Puede daw Kamong Lumaog sa “Sarong Dakulang Pinto na Pasiring sa Gibohon”?
1. Anong “dakulang pinto na pasiring sa gibohon” an bukas para sa sato?
1 Kan an “sarong dakulang pinto na pasiring sa gibohon” mabukasan para ki apostol Pablo, entusiastiko niang inaprobetsaran an oportunidad na paoswagon an intereses kan Kahadean sa ibong nin kadakol na nagtutumang. (1 Cor. 16:9) Ngonyan mga 642,000 na parahayag kan Kahadean sa bilog na kinaban an naglaog sa sarong dakulang pinto nin gibohon paagi sa pagigin regular payunir.
2. Taano ta marahay na sa panapanahon pagturotimbangon niato an satong mga kamugtakan?
2 Nagbabago an mga Kamugtakan: Minsan ngani an personal na mga kamugtakan niato sa presente tibaad makalimitar sa satong magigibo, nagbabago an mga kamugtakan. Kun siring, marahay na sa panapanahon pagturotimbangon niato an sato mismong mga kamugtakan asin dai halaton an pinakamarahay na mga kamugtakan. (Ecl. 11:4) Ika daw sarong hoben na naggradwar pa sana sa haiskul? Kamo daw sarong magurang na may mga aki na maeskuela na? Kamo daw maretiro na sa saindong sekular na trabaho? An siring na mga pagbabago puedeng magtao sa saindo nin dakol na libreng panahon asin huli kaini makakalaog kamo sa paglilingkod bilang regular payunir. An sarong tugang na babae na nag-agi kaidto nin mga problema sa salud nagdesisyon na magpalista bilang payunir sa edad na 89. Taano? Mantang labi nang sarong taon na dai sia naoospital, naniniwala sia na huli sa saiyang kamugtakan sa salud ngonyan, sia makakapagpayunir.
3. Paano naggibo nin mga pagliliwat an nagkapira tanganing makapag-regular payunir?
3 Sa kamugtakan ni Pablo, enot niang plinano na dalawon an saiyang mga tugang sa Corinto. Pero, liniwat nia an saiyang mga plano para sa kapakanan kan maogmang bareta. Kinaipuhan kan dakol na regular payunir ngonyan na gumibo nin dakol na pagliliwat tanganing makapagpayunir. An nagkapira ginibong simple an saindang buhay sagkod na por ora na sanang trabaho an kaipuhan tanganing makasustento sa pinasimpleng buhay ninda. Nakaeksperyensia sinda nin dakulang kaogmahan sa saindang pribilehio nin paglilingkod. (1 Tim. 6:6-8) Naggibo nin mga pagliliwat an nagkapirang mag-agom tanganing an agom na lalaki na sana an magtrabaho, na huli kaini makakapagpayunir an agom na babae.
4. Ano an puede niatong gibohon kun dai kita segurado na maaabot niato an kahagadan na oras?
4 Dai tolos nindo paghaboan an pagpapayunir huli ta nahahandal kamo na dai nindo maaabot an kahagadan na oras. Labi-labi sanang duwang oras kada aldaw an kaipuhan. Kun dai kamo segurado na magigibo nindo iyan, probaran na mag-auxiliary payunir nin saro o duwang bulan na may personal na pasohan na 70 oras. Totogotan kamo kaini na maeksperyensiahan an mga kagayagayahan nin pagpapayunir. (Sal. 34:8) Kaolayon an mga nagpapayunir sa presente. Tibaad an mga kadepisilan na napangganahan ninda pareho kan inaagihan nindo. (Tal. 15:22) Hagadon ki Jehova na logod bendisyonan an saindong mga paghihingoa na pahiwason an saindong ministeryo.—1 Juan 5:14.
5. Taano ta sarong kapakipakinabang na gibohon an pagigin regular payunir?
5 Sarong Kapakipakinabang na Gibohon: An paglilingkod bilang regular payunir nagbubunga nin dakol na bendisyon. Tinotogotan kamo kaiyan na maeksperyensiahan an orog na kaogmahan na bunga nin orog na pagtatao. (Gibo 20:35) An pagpapayunir mapaoswag kan saindong kakayahan na gamiton an Tataramon nin Dios nin katotoohan sa tamang paagi. (2 Tim. 2:15) Matao iyan sa saindo nin dugang pang mga oportunidad na maheling an kamot ni Jehova na naghihiro para sa saindong kapakanan. (Gibo 11:21; Fil. 4:11-13) An pagpapayunir matabang man sa saindo na mapatalubo an espirituwal na mga kualidad, arog nin pakatagal, asin magpapangyari iyan sa saindo na magin mas dayupot ki Jehova. (Sant. 4:8) Puede daw kamong lumaog sa dakulang pinto na ini nin gibohon asin magin regular payunir?