Ibalangibog an Tunay na Katoninongan Asin Katiwasayan
1 An tunay na katoninongan asin katiwasayan mahale sana sa sarong paghahalean, si Jehova Dios. Ipinaaram sato ni Miqueas na si Jehova “maghohokom sa tahaw nin dakol na nasyon, asin magtatanos kan mga bagay mapadapit sa makokosog na nasyon.” An resulta? “Dai sinda mabingat nin minasbad, an nasyon tumang sa nasyon, ni mag-aadal pa man sinda sa pakilaban.”—Miq. 4:3.
2 Mantang si Jehova sana an paghahalean nin tunay na katoninongan, an mga tawo kaipuhan na “magturukad sa bukid ni Jehova” asin matokdoan mapadapit sa saiyang mga dalan tanganing magralakaw sa saiyang mga dana. (Miq. 4:2) Manonodan ninda na si Jehova magpapangyari nin tunay na katoninongan sa dagang ini paagi kan saiyang Kahadean. Alagad paano niato matatabangan an orog pang mga tawo na makanood manongod sa Paghahalean nin tunay na katoninongan asin katiwasayan?
IWARAS AN DAAN NA MGA LIBRO
3 Sa Enero asin Pebrero magwawaras kita kan daan na mga publikasyon. Ini gabos naglalaman nin napapanahon na impormasyon para sa mga nagmamawot na “magturukad sa bukid ni Jehova.” Sarong doktor an nag-ako nin kopya kan librong True Peace and Security asin ibinugtak iyan sa lalagan nin mga libro na dai binasa iyan. Dai naghaloy nagirumdoman kan saiyang agom an libro asin binasa iyan. Nakombensir sia na idto an katotoohan asin nagpoon na mag-adal. Ngonyan sia asin an saiyang agom bautisado na, asin an saindang mga aki naghuhulit na. Ini nagpapaheling kan kahalagahan kan pagwaras kan satong mga publikasyon sa pinakadakol na harong sagkod sa posible.
4 Maninigong kabilang sa satong pag-andam para sa paglilingkod sa langtad an pagrepaso sa mga laog asin mga kapitulo kan libro na makaaakit sa mga tawo. Puwede kitang pumili nin espisipikong mga punto hale sa libro na magagamit sa pakikipag-olay sa mga kagharong.
5 Halimbawa, an satong bagong Topikong Mapag-oolayan na “An Dios Magpapangyari nin Katoninongan sa Dai na Mahahaloy.” An gabos na publikasyon na satong iinaalok may mga puntong ipakikipag-olay o mga ilustrasyon na magagamit nindo sa temang ini. Sa librong Worldwide Security magagamit nindo an ilustrasyon sa pahina 172 asin 173. Sa librong True Peace magagamit nindo an ilustrasyon sa pahina 98. Sa librong Good News to Make You Happy magagamit nindo an ilustrasyon sa pahina 157. An Kapitulo 12 kan librong Katotoohan asin an Kapitulo 16 kan librong Happiness may marahay na mga punto manongod sa paagi nin Dios sa pagpangyari nin katoninongan. Gamiton ini nin marhay asin magin positibo sa pag-aatubang kan presenteng alok sa Enero asin Pebrero.
6 Pakapahelinga sa kagharong kan saro o duwang punto sa libro, puwede nindong hapoton sia kun boot niang konsideraron an ibang punto sa masunod na pirang parapo. Sa paaging ini, puwedeng maponan tolos an pag-adal sa Biblia. Dai maghaloy sa okasyon na ini, kundi gumibo nin areglo na magbalik liwat tanganing ipadagos an pag-orolay sa ibang panahon.
7 An panahon nauubos na para sa mga tawo tanganing magkaigwa nin oportunidad na domolok sa tunay na Paghahalean nin katoninongan asin katiwasayan. Logod gibohon niato an satong mahihimo sa Enero asin Pebrero tanganing ibalangibog an mensahe nin katoninongan sa dakol na matanos an puso sa teritoryo kan satong kongregasyon.