Mga Hobenes—Pataluboon an Makosog na Relasyon ki Jehova
1 Kawiliwili an mga tataramon kan Salmo 24:3-5: “Siisay an matukad sa bukid ni Jehova, asin siisay an masakat sa saiyang banal na lugar? An siisay man na daing kasalan sa saiyang kamot asin malinig sa puso, na dai dinara an Sakuyang kalag sa daing kamanungdanan, ni nanumpa man nin mapandaya.” Iyo, boot ni Jehova na dayupot na makaibaiba an mga malinig asin daing kasalan, an mga dai nagkaigwa nin duwang klaseng buhay paagi sa panunumpa nin mapandaya. Nakaoogmang maheling na an dakol na mga hobenes na Kristiano ngonyan natatamaan kan paglaladawan na iyan. An saindang moral na kalinigan ginigibo sindang magayon sa mga mata nin Dios.
2 Pasil daw para sa mga hobenes na magin malinig sa moral ngonyan? Bako. Aroaldaw may mga angat na kaipuhan na atubangon. Igwa nin lakop sa kinaban na epidemya nin marigsok na mga impluwensia asin inmoral na gawe. Ano an magigibo nindo tanganing maingatan an saindong sadiri? Kaipuhan na pataluboon an makosog na relasyon ki Jehova.
KUN ANO AN KAIPUHAN NINDONG GIBOHON
3 Mantang kalabot sa makosog na relasyon ki Jehova an odok sa pusong pag-apresyar sa saiyang mga kuwalidad, kaipuhan na manodan nindo kun ano an tunay niang personalidad. Ini nagkakaipo nin maigot na pag-adal sa saiyang Tataramon. Kapareho ni Timoteo, kaipuhan na kamo “pinakakan sa mga tataramon kan pagtubod asin kan marahay na katokdoan na maingat mong sinunod.” (1 Tim. 4:6) An siring na pag-adal matabang saindo na maheling “an karahayan ni Jehova.” (Sal. 27:4) Mientras na nag-oorog an saindong nanonodan manongod sa saiya, mas magigin man kamong harani sa saiya.
4 An pagpatalubo sa siring na relasyon nagkakaipo nin panahon asin kosog. (1 Tim. 4:15) Kun kamo dai pa nabautismohan, kun siring maghingoa pasiring sa pagdusay asin bautismo. Mantang harani na kita sa katapusan kan palakaw na ini, maninigo kitang magkonsentrar sa kun “anong klaseng mga tawo” kita sa mga “gibo nin diosnon na debosyon.” (2 Ped. 3:11) Kun mapatalubo niato an pagkadayupot ki Jehova na kapareho kan maninigong magin relasyon nin saro sa iginagalang asin namomotan na gayong ama, kun siring ini iparirisa kan satong mga gibo.—Mal. 1:6.
5 An manampulong ribong hoben na mga lalaki asin babae ngonyan ginagamit an saindang bagsik asin entusiasmo sa pakikikabtang sa paghuhulit. Sinda nag-aatender sa mga pagtiripon asin boot saka andam na magkomento. Rinibo an ginagamit sa pagpapayunir an saindang kosog sa pagkabarobata. Inaapod kan Talinhaga 20:29 an kosog na iyan na “kagayonan nin mga barobata.” Minsan ngani an pagpatalubo sa makosog na personal na relasyon ki Jehova nagkakaipo nin pagpapagal, bawi man dian an paghihingoa!
6 An dakol sa saindo mga hobenes may Kristianong mga magurang na naplano na an maninigo nindong lakawan. Maghinanyog kamo sa saindong mga magurang na nasa Kagurangnan. (Efe. 6:1) Sinda namomoot na gayo sa saindo asin boot ninda na kamo magin mapanggana. Boot ninda na kamo makaabot sa bagong kinaban, kaya makikooperar sa sainda sa mga oras nin pag-adal na iaareglo ninda. Isapuso nindo an katotoohan. Adalan an gabos na makakaya nindo manongod ki Jehova, asin kamo magkakaigwa nin pagkamoot sa saiya asin maglilingkod sa saiya sagkod lamang.