Pagtiripon sa Paglilingkod Para sa Pebrero
Semana nin Pebrero 10-16
5 min: Lokal na mga paisi asin Mga Paisi sa An Satong Ministeryo sa Kahadean. Siertohon na ipagirumdom sa gabos an pagtiripon kan mga nagpaplanong mag-auxiliary payunir sa Marso, Abril, asin Mayo sa Domingo, Pebrero 16.
10 min: “An Praktikal na Pamamaagi sa Pag-andam Para sa Paglilingkod sa Langtad.” Ipakipag-olay an artikulo sa mga nagdadangog, dangan apodon an tolo o apat na parahayag na patienot nang inasignaran na tumao nin espisipikong mga komento sa mga paagi na mapakikinabangan ninda an pamamaaging ini. Halimbawa, puwede nindang komentohan an manlaenlaen na presentasyon, mga paagi na puwedeng iadaptar an materyal sa lokal na teritoryo, pagigin madaling ibagay, o na an pamamaaging ini nagtotogot sa mga parahayag na pilion an materyal na hinohona nindang komportable sa pag-atubang. Pakosogon an mga parahayag na darahon an saindang kopya kan An Satong Ministeryo sa Kahadean sa mga pagtiripon bago maglingkod.
20 min: “Ipaaram sa Gabos na Harani Na an Pambilog na Kinaban na Katiwasayan.” Pakatapos nin halipot na pan-introduksion na mga komento, konsideraron an lambang transisyon asin idemonstrar an paggamit kaiyan kan nag-andam nin marhay na mga parahayag sagkod sa itinotogot kan panahon. Kun praktikal, marahay na ipademonstrar sa hoben an Transisyon Num. 2. An Transisyon Num. 3 nagpapangyari sa parahayag na magwalat nin kisuerra sarong nakaiinteres na Makakasuratan na mensahe sa isip kan kagharong. Maogmang dagkahon an mga tugang na gamiton an saro sa isinuherir na mga introduksion sa pahina 4 asin an saro sa mga transisyon na ini.
10 min: Pag-orolay sa “Abortion” hale sa librong Reasoning, pahina 25-6. Pakatapos nin halipot na introduksion, ipaheling kun paano an aborsion nababareta ngonyan asin ikinahahadit nin minilyon na tawo, iintrodusir an sarong eksena na an sarong tugang na babae nagsasagibo nin pag-adal sa Biblia. An bagong estudyante sa Biblia nagsabi sa tugang manongod sa saiyang labi-labing kahaditan huli sa pagbados. Ipinaliwanag nia kun gurano sia kahadit, mantang bakong marahay an pinansial na kamugtakan kan pamilya. An saiyang kinabanon na mga paryentes dinadagka siang magpaaborsion tolos. Isinuherir kan tugang na buksan ninda an librong Reasoning asin siyasaton sa Kasuratan kun paano minamansay ni Jehova an buhay nin dai pa namundag na aki asin kun baga kinokonsiderar niang tama an aborsion. Enot nindang kinonsiderar an kahulogan nin aborsion. Dangan pinag-olayan ninda an mga hapot, teksto, asin iba pang komento sa pahina 25-6. Maninigong tabangan kan tugang an estudyante na mangatanosan asin apresyaron an kabanalan nin buhay.
Kanta 30 asin pantapos na pamibi.
Semana nin Pebrero 17-23
10 min: Lokal na mga paisi asin Teokratikong mga Bareta. Iiba an report sa kuwenta saka an pagpasalamat sa mga ipinadarang kontribusyon.
15 min: “Mga Introduksion na Makapupukaw sa mga Kagharong na Maghinanyog.” Konsideraron sa halipot an kamugtakan kan lokal na teritoryo. Anong mga isyu an mahalaga sa mga kagharong? Magkonsentrar sa introduksion asin presentasyon na pinakaposibleng magigin mapanggana sa lokal. Ipademonstrar sa nag-andam nin marhay na parahayag an presentasyon na ini asin ialok an librong Worldwide Security, o an librong iinaalok sa saindong lokal na lenguahe. An parahayag dapat na iatubang an presentasyon siring kan sinambit sa artikulo. Dangan idemonstrar nin sarong nag-eeskuwelang hoben an iyo man sanang presentasyon asin magtapos paagi sa pag-alok nin mga magasin sa interesadong tawo. Dagkahon an gabos na probaran an paaging ini sa paglilingkod sa langtad.
