Tabangan an Iba na Apresyaron an Pagkamoot nin Dios
1 “Ipinamimidbid nin Dios an saiyang pagkamoot sa sato sa paagi na, mantang kita mga parakasala pa, si Cristo nagadan para sa sato.” (Roma 5:8) Ipinahahayag kan mga tataramon na iyan an puwersang nagmomotibar sa likod kan panuga ni Jehova na kaldahon an katawohan sa kasalan asin kagadanan. (Juan 3:16) An kadakulaan kan pagkamoot nin Dios ipinaheheling kan bagay na ini ginibo nia para sa bilog na katawohan, minsan ngani an kadaklan dai nagmimidbid sa saiyang kapangyarihan sa saindang buhay.
2 Mantang an oportunidad sa buhay na daing katapusan bukas sa gabos na tawo, boot niatong gibohon an bilog niatong makakaya na maparigon an pag-apresyar sa pagkamoot nin Dios sa puso nin mga tawong satong nanonompongan. Ini kaipuhan tanganing makapaglingkod sinda nin tama ki Jehova. Paano niato sinda matatabangan na apresyaron an dakulang pagkamoot nin Dios?
AN MEMORIAL
3 Sa Miyerkoles, Marso 22, 1989, gigirumdomon kan banwaan ni Jehova an kagadanan ni Jesu-Cristo. An itataong Makakasuratan na pahayag tibaad makatabang sa dakol na bagohan na orog na maapresyar an pagkamoot nin Dios asin an pangangaipo na mamuhay kaoyon sa saiyang kabotan. Imbitaran an pinakadakol na umatender sa Memorial. Naimbitaran na daw nindo an saindong pagtaraed? Kumusta man an saindong mga paryentes, kaeskuwela, asin katrabaho? Gamiton an inimprentang imbitasyon sa pagtabang saindo na ponan an orolay.
4 An kamagurangan dinadagka na biyong andamon an Memorial. Igwa daw nin dagdag na mga tukawan na inandam kun kaipuhan? Kun bako sanang sarong kongregasyon an magamit sa tiriponan, kaipuhan an marahay na areglo asin iskedyul tanganing malikayan an karibarawan. An grupo nin kamagurangan maninigong pumili nin kuwalipikadong espiker na mag-aatubang kan pahayag sa klaro asin Makakasuratan na paagi. Ini makatatabang sa gabos na presente na maapresyar an ginibo nin Dios para sa sainda asin an pangangaipo na bilog na pusong sumimbag sa saiyang pagkamoot.
DAI NA NABUBUHAY PARA SA SATONG SADIRI
5 Si Jesu-Cristo “nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya na nagadan para sa sainda.” (2 Cor. 5:15) Huling igwa kan may pag-apresyar na punto-de-vistang ini, an banwaan ni Jehova magibo nin orog kisa dating paghihingoa na tabangan an iba ngonyan na Marso.
6 An Marso asin Abril napatunayan na marahayon na bulan para sa pakikikabtang sa pag-auxiliary payunir. Daing duwa-duwa na an dakol na kamagurangan asin ministeryal na lingkod, kaiba an saindang pamilya, makakapakikabtang, sa siring nagtatao sa kongregasyon nin marahay na arogan sa pag-apresyar.
7 Ngonyan na Marso, gamiton an gabos na oportunidad na tabangan an iba na apresyaron an pagkamoot nin Dios paagi sa pag-imbitar sa mga bagohan sa Memorial asin paagi sa maigot na pakikikabtang sa ministeryo sa langtad. Sa siring ikapaheheling niato na inaapresyar na gayo niato an pagkamoot ni Jehova sa pagtao kan saiyang Aki bilang atang.