Pagpapayunir—Paglilingkod na Nagtatao nin Abundang mga Balos
1 Boot ni Jehova na kita maggayagaya asin makaheling nin karahayan para sa gabos niatong pagpapagal. (Ecl. 5:18) An pinakamahalagang gibohon na puwede niatong ayonan iyo an paghuhulit kan Kahadean asin paggibo nin mga disipulo. Sinadol ni Pablo si Timoteo: “Giboha an gibohon nin sarong paraebanghelyo, lubos na otobon an saimong ministeryo.” (2 Tim. 4:5) Para sa nagkapira, an lubos na pag-otob sa saindang ministeryo tibaad mangahulogan nin paglilingkod bilang regular payunir. Taano ta dai horophoropon na may pagngayongayo kun baga itotogot kan saindong kamugtakan na kamo lumaog sa bilog na panahon na ministeryo?
2 Kaipuhan an Positibong Paghiro: An paglaog sa pagpapayunir nangangaipo nin desididong mga paghiro kaoyon sa satong mga pamibi. Pataluboon an odok sa pusong kamawotan para sa paglilingkod ki Jehova, kaiba an pagkamoot sa mga tawo. Dugangan an saindong aktibidad sa langtad, na pinadadakol an mga pagdalaw liwat asin pag-adal sa Biblia. Pagmaigotan na magkaigwa nin praktikal na iskedyul. Humagad nin mga suhestion sa mga magurang asin payunir. Magkaigwa nin regular na rutina sa pakikikabtang sa paghuhulit. Kaipuhan an disiplina sa sadiri asin determinasyon. (1 Cor. 9:23, 25, 27) Ini an kaiba sa positibong mga ginibo kan mga nagpalista sa nakaaagi pa sanang mga bulan.
3 An pagbugtak nin depinidong mga pasohan asin maigot na paghihingoang maabot iyan magpapangyari sato na magin progresibo sa satong paghuhulit. Mapaooswag daw niato an satong mga introduksion o an pagsimbag niato sa mga pagtumang? Igwa daw kita nin progresibong inaadalan sa Biblia? Puwede daw kitang pumoon na mag-auxiliary payunir na iniisip an pagregular payunir sa ngapit? An mga pasohan dapat na praktikal asin ibugtak sono sa kaya niato.—1 Tim. 4:15, 16.
4 Sarong Kapakipakinabang na Pamumuhay: An pagpapayunir na may tamang motibo nagtatao nin dakol na pakinabang. Napatatalubo niato an orog na pagsarig ki Jehova. Napatatalubo niato an orog na abilidad sa paggamit kan Tataramon nin Dios. May ikinatataong marahay na impluwensia sa kongregasyon, asin tibaad madagka an iba na dugangan an kabtang sa ministeryo huli kan satong maigot na halimbawa. An pagpapayunir makatatabang sato na magkaigwa nin mas espirituwal na pagmansay sa buhay asin makapoprotehir sato sa kinabanon na mga ambisyon asin asosasyon.
5 Sinabihan ni Jesus an saiyang mga parasunod: “An anihon mahiwas, alagad an mga paraani kakadikit. Kaya makimaherak kamo sa Kagurangnan kan anihon na magsobol nin mga paraani sa saiyang anihon.” (Mat. 9:37, 38) An pangangaipo para sa mga paraani orog ngonyan kisa kan aldaw ni Jesus. An pagpapayunir nagtatao sato kan oportunidad na lubos na makikabtang sa apretado, nagliligtas-buhay na gibohon na ini. Mayo nin makapapantay sa pagkakontento asin satispaksion na gikan sa paggamit kan satong buhay sa bilog na panahon na paglilingkod sa satong Kaharohalangkaweng Kaglalang.—Tal. 10:22.