Pamurawayon an Dios Bilang Payunir Ngonyan na Tig-initan
1 An satong teksto para sa taon nin 1989 nagpapagirumdom sato kan satong pribilehiyo asin paninimbagan na matakot sa asin pamurawayon an satong makangangalas na Kaglalang. Iyan nagsasabi: “Matakot sa Dios asin pamurawayon sia.” (Kap. 14:7) Paano niato mapapamuraway si Jehova?
2 Ipinaheheling kan Enot na Pedro 2:12 na bilang bunga kan satong marahay na mga gibo, an mga nakakamasid sato ‘magpapamuraway sa Dios sa aldaw kan saiyang pagsiyasat.’ Siring man, sa Juan 15:8, sinabi ni Jesus: “An sakong Ama napapamuraway kaini, na kamo padagos na nagbubunga nin dakol asin nagpapatunay na kamo sakong mga disipulo.” Kaoyon digdi, ano pa an mas marahay na paagi nin pagpamuraway kisa pagpaluwas nin dakol na bunga kan Kahadean sa pagpapayunir?
ANGAY NA PANAHON NA MAGPAYUNIR
3 Tunay na an mga bulan na nagdadangadang angay na mga panahon na makikabtang sa mas dakol na aktibidad kan Kahadean. Sa Marso 22 an Memorial seselebraron kan bilog na banwaan ni Jehova. Ini panahon na kita gabos nagmamawot na ipahayag an satong hararom na pagkamoot asin pag-apresyar sa ginibo ni Jehova para sa sato paagi sa saiyang Aki. Mayo nin mas marahay na paagi na ikapaheling an pag-apresyar na iyan kisa paggamit kan bilog na bulan sa pagpapayunir. Makikikabtang daw kamo bilang auxiliary payunir sa Marso? Kan Marso, 1988 may 6,662 sa gibohon na ini, alagad ta nasisierto niato na magkakaigwa nin mas dakol pa sa taon na ini.
4 Pag-Abril kada taon naggigibo kita nin espesyal na paghihingoa sa paglilingkod sa Dios. Ngonyan na Abril mas mapapasilan kamong mag-auxiliary payunir ta may limang Sabado asin limang Domingo sa laog kan bulan. Kan nakaaging Abril may 18,891 auxiliary payunir na nagreport, mas hababa nin kadikit kisa kan 1987. May dahelan daw na dai kita puwedeng magkaigwa nin 25,000 sa gibohon na ini ngonyan na 1989? Ini mga 25% kan total na parahayag, na madaling maabot.
5 Sa nagkapirang kongregasyon kan nakaaging taon, an bilog na grupo nin kamagurangan, an ministeryal na mga lingkod asin an saindang agom nagtao nin marahay na halimbawa paagi sa pag-auxiliary payunir. Kan nakaaging Abril an sarong kongregasyon may 83 na auxiliary payunir, apuwera sa mga regular payunir! Kanigoan kadakulang pagpakosog para sa gabos sa kongregasyon!
6 An mga regular payunir puwede man na magin dakulang tabang sa pag-engganyar sa pag-auxiliary payunir. Kun an kada regular payunir makadadagka sa duwa sanang parahayag na mag-auxiliary payunir sa Marso, Abril asin Mayo, isip-isipa na sana an ibubunga sa bilog na nasyon!
7 Dinadagka mi an gabos na umatender sa miting sa Pebrero 19 para sa mga nagpaplanong mag-auxiliary payunir. Magin positibo an kaisipan asin perming girumdomon an saindong motibo asin kamawotan na “matakot sa Dios asin pamurawayon sia.”—Kap. 14:7.