Katoninongan Asin Katiwasayan—Sarong Paglaom na Masasarigan
1 An kadaklan na tawo ngonyan nagmamawot nin katoninongan asin katiwasayan. Alagad ta an tunay na katoninongan asin katiwasayan dai pa nakamtan sa kinaban na ini. Minilyon an nag-iistar sa mga lugar na linaglag nin guerra. An iba nabubuhay na takot sa mga terorista o pagraralaban nin mga gerilya. Dakol an takot na lumuwas kun banggi huli sa krimen sa mga lansangan.
2 Kan nakaaging taon kan ialok niato an librong True Peace and Security, dakol an ikinawaras sa mga tawo. Iyo, nagugustohan nin mga tawo an mensahe manongod sa katoninongan. Bilang mga Kristiano kinukuyog niato an pagboot ni Jesus: “Saen man kamo magsakat sa sarong harong magsabi nguna kamo, ‘Magkaigwa logod nin katoninongan an harong na ini.’ Asin kun an katood nin katoninongan yaon dian, an saindong katoninongan mapapasaiya. Alagad kun mayo, iyan mabuwelta sa saindo.” (Luc. 10:5, 6) Bilang mga representante kan Dios nin katoninongan, dinodolok niato an mga tawo sa matoninong na paagi.
MGA HALIMBAWA BILANG MGA NAGHAHANAP NIN KATONINONGAN
3 Siyempre, an banwaan ni Jehova dapat na mamuhay nin matoninong sa saindang mga komunidad asin kongregasyon tanganing ikarekomendar an matoninong na mensahe. Kaipuhan na kita magin mga halimbawa bilang mga tawong naghahanap nin katoninongan. Si Pedro nagsabi na an mga Kristiano maninigo na “sa katapustapusi makua niang daing digta asin dai nin kanawayan patin nasa katoninongan.” (2 Ped. 3:14) Paano niato ini ginigibo?
4 Enot, pinapagdadanay niato an matoninong na relasyon ki Jehova, an Dios nin katoninongan. Minimidbid niato an saiyang autoridad, asin kinukuyog niato an saiyang mga pagboot. (Sal. 34:14) An katoninongan, na sarong bunga kan saiyang espiritu, dapat na mahayag sa satong buhay.—Gal. 5:22.
5 Kaiba sa halimbawa niato bilang mga parahanap nin katoninongan an paggalang sa mga autoridad nin tawo. Kaiba digdi an mga may autoridad sa gobyerno, maestro, among, magurang, asin kamagurangan. (Roma 13:1, 2; Col. 3:22; Efe. 6:1; Heb. 13:17) Paagi sa pamumuhay nin trangkilo asin matoninong sinasamnohan niato an satong mensahe. Ipinaheheling niato na boot niatong “sunodon an mga bagay na nagpapatoninong asin an mga bagay na nagpapakosog sa lambang saro.” (Roma 14:19) Para sa sato, an katoninongan asin katiwasayan sa sarong bagong kinaban seguradong paglaom.
AN PRESENTENG ALOK NAGPAPAOSWAG NIN KATONINONGAN
6 Ngonyan na Nobyembre ihihiras niato an satong paglaom paagi sa pag-alok kan librong True Peace and Security kaiba an New World Translation. Mantang an katoninongan asin katiwasayan nasa isip nin mga tawo ngonyan, napapanahon nanggad an alok na ini.
7 An enot na duwang kapitulo kan libro igwa nin ekselenteng mga punto na puwedeng ipakipag-olay. Tibaad boot nindong basahon an enot na duwang parapo sa pahina 5. O puwede nindong bukasan sa parapo 11 sa pahina 8, na dian ipinaheheling an pagkakalaen kan seguradong mga panuga nin Dios sa ipinanunuga nin mga namomoon na tawo. Helingon man an parapo 28 asin 29 sa pahina 20 asin 21. Siertohon na balikan an gabos na nagpaheling nin interes, na hinihingoang makapoon nin pag-adal sa Biblia.
8 Ipagpadagos niato an pagsabi sa mga tawo manongod sa masasarigan nanggad na paglaom na iginagarantiya ni Jehova, an Dios nin katoninongan, na itinotokdo sa sainda kun paano iyan gigibohon paagi sa Kahadean sa kamot kan Prinsipe nin Katoninongan. (Isa. 9:6, 7) An satuya logod na halimbawa sa matoninong na pamumuhay magrekomendar sa sato bilang an mga ‘naghahanap nin katoninongan asin naggigibo kaiyan.’—1 Ped. 3:10, 11.