Pag-aatubang kan Maogmang Bareta—Nin Mas Epektibo Paagi sa Paghinanyog
1 Tanganing magin epektibo sa satong ministeryo, maninigo niatong akoon na daing duwang tawong magkaagid. An kada saro igwa kan saiyang personal na mga kahaditan asin eksperyensia. An angat iyo an pagpaheling sa tawong kaolay niato kun ano an kahulogan kaiyan sa saiya personalmente. Tanganing magibo ini nin epektibo, maninigo kitang maghinanyog nin atento.
2 An dakol na parahayag naggagamit nin mga hapot sa saindang introduksion, asin nakatatabang ini na ilabot an kagharong sa pag-orolay. Alagad kun magtaram an kagharong, mahalagang maghinanyog kita sa sinasabi nia. An paghinanyog nagpapaheling nin pagkamoot asin paggalang sa kataed, asin sa paggibo nin siring nagkakaigwa kita nin pakasabot sa kaisipan kan tawo. An pakaaram sa saiyang kamugtakan nagpapangyari sato na magkaigwa nin empatiya, na ibugtak an satong sadiri sa saiyang kamugtakan.
MAGIN MADALING MAKIBAGAY
3 Si apostol Pablo nagsadol: “Pag-adalan nindo kun paano an pinakamarahay na pakipag-olay sa lambang tawo na saindong manompongan.” (Col. 4:6, New English Bible) Minsan ngani dai niato aram nin patienot kun ano an eksaktong sasabihon kan indibiduwal, pamilyar kita sa mga problema na inaatubang kan mga tawo ngonyan. Kaya, puwede niatong “pag-adalan” asin magin andam na atubangon an laen-laen na situwasyon.
4 Halimbawa, tibaad nag-andam kita nin pahayag sa temang katoninongan, alagad an kagharong nagsabing nahale sia sa saiyang trabaho. Dapat daw niatong dai intindihon an komentong ini? Maliwanag na nahahadit sia dapit dian, kaya puwede kamong magkaigwa nin empatiya, na nagpapaheling nin tunay na pagmakolog sa saiyang situwasyon. Dangan maboot na giyahan an saiyang atension sa kasuratan na nagpapaheling kun paanong an gobyerno nin Dios magtatao nin nakakakontentong trabaho.—Isa. 65:17, 21, 22, 24.
5 Tibaad naaraman niato na an tawo kasuarin sana nagin biktima nin krimen o nagtios nin inhustisya. An satong may simpatiyang pagmakolog puwedeng magpalumoy sa saiyang puso, na nagpapagin posibleng ipaheling saiya na si Jehova tunay nanggad na nakaaaram kan makolog sa boot na mga problemang ini asin dai mahahaloy mahiro tanganing haleon an gabos na karatan.—Helingon an librong Reasoning, pahina 10, 12, 229-31 (pahina 11, 14, 90-3 sa Tagalog).
6 Sa pagkultibar kan marahay na gawe na magalang na paghinanyog, puwede niatong mas epektibong ikaatubang an maogmang bareta, ipaheling an daing kapasloan na interes ni Jehova sa iba, asin tabangan an iba na paoswagon an marahay na relasyon sa satong mamomoton na Kaglalang asin sa saiyang banwaan.—Sant. 1:19, g74 11/22 p. 21-3.