Gamiton nin Epektibo an mga Pantabang na Nasa Itinotokdo kan Biblia

Mantang nanunudan nin sarong tinutukduan kun ano talaga an itinutukdo kan Bibliya asin inaaplikar iyan, magigin mauswag asin mabunga siya sa espirituwal. (Sal. 1:1-3) Matatabangan tang umuswag an satong tinutukduan kun gagamiton ta nin epektibo an mga pantabang na nasa librong Itinotokdo kan Biblia.

Pambukas na mga Hapot: An kada kapitulo nagpupuon sa mga hapot na sinisimbag sa pag-aadalan na kapitulo. Puwede mong basahon an mga hapot sa paaging mapupukaw an interes kan tinutukduan mo sa pag-aadalan nindo. O puwede mo man na pasimbagon saiya sa halipot an kada hapot. Pero kun sala an simbag niya, dai man kaipuhan na sabihon tulos saiya an tamang simbag. Makakatabang an mga simbag niya para maaraman mo an mga bagay na kaipuhan na tawan nin atensiyon asin iduon.—Tal. 16:23; 18:13.

Apendise: Kun nasasabutan asin inaako na kan tinutukduan an mismong pinag-aadalan, puwede mo siyang dagkahon na basahon na sana nin solo an apendise na manungod diyan. Sa sunod nindong pag-adal, puwede nindong repasuhon iyan nin pirang minuto para maaraman mo kun talagang nasabutan niya iyan. Pero, kun sa hiling mo mas makakatabang sa saiya, iiba sa pag-adal nindo an apendise o an pirang kabtang kaiyan paagi sa pagbasa kan mga parapo asin pagbangon nin mga hapot na patiinot mong pinaghandaan.

Kahon sa Repaso: Mababasa sa kahon sa repaso na nasa katapusan kan kada kapitulo an simbag sa pambukas na mga hapot. Puwede mong gamiton ini para masiguradong nasasabutan asin kayang ipaliwanag kan tinutukduan mo an panginot na mga punto. Basahon nindo iyan pati na an mga teksto diyan. Dangan, gamit an (mga) teksto, hagadon saiya na ipaliwanag kun taano ta masasabi niyang totoo an mga sinasabi diyan.—Gui. 17:2, 3.