20 min: Kun Paano Matatabangan kan Nagsosolong mga Magurang an Saindang mga Aki. Halipot na introduksion na susundan nin demonstrasyon nin ina asin duwang aki na nag-aandam para sa paglilingkod sa langtad. Mas dakol an pamilyang nagsosolo an magurang sa organisasyon ngonyan kisa kan enot. An paagi kan ina asin lola ni Timoteo sa pagtanom kan katotoohan sa saiya nagtao nin marahay na halimbawa na dapat sunodon nin gabos na magurang. (2 Tim. 1:5; 3:14, 15) Demonstrasyon: An ina, tin-edyer na aking babae, asin mas hoben na aking babae nagtutukaw sa lamesa sa kusina, pakapamanggi. Sinabi kan ina na bago sinda maghugas kan mga plato pag-oolayan nguna ninda an saindang mga presentasyon para sa paglilingkod asin na sia an magigin kagharong. Nagpili nin introduksion an mas hoben na aking babae hale sa pahina 4 kan An Satong Ministeryo sa Kahadean asin iinatubang iyan sa saiyang ina. Maogma siang kinomendaran kan ina huli sa marahay na ginibo asin hinagad saiyang basahon an teksto na isinuherir kan Sosyedad. Marikas na naheling kan mas ngohod na aking babae an Isaias 9:6, 7 asin binasa iyan. Dangan hinapot kan ina an mas matuang aking babae kun paano nia iaalok an libro. Pinili kan aking babae an transisyon hale sa pahina 1 kan An Satong Ministeryo sa Kahadean asin iinatubang iyan sa saiyang ina. Kinomendaran sia kan ina dangan dinagka an duwang aking babae na praktison an introduksion asin an transisyon tanganing ialok an libro sa paglilingkod sa langtad. Sinabihan an mga aking babae na magpapraktis pa sinda nin kadikit dangan maghuhugas na sinda kan mga plato. Tinapos kan magurang sa kongregasyon an kabtang paagi sa pagdagka sa gabos na pamilya sa kongregasyon na magtao nin mamomoton na tabang sa saindang mga aki.
Kanta 183 asin pantapos na pamibi.
Semana nin Peb. 24–Mar. 1
15 min: Pangengenotan nin sarong magurang an lokal na mga paisi asin kokonsideraron an lokal na mga pangangaipo. Sagkod sa itinotogot kan panahon, pag-olayan an manlaenlaen na puntong mapag-oolayan hale sa pinakabagong mga magasin. Pilion an saro na ikakokonektar nin marhay sa saro na isinuherir sa mga introduksion asin transisyon sa luwas na ini kan An Satong Ministeryo sa Kahadean. Dangan magkaigwa nin nag-andam nin marhay na parahayag na mag-aatubang nin lubos kan presentasyon na ginagamit an introduksion asin an transisyon, na nag-aalok nin mga magasin sa interesadong tawo. Itokdo na paagi sa paglabot sa mga tawo sa pag-orolay asin paggamit kan isinuherir na mga presentasyon, bakong masakit na mamidbid an interesadong mga tawo.
15 min: “Akoon an Paninimbagan sa mga Pagdalaw Liwat.” Hapot-simbagan. Maogmang dagkahon an gabos na makikabtang nin lubos sa mga pagdalaw liwat. Dagkahon an gabos na bumalik sa masunod na semana na an Pagtiripon sa Paglilingkod magkokonsiderar kun ano an sasabihon sa pagdalaw liwat.
15 min: Para sa Sako daw an Paglilingkod Bilang Payunir? Sa nasyon na ini mga 14 porsiento kan gabos na parahayag mga regular payunir. Itao an lokal na bilang para sa pagkomparar. An mas dakol daw sato, kabilang an mga hobenes na harani nang maggraduwar sa high school, puwedeng lumaog sa pambilog na panahon na paglilingkod? Interbiohon an tolong regular payunir, kun puwede sarong hoben, agom na babae, asin retirado. (Kun daing regular payunir, puwedeng gamiton an mga auxiliary payunir o mga parahayag na dati nang nagpayunir.) Konsideraron an pinansial na kamugtakan. Anong klase nin trabahong por ora an makukua sa saindong lugar? Paano nagkakaigo an saindang mga pangangaipo? Anong mga pagbabago sa paagi nin paggasto an ginibo ninda? Konsideraron an iskedyul tanganing aboton an kahagadan na oras. Igwa daw nin ano man na problema sa salud? Paano ninda iyan inaatubang? Ano pang ibang angat an saindang napangganahan? An mga interbio maninigong magin positibo asin nakapakokosog. Maogmang kaolayon an mga nagdadangog na konsideraron an personal na mga kamugtakan tanganing madeterminaran kun baga orog pa an puwedeng lumaog sa pambilog na panahon na paglilingkod.
Kanta 164 asin pantapos na pamibi.
Semana nin Marso 2-8
10 min: Lokal na mga paisi. Dagkahon an mga parahayag na mag-auxiliary payunir sa Marso asin Abril. Dagkahon an mga pamilya, siring man an hoben na mga parahayag na bakasyon sa Marso asin Abril, na aramon kun anong mga areglo an puwede nindang gibohon tanganing magkaigwa nin mas dakulang kabtang sa gibohon na paglilingkod sa langtad.
20 min: “Ano an Sasabihon Nindo Pagbalik Nindo?” Ipakipag-olay sa mga nagdadangog asin ipademonstrar sa mga parahayag na nag-andam an mga suhestion sa mga parapo mantang kinokonsiderar iyan. An haralipot na demonstrasyon na ini maninigong patienot na praktison.
15 min: “Lending Money to Fellow Christians.” Pahayag nin sarong magurang sa artikulo na hale sa Oktubre 15, 1991, na Watchtower, pahina 25-8.
Kanta 147 asin pantapos na pamibi.