Ikaogma an Satong Pag-adal sa Ano Man Nanggad an Itinotokdo kan Biblia?
1 An sarong nakakaogmang aspekto kan “Diosnon na Pagkuyog” na mga Pandistritong Kombension iyo an pagluwas kan librong Ano Man Nanggad an Itinotokdo kan Biblia? Dai mahahaloy, parate na niatong gagamiton iyan sa satong ministeryo sa langtad, nangorogna kun kita nagkokondukta nin mga pag-adal sa Biblia. Kun siring, kaipuhan niatong magin pamilyar na marhay sa bagong publikasyon na ini. Magigin posible iyan huli ta pag-aadalan niato iyan sa Pag-adal sa Libro kan Kongregasyon na mapoon sa semana nin Abril 17, 2006.
2 Dadarahon kan paraataman sa Pag-adal sa Libro kan Kongregasyon an atension sa mga hapot na nasa irarom kan titulo kan kada kapitulo. Dangan an pag-adal papamayohan paagi sa paggamit kan mga hapot sa ibaba kan pahina. Babasahon asin pag-oolayan an mayor na mga teksto, asin makakatabang an kahon na “Kun Ano an Itinotokdo kan Biblia” na nasa katapusan kan kada kapitulo sa pagrepaso kan pinag-aadalan, huli ta an kahon na iyan igwa kan sono sa Kasuratan na simbag sa mga hapot sa irarom kan titulo kan kapitulo. Maoogma kamong magkomento, huli ta ipinapaliwanag kan librong ini an mga tema sa malinaw, simple, asin interesanteng paagi.
3 An apendise kan librong ini nagtatao nin mga detalye manongod sa manlaenlaen na topiko. Magagamit niato ini kun an mga inaadalan sa Biblia nangangaipo nin dugang pang impormasyon manongod sa sarong tema. Kun beses, pag-oolayan an mga artikulo kan apendise durante kan Pag-adal sa Libro kan Kongregasyon. Babasahon kan parabasa sa pag-adal sa libro an bilog na artikulo kan apendise manongod sa sarong topiko, asin puedeng pag-olayan nin grupo-grupo an mga parapo kan mas haralawig na artikulo kan apendise. An apendise mayo nin mga hapot sa pag-adal. Alagad puedeng pakomentohon kan paraataman an mga nag-aatender paagi sa pagbangon nin mga hapot na magtatampok kan prinsipal na mga punto.
4 Magigin marikas an mga pag-adal sa librong Itinotokdo kan Biblia durante kan Pag-adal sa Libro kan Kongregasyon. Dai man kita linalaoman na magin arog man kaiyan karikas kun inaadalan niato an ibang mga tawo sa publikasyon na ini, partikularmente kun kadikit sana o mayo sinda nin kaaraman sa Biblia. (Gibo 26:28, 29) Durante nin mga pag-adal sa Biblia, kakaipuhanon niatong ipakipag-olay nin mas lubos an mga teksto, ipaliwanag an mga ilustrasyon, asin iba pa. Kaya gibohon nindong pasohan na umatender kada semana asin makikabtang nin lubos sa satong pag-adal sa librong Ano Man Nanggad an Itinotokdo kan Biblia?