Pag-aatubang kan Maogmang Bareta—Dara an mga Magasin
1 Mayo nin ibang babasahon sa kasaysayan na nagkaigwa nin epekto para sa ikararahay sa buhay nin mga tawo na arog kan An Torrengbantayan asin Magmata! An kada luwas pano nin nakabubuhay na espirituwal na kakanon. An mga bunga nin pagsiyasat na iinaatubang kaiba an masarig na suportasyon sa Kasuratan nagdodoon kan mensahe nin katotoohan sa satong isip asin puso.
2 An Torrengbantayan, paagi sa mga pahina kaiyan, nagpapaliwanag nin mga katokdoan sa Biblia asin inaapod an satong atension sa kaotoban kan mga hula sa Biblia. Dinadagka kaiyan an gabos na nagugutom sa espirituwal na liwaton an saindang isip asin isolog an bagong pagkatawo. (Roma 12:2; Efe. 4:22-24) An Magmata! pinupukaw an mga nagbabasa sa makahulogan na mga pangyayari sa kinaban. An magagayon na ilustrasyon kaiyan na nagpapaheling kan mga ngangalasan sa paglalang nakapupukaw nin interes sa bagong kinaban asin pinarararom an pag-apresyar sa Kaglalang.
BAKONG AROG NIN SEKULAR NA MGA MAGASIN
3 An sekular na mga magasin dai nagpapaliwanag sa mga tawo kun paano magkakamit nin nakakokontentong buhay sa kinaban na ini. Iyan daing paglaom na itinatao sa ngapit asin dai natotokdoan an mga tawo kun paano magkakamit nin buhay na daing katapusan. An kinabanon na mga magasin na iyan dinisenyo tanganing ipublikar an mga bagay sa kinaban. Kabaliktaran nanggad sa An Torrengbantayan asin Magmata!—1 Juan 2:15-17.
4 Daing duwa-duwa na kamo mismo nakakamate nin hararom na pagpasalamat para sa kada luwas kan An Torrengbantayan asin Magmata!—mga magasin na igwa kan hamot nin katotoohan hale sa “maimbod na mayordomo.” (Luc. 12:42) Ano daw an magigibo niato tanganing mapaoswag an satong pagwaras nin magasin asin kun siring matabangan an dakol pa na makinabang sa satong mga babasahon?
PAGGIBO KAN SATONG KABTANG
5 Bago niato madadagka nin tama an mga may sadiosan na puso na basahon an satong mga magasin, kaipuhan na maaraman niato kun ano an laog kan kada saro. Ini nangangahulogan nin pagbasa sa kada luwas bago iyan gamiton sa ministeryo. Mantang pamilyar sa mga laog, magagamit niato an pagharongharong, paghuhulit sa tinampo, asin impormal na pagpatotoo para sa pagwaras nin magasin.
6 Saro pa, paagi sa pagdara kan bagong mga magasin mantang nananaod, nakasakay sa awto o dyip, sa eskuwelahan, sa satong trabaho, o saen man kita magduman, maaaprobetsaran niato an mga oportunidad na magpatotoo. An marahay an pagkapiling introduksion sa librong Reasoning kaiba an sarong punto sa saro kan mga artikulo tibaad makapukaw sa pagmawot nin saro na basahon an satong mga magasin.
7 Dawa kun an satong pakikipag-olay halipot sana kun nag-aalok nin magasin, dai man kaipuhan na limitaran niato sa saro o duwang minuto an satong pag-oolay. Boot niatong tawan nin panahon an pagdeterminar kun baga an tawo talagang interesado sa mensahe asin kun babasahon nia an magasin. Kun minalataw an mga hapot, maninigo na permi niatong pagmaigotan na simbagon an mga hapot paagi sa paggamit sa satong Biblia o sa librong Reasoning. Paagi sa pagigin andam na idepensa an satong pagtubod, makakaani kita nin makangangalas na mga bendisyon.—1 Ped. 3:15.
8 Kun umoyon an tawo na basahon an mga magasin, puwede niatong ipaliwanag an satong trabaho asin kun paano an mga magasin na ini ipinupublikar nin duwang beses kada bulan bilang kabtang nin lakop sa kinaban na gibohon na pagtotokdo sa Biblia. An impormasyon sa pahina 2 kan An Torrengbantayan o pahina 4 kan Magmata! magayon an paliwanag kaini. Mantang an laog kan masunod na luwas perming nalilista sa Ingles, puwede kitang magpalataw nin konektadong mga hapot o apodon an atension sa masurunod na artikulo. Tibaad makapukaw ini sa gana kan tawo asin magpahiro saiya na ipahayag an pagmawot na kumua kan masunod na luwas pag-abot kaiyan. Ini puwedeng magin kapinonan nin ruta sa magasin.
9 Mantang nagrarani an katapusan kan palakaw na ini, maghidale logod kita sa pagtabang sa mga may sadiosan na puso na makadulag sa Dakulang Babilonya. (Kap. 18:4) Padagos logod na bendisyonan ni Jehova an satong todo-todong paggamit sa An Torrengbantayan asin Magmata! sa satong lakop sa kinaban na gibohon na pagtotokdo sa Biblia!