sa semana nin Hulyo 4 sagkod Abril 23. Sinasadol mi an gabos na pumedido na kan saindang suplay ngonyan tanganing igwa na kamo kaiyan kun ponan na niatong pag-adalan an libro.
2 An gabos makikinabang, baga man napag-adalan na niato an librong ini kan enot o kabilang kita sa rinibong bagohan na napasa katotoohan poon kan huring pag-adalan an libro sa Pag-adal sa Libro kan Kongregasyon. An mga bagohan makikinabang sa laen-laen na komento asin pag-aplikar kan maygurang na mga kapagtubod. An lokal na pag-aplikar kan eksperyensiadong mga nangengenot sa materyal siertong makakasambit sa mga bagay sa satong personal na buhay asin ministeryo na nagkakaipo pa nin atension. An pagrepaso sa impormasyon asin pag-aplikar kan hatol sa librong United in Worship, mantang ipinaliliwanag kaiyan an mga problema asin pangigipit na inaatubang niato ngonyan, mapakosog sa sato mantang kita padagos na ‘nakikipaglaban nin maigot para sa pagtubod.’—Jud. 3.
3 Apuwera sa pagkaigwa nin madonong na hatol na nakapakokosog asin nagmomotibar, an librong United in Worship pinupukaw an satong gana para sa espirituwal na kaaraman. An satong kakayahan sa pangangatanosan pinakokosog kan paagi nin pag-atubang kan impormasyon. An mga hapot sa ibaba kan pahina, saka an mga hapot asin teksto sa laog nin pirang parapo, nagkakaipo nin hararom na paghorophorop asin personal na pag-aplikar. An pag-adal sa librong ini nakatatabang sato na mapatalubo an kakayahan sa pag-isip asin mapaoswag an satong pagmansay sa espirituwal na mga bagay.
4 Kita gabos nagkakaipong mapagirumdom manongod sa espirituwal na mga bagay siring sa ipinaliliwanag ni Pedro. (2 Ped. 1:12, 13; 3:1) Ipinagigirumdom sato ni Pablo na ini para sa satong espirituwal na kaligtasan. (Fil. 3:1) Paagi sa pagsiyasat giraray sa librong United in Worship, mapakokosog kita sa satong sararong pagsamba ki Jehova.