Pag-adal sa Librong Nagkakasararo sa Pagsamba
An Nagkakasararo sa Pagsamba sa Iyo Sanang Tunay na Dios dinisenyo tangani na pag-adalan kaiba kan mga bagohan pagkatapos na mapag-adalan ninda an librong Kaaraman. An pagtokar niato sa publikasyon na ini sa Pag-adal sa Libro kan Kongregasyon aandamon kita na gamiton an librong ini sa ministeryo asin tatabangan kita na pararomon an pagkamoot asin pag-apresyar niato ki Jehova saka sa saiyang organisasyon. Paano kita makikinabang nin lubos sa satong pag-adal sa librong Nagkakasararo sa Pagsamba?
Pamamayo sa Pag-adal: Mantang totokaron niato an bilog na kapitulo kada semana, an mga paraataman sa pag-adal sa libro kaipuhan na madonong na barangaon an oras. Bobooton ninda na dai palawigon an pag-adal sa enot na mga parapo tangani na matawan nin mas dakol na oras an mas importanteng materyales, na sa pankagabsan yaon sa huring kabtang kan kapitulo. An halipot na pag-orolay sa kahon para sa repaso sa pagtatapos kan kada pag-adal makakatabang sa mga presente na magirumdoman an mayor na mga punto.
An may indension na mga hapot para sa paghorophorop asin pag-orolay maheheling sa mga 50 porsiento kan mga kapitulo kan librong Nagkakasararo sa Pagsamba. An sarong halimbawa makukua sa pahina 53. An siring na mga hapot dai kaipuhan na basahon kaiba kan mga parapo. Kun pinag-oolayan iyan sa grupo, ipapabasa asin totokaron kan paraataman an sitadong mga teksto kun itinotogot nin panahon.
Patienot na Pag-andam: Bako sanang pagkurit kan mga simbag an kalabot sa pag-andam na marhay para sa pag-adal. An mapagngayongayong paghorophorop sa sitadong mga teksto magpapangyari sa sato na andamon bako sanang an satong mga komento kundi, mas importante, an satong puso. (Esd. 7:10) Kita gabos makakokontribwir sa pagparinigonan nin boot paagi sa suelto alagad dai nagdodominar na pagtao kan satong mga komento.—Roma 1:11, 12.
An pag-adal niato sa librong Nagkakasararo sa Pagsamba makakatabang sa sato na rumani ki Jehova asin aandamon kita na tabangan an mga sadiosan an puso na umiba sa sato sa pagsamba sa saiya. (Sal. 95:6; Sant. 4:8) Logod kita gabos makinabang nin lubos sa marahayon na espirituwal na probisyon na ini.