Arogon an Dakulang Paratokdo Kun Ginagamit an Librong Itinotokdo kan Biblia
1. Paano nagtokdo si Jesus?
1 An Dakulang Paratokdo, si Jesus, pirmeng ipinapaliwanag an mga bagay sa simple asin maliwanag na paagi. Tangani na pukawon an kaisipan kan mga naghihinanyog sa saiya, kun beses hinahapot nguna nia sinda kan saindang punto de vista. (Mat. 17:24-27) Dinadara nia an atension sa Tataramon nin Dios. (Mat. 26:31; Mar. 7:6) Nag-iingat sia na dai magtao nin sobra-sobrang impormasyon sa saiyang mga disipulo, na nakakaaram na padagos sindang makakanood. (Juan 16:12) Interesado man si Jesus sa kun baga tinutubod asin nasasabotan kan saiyang mga disipulo an itinotokdo nia sa sainda. (Mat. 13:51) Dinisenyo an librong Itinotokdo kan Biblia tangani na tabangan kita na magtokdo sa kaagid na paagi.
2. Sa anong mga paagi magagamit niato an pambukas na mga hapot sa irarom kan kada tema kan kapitulo?
2 Pambukas na mga Hapot: Sa pagpoon nindo nin sarong kapitulo, marahay na darahon an atension sa pambukas na mga hapot sa irarom kan tema kan kapitulo. Ihapot iyan sa retorikong paagi tangani na pukawon an gana kan inaadalan sa Biblia. O puede nindong imbitaran sia na komentohan sa halipot an mga hapot na iyan. Dai na kaipuhan na pag-olayan nin detalyado an saiyang mga komento o itanos an gabos na salang simbag. Puede nindong pasalamatan sana sia sa saiyang mga ideya asin pumoon nang pag-olayan an pag-aadalan. An komento nia sa pambukas na mga hapot matabang sa saindo na maaraman kun kaipuhan nindong magtao nin orog na atension sa sarong kabtang kan leksion.
3. Paano niato mapagdadanay na simple an pag-adal?
3 Mga Teksto: Maninigong nakasentro sa Kasuratan an pag-adal. (Heb. 4:12) Minsan siring, dai kaipuhan na basahon an lambang sitadong teksto. Idoon an mga teksto na nagpapaheling kan basehan sa Kasuratan para sa satong mga tinutubod. Tibaad dai na kaipuhan na basahon an mga teksto na nagtatao nin basehan na impormasyon. An librong Itinotokdo kan Biblia iinaatubang an katotoohan sa bakong komplikadong paagi. Papagdanayon na simple an pag-adal. Magkonsentrar sa prinsipal na mga punto, asin likayan an tendensia na magpaliwanag nin kadakol manongod sa mga detalye o magdagdag sa pag-oolay nin materyales hale sa ibang reperensia na dai man kaipuhan.
4. Ano an nagdedeterminar kun baga maninigo kitang gumamit nin oras durante kan pag-adal tangani na pag-olayan an impormasyon sa apendise?
4 Apendise: An apendise igwa nin 14 topiko na suplemento kan mismong pinag-aadalan. Opsional an pag-oolay sa mga topikong ini durante kan pag-adal. Para sa nagkapirang tema, tibaad gusto nindong enkaminaron an saindong inaadalan sa Biblia na basahon na sana nia an suplementaryong materyales, nangorogna kun nasasabotan asin inaako nia an impormasyon sa mismong pinag-aadalan. Halimbawa, kun nagtutubod na an inaadalan sa Biblia na si Jesus an Mesiyas, tibaad dai na kaipuhan na pag-olayan kaiba nia an topikong “Si Jesu-Cristo—An Ipinanugang Mesiyas” kun pinag-oolayan an kapitulo 4, “Siisay si Jesu-Cristo?” Sa ibang okasyon, tibaad kapakipakinabang na gumamit nin oras durante kan pag-adal tangani na pag-olayan an materyales sa apendise o sarong kabtang kaiyan.
5. Kun gusto niatong pag-olayan an impormasyon sa apendise, paano niato iyan puedeng gibohon?
5 Kun gusto nindong pag-olayan an materyales sa apendise, puede kamong mag-andam antes pa nin mga hapot asin pag-olayan an mga parapo kaiba kan inaadalan sa Biblia na siring kan ginigibo nindo kun pinag-oolayan an nasa laog mismo kan kapitulo. O depende sa mga pangangaipo kan inaadalan sa Biblia, tibaad gusto nindong gumamit nin pirang minuto durante kan pag-adal tanganing repasohon an impormasyon kaiba nia. Totogotan kamo kaiyan na seguradohon na nasasabotan nia an materyales na personal niang binasa.
6. Paano magagamit an kahon sa repaso sa pagtatapos kan kada pag-adal?
6 Kahon sa Repaso: An kahon sa katapusan kan kada kapitulo nagtatao nin mga komento na sa parate nagsisimbag sa pambukas na mga hapot. Puede nindong gamiton an mga komentong ini sa pagrepaso kan prinsipal na mga punto kan kapitulo. May mga parahayag na nanompongan na nakakatabang na basahon kaiba kan inaadalan sa Biblia an kada komentong ini asin tibaad an kaibang mga teksto. Dangan hinahagad ninda sa inaadalan sa Biblia na ipaliwanag sa halipot kun paano pinapatunayan kan mga teksto an komentong iyan. Ipinapaheling kaini sa nagtotokdo kun baga nasasabotan nin malinaw kan inaadalan sa Biblia an prinsipal na mga punto kan leksion asin kun paano ini suportado kan Biblia patin kun baga minaoyon sia sa mga iyan. Sinasanay man kaiyan an inaadalan sa Biblia na gamiton an Biblia sa pagpaliwanag sa iba kan katotoohan.
7. Paano niato magagamit an librong Itinotokdo kan Biblia sa pag-otob kan sugo sa sato?
7 An pinakaepektibong paagi na otobon an sugo sa sato na tokdoan an mga tawo asin gumibo nin mga disipulo iyo na arogon an mga paagi nin pagtotokdo ni Jesus. (Mat. 28:19, 20) Matatabangan kita kan librong Itinotokdo kan Biblia na gibohon iyan. Gamiton na marhay iyan sa pagtokdo sa iba kan katotoohan sa malinaw, simple, asin interesanteng paagi.