Akoon an Paninimbagan sa mga Pagdalaw Liwat
1 May nagkapirang rason sa pakikabtang nin lubos sa mga pagdalaw liwat. Kun maingat kita sa pagdalaw liwat sa gabos na interesadong tawo, pagdadanayon ta an marahay na konsensia asin gigibohon nin lubos an satong ministeryo, siring kan ginibo ni Pablo.—Gibo 20:21, 24; 2 Tim. 4:5.
2 An Kaaraman Ginigibo Kitang May Paninimbagan: An katotoohan na nakataya an mga buhay maninigong magpahiro sato na magin mahigos sa mga pagdalaw liwat. (Juan 17:3) An satong kaaraman sa kaharanihan kan Armagedon maninigong magpahiro sato bako sanang sa pagpatanid sa maraot kundi siring man sa pagtabang sa mga ‘nag-aaragagha asin nag-aaragrangay huli sa gabos na makababaldeng bagay na nangyayari sa kinaban.’ (Ezeq. 9:4) Kaipuhan man na tabangan sinda na makiasosyar sa naheheling na organisasyon ni Jehova.
3 An mga tawo nangangaipo man na tabangan na masabotan nin tama an katotoohan. (Gibo 8:30, 31; 18:26) Ini an saro pang rason na bumalik kita asin ‘baribihon’ an isinabwag na mga banhi kan katotoohan. Gurano daw an satong espirituwal na pag-oswag kun bakong huling an iba paorootrong nagbalik liwat tanganing tabangan kita na mag-ako nin tamang kaaraman?—Mat. 7:12.
4 Magpaheling nin Pagkamoot Asin Kaigotan: An mga pagdalaw liwat sarong marahay na paagi tanganing ipaheling an satong pagkamoot sa mga tawo. Sarong butang tugang na naglilingkod bilang regular payunir an nagsabi: “Magpoon kan bautismohan ako, an sakong pagmawot iyo an sabihan an iba kan nanodan ko hale sa Biblia. Maogma ako na an sakong diperensia dai nakaolang sako sa paggibo kaini. . . . Nanodan ko man an pagkakaigwa nin rekord sa isip kan kada harong sa kalye, asin sa paaging ini, nahihimo kong dumalaw liwat sa mga tawong interesado sa pag-adal sa Biblia.”
5 Kun minadalaw liwat, parate kitang may oportunidad na gamiton an Biblia asin mangatanosan para sa satong paglaom. (1 Ped. 3:15) Bako sana ining nakatatabang sa kagharong kundi nagpaparigon man kan satong sadiring kaigotan asin apresasyon sa katotoohan. An mga pagdalaw liwat nagtatao nin kagayagayahan na dai makakamtan sa ibang paagi. Asin an kagayagayahan na ini puwedeng danay na maotro paagi sa satong maigot na mga pagdalaw liwat.—Tal. 10:22.
6 An banwaan ni Jehova dai ipinangunguri an marahay sa iba, asin maheheling ini sa satong pambilog na kinaban na gibohon durante kan 1991 taon nin paglilingkod. (Tal. 3:27) Nakagibo kita nin 344,926,952 na pagdalaw liwat asin nangenot sa 3,947,261 pag-adal sa Biblia sa mga harong. May 300,945 bagong mga disipulo na nagdusay kan saindang sadiri ki Jehova asin binautismohan. An makangangalas na pag-oswag na ini dai kutana nangyari kun bakong huli sa satong gikan sa boot na pag-ako kan paninimbagan sa mga pagdalaw liwat.—1 Tes. 2:8.