Ipaaram sa Gabos na Harani Na an Pambilog na Kinaban na Katiwasayan
1 Dai na mahahaloy, eestablisaron kan “Prinsipe nin Katoninongan” an tunay na katoninongan asin katiwasayan sa bilog na kinaban. An satong pagtubod sa panugang ini kan Biblia dapat na magpahiro sato na ihiras iyan sa iba. (Isa. 9:6, 7; Miq. 4:3, 4) Sa bulan nin Pebrero, mag-aalok kita nin daan na mga publikasyon siring kan iinanunsiar na kan nakaagi. An mga kongregasyon na dai kan siring na mga libro sa saindang tataramon puwedeng mag-alok kan librong Worldwide Security Under the “Prince of Peace.”
2 Sa pahina 4 kan luwas na ini kan An Satong Ministeryo sa Kahadean, nag-atubang kami nin nagkapirang introduksion na tibaad boot nindong gamiton sa ministeryo sa Pebrero. Tolong transisyon na puwedeng makatabang sa pag-alok kan librong Worldwide Security an isinuherir sa masunod na mga parapo. Puwede ining iadaptar sa ano man na libro na iaalok nindo.
3 Transisyon Num. 1: Pakatapos kan saindong introduksion, buksan an pahina 13 asin sabihon: “An Isaias 9:6, 7 kinotar hale sa Biblia sa enot na parapong ini. Togoti akong basahon iyan saindo.” Dangan maghapot: “Siisay an ‘Prinsipe nin Katoninongan’?” Pasimbagon, dangan magpadagos: “An librong ini malinaw na ipinamimidbid an ‘Prinsipe nin Katoninongan’ asin ipinaliliwanag kun paano nia pangyayarihon an katoninongan sa daga sa panahon niato. Boot daw nindong makanood nin orog pa manongod kaini?”
4 Transisyon Num. 2: Pakatapos basahon an Isaias 9:6, 7, buksan an pahina 4 asin hapoton an kagharong: “Anong matoninong na mga kamugtakan an naheheling nindo sa ilustrasyon na ini?” Pasimbagon, dangan magpadagos sa pagsabi: “May katoninongan sa pag-oltanan nin mga tawo asin katoninongan sa mga hayop. Hinohona nin iba na an mga gobyerno nin tawo an magpapangyari nin siring na katoninongan. Alagad an tunay na katoninongan asin katiwasayan siring kan ihinula sa Biblia siertong gibo nin Dios, bakong gibo nin tawo. Oyon daw kamo?” Pasimbagon, dangan basahon an parapo 4 sa pahina 5 asin ipaliwanag na sinisimbag kan librong ini an dakol na hapot manongod sa Kahadean asin sa katoninongan sa daga.
5 Transisyon Num. 3: Sa mga kamugtakan na an mga tawo may tendensiang paontokon kamo asin dai kamo togotan na tapuson an saindong presentasyon, puwede nindong gamiton an pagdolok na ini: “Puwede daw akong maghapot?” Kun umoyon an kagharong, magpadagos: “Sinabi ni Jesus na an saiyang mga parasunod magibo nin mga disipulo sa mga tawo kan gabos na nasyon. An hapot iyo ini: Dapat daw na kombertiron an bilog na kinaban bago sia mamahala bilang an ‘Prinsipe nin Katoninongan’? Ano an saindong opinyon?” Pasimbagon, dangan sabihon: “An simbag kan Biblia sa hapot na iyan manonompongan digdi sa pahina 21.” Dangan basahon an parapo 2 sa pahina 21.
6 Tibaad nagpili na kamo nin introduksion na gusto nindo hale sa pahina 4 kan An Satong Ministeryo sa Kahadean. Pakatapos na repasohon an mga transisyon sa artikulong ini, tibaad nakanompong kamo nin saro na maoogma kamong gamiton. Praktison an introduksion asin an transisyon nindo bago maglingkod sa langtad. An saindong pag-andam asin personal na kombiksion makadudugang sa saindong entusiasmo sa pag-alok kan librong Worldwide Security.