Ginigibo daw Nindo an mga Nanodan Nindo?
1 Kamakaoogma nanggad na makaatender sa “Banal na Hustisya” na Pandistritong Kombension! Aroaldaw an programa nagsusulwak sa pagpakosog asin praktikal na mga suhestion sa kun paano niato orog na ikapaheheling an hustisya asin katanosan nin Dios. Ngonyan na nagpuli na kamo, saindo daw na ‘ginigibo an saindong nanodan, nadangog, asin naheling na idinemonstrar’? (Fil. 4:9) Magigin kapakipakinabang na repasohon an nagkapirang tampok na kabtang kan programa sa kombension.
2 Girumdoma an pahayag na “Magkaigwa nin Timbang, Simpleng Buhay” kan Huwebes na hapon. Ini basado sa Mateo 6:19-33. Odok na daw nindong hinorophorop kun ano an magigibo nindo tanganing haleon an mga bagay na dai kaipuhan, na nagtatao nin orog na panahon sa pag-adal, pag-andam para sa pagtiripon, asin pagtabang sa iba? Anong mga pagliliwat an magigibo nindo tanganing makapamuhay nin simple na mas kadikit an mga istorbo?
3 An pangangaipo na makinabang sa pagtotokdo na itinatao ni Jehova paagi sa saiyang Tataramon asin organisasyon idinoon sa kabtang na “Akoon an Disiplina Asin Magin Madonong.” An iba tibaad kaipuhan na magtao nin partikular na atension sa pagpakarhay asin pagpaoswag sa saindang ministeryo. Regular daw niatong ginagamit an Topikong Mapag-oolayan, na iiniiba an kagharong sa orolay? O kontento na daw kita sa mga pag-alok nin magasin? Iinaaplikar daw niato an hatol sa paggamit kan librong Reasoning, pagdalaw liwat sa mga interesado, asin paggibo nin mga pag-adal sa Biblia?—Tal. 8:33.
4 Kaiba sa programa kan Biyernes an pahayag na “Magin Malinig sa Isip asin Hawak.” An banal na hustisya naghahagad na an banwaan nin Dios magin malinig sa espirituwal, moral, mental, asin pisikal. (2 Cor. 7:1) Saindo daw na ‘ginigibo an nanodan’ sa bagay na ini? Paano? Mapagdadanay niato an espirituwal na kalinigan paagi sa pagdadanay na siblag sa marigsok na relihiyon asin sa mga apostata. Kaipuhan na disiplinahon niato an satong sadiri na likayan an maramog na mga ugale o pagpatalubo nin salang mga horot sa sekso, na nagdadara sa mental asin moral na karigsokan. (Job 31:1, 9-11) Linilikayan daw nindo an mga pelikula, programa sa TV, o babasahon na puwedeng magkaigwa nin nakararaot na impluwensia sa saindo o sa saindong pamilya? Ipinaliwanag na an iba nagpabaya sa personal na kalinigan asin kalinigan sa harong. Kun an siisay man may kaluyahan sa bagay na ini, tunay na may magigibong mga pagliliwat. An lambang miembro nin pamilya kaipuhan na magkooperar tanganing mapagdanay an kalinigan asin kahusayan kan harong. Partikularmente kun irenerepresentar si Jehova sa ministeryo boot niatong magin husay asin magsulot nin malinig asin mabining gubing. Sa siring tinatawan niato nin onra an satong banal na Dios.—1 Ped. 1:14-16.
5 An masurunod pang luwas kan An Satong Ministeryo sa Kahadean magpapagirumdom sato kan iba pang mahahalagang kabtang nin banal na hustisya na nanodan niato sa satong kombension. Ini makatatabang sa gabos mantang iinaaplikar niato an mga prinsipyong ini sa satong pan-aroaldaw na buhay, sa siring nagigin “mga paragibo kan tataramon, asin bakong mga paradangog sana.”—Sant. 1:22-25.