Pag-omaw ki Jehova sa Awit
1 Tabi buksan an saindong songbook sa likod. Ano an naheheling nindo? Sarong koro nin mga parakantang Levita sa banal na templo ni Jehova, buka an saindang ngoso, na nag-aawit na may entusiasmo. An pag-awit mahalagang kabtang nin tunay na pagsamba sa templo ni Jehova. Kan panahon ni Hadeng David, labing 10 porsiento sa mga naglilingkod sa templo an naasignaran na mag-omaw ki Jehova paagi sa musika. Asin sa kabilangan na iyan, 288 an tinokdoan na mga parakanta, “gabos eksperto.” Maseseguro nindo na isinaboot ninda an saindang pag-awit.—1 Cron. 23:3, 4; 25:7.
2 Pag-abot sa mga panahon Kristiano, nanonodan niato na si Jesus asin an saiyang mga apostol nag-awit kan matapos an Pamanggihan kan Kagurangnan. (Mar. 14:26) Asin paorootrong sinasabi sato ni apostol Pablo na umawit nin mga pag-omaw sa satong Dios. Sa Colosas 3:16 sia nagsurat: “Togotan nindo na an tataramon kan Cristo mayaman na mag-erok dian sa saindo sa gabos na kadonongan. Padagos kamong magtokdo asin magpasaradolsadol sa lambang saro paagi sa mga salmo, mga himno sa Dios, espirituwal na mga awit na may paggalang, na nag-aarawit sa saindong puso ki Jehova.”—Helingon man an Efeso 5:19, 20.
3 An pag-awit nin mga awit sa Kahadean saro sa mga paagi na inoomaw niato si Jehova. Kun siring bako daw na kita maninigong umawit sa bilog niatong puso? Kun iyan ginigibo niato, kita nag-oomaw ki Jehova. Sia naghihinanyog sa mga awit para sa saiya kun paanong sia naghihinanyog sa satong mga pamibi. Kun kita talagang minaawit nin makosog, nakatatao man kita nin kagayagayahan sa iba, asin kita mismo nakikinabang.
4 Horophoropon an magagayon na tataramon sa satong mga awit. Tunay na an mga ini pantabang sa satong ‘pagtokdo asin pagpasaradolsadol sa lambang saro.’ Marahayon nanggad an hatol na yaon sa satong mga awit! Paagi sa pagsaboot sa hatol na iyan, matatabangan kitang makultibar an mga bunga kan espiritu, tanganing magsopay digdi asin makapagbantay tumang sa paglaog nin sa laman, kinabanon na mga impluwensia. An ‘pag-awit sa satong puso’ nakadadagka sato na paglingkodan si Jehova nin mapuso asin maogma.
5 Tanganing marahay an pagpopoon kan pag-awit sa pagtiripon, puwedeng ianunsiar kan tsirman bako sanang an numero kan awit kundi pati an tema kaiyan, o titulo. Paminsanminsan puwede niang helingon an Makakasuratan na basihan kan awit asin komentohan nin halipot kun paano iyan angay sa impormasyon na iaatubang.
6 An Kingdom Melodies saka an mga piano cassette kan satong mga awit marahay na mga instrumento sa pagtabang sa satong pamilya na orog na manodan an mga awit. An pagpatogtog kaini mantang may ginigibo maogmahon nanggad na paagi na kita magin mas pamilyar sa satong mga awit.
7 An Kasuratan paorootrong ipinagigirumdom sato an satong obligasyon na omawon an satong mamomoton na langitnon na Ama paagi sa awit. Gibohon niato iyan nin bilog na kalag. Sa siring makatatao kita nin nakaoogma sa pusong patotoo sa estranghero na nasa tahaw niato. Iyo, umawit kita asin kumanta kita ki Jehova, arog kan ginibo ni David kan suanoy.—Sal. 108:1-3.