Makinabang sa Pag-adal sa Rumani ki Jehova
1 Sa “Maigot na mga Parabalangibog kan Kahadean” na Pandistritong Kombension, napalukso an puso niato na akoon an librong Rumani ki Jehova. Dakol an binasa tolos-tolos an libro. Dakol pa an daing duda na napahiro na gibohon iyan paagi sa teksto kan taon para sa 2003: “Rumani kamo sa Dios, asin sia marani sa saindo.”—Sant. 4:8.
2 Sa Marso poponan niato an satong pag-orolay sa Rumani ki Jehova sa Pag-adal sa Libro kan Kongregasyon. Paano kita makikinabang sa pinakalubos na paagi sa satong pag-adal? Mahalagang marhay an pag-andam. Duwang semana an gagamiton sa kada kapitulo, na medyo dikit na parapo an nakaiskedyul para sa pag-adal kada semana. Matao ini nin bastanteng panahon para sa saindong odok sa pusong mga komento basado sa saindong pag-adal kan asin paghorophorop sa materyales. Saro pa, mas dikit pang parapo an pag-oolayan durante kan mga semana na rerepasohon an huring kabtang nin sarong kapitulo, tanganing matawan nin panahon an paggamit nin sarong espesyal na kabtang kan libro.
3 Poon sa kapitulo 2, igwa nin sarong kahon na may titulong “Mga Hapot Para sa Paghorophorop” harani sa katapusan kan kada kapitulo. Pakatapos na pag-olayan an huring parapo kan kapitulo, hahagadon kan paraataman sa pag-adal sa libro na tokaron kan grupo an kahon. Eenganyaron nia na ipahayag kan mga miembro kan grupo an saindang mga ideya, na hinahagad an marahayon na mga punto kan saindang paghorophorop sa Kasuratan. (Tal. 20:5) Dugang pa sa mga hapot na itinao sa kahon, kun beses puede siang magpalataw nin mga hapot na siring kan mga minasunod: “Ano an sinasabi sa saindo kan impormasyon na ini manongod ki Jehova? Paano iyan nakaaapektar sa saindong buhay? Paano nindo iyan magagamit sa pagtabang sa iba?” An pasohan nia iyo na enganyaron na ipahayag an odok sa pusong mga komento, bakong tanganing baloon an grupo mapadapit sa medyo bakong gayong importanteng mga detalye.
4 Napapalaen an Rumani ki Jehova. Minsan ngani nagpapamuraway ki Jehova an gabos na publikasyon kan “fiel asin may diskresion na oripon,” an librong ini biyong idinusay sa pagtokar kan mga kualidad ni Jehova. (Mat. 24:45-47) Kanigoan kanakapupukaw sa boot na oportunidad an naghahalat sa sato! Makikinabang kitang marhay sa lubos na pag-adal kan personalidad ni Jehova. Tabangan logod kita kan pag-adal na mas rumani sa satong langitnon na Ama, asin magin mas epektibo logod kita sa pagtabang sa iba na gibohon man iyan.