Pagpaheling nin Pagsuportar sa mga Payunir
1 An banwaan nin Dios midbid sa saindang maigot na kabtang sa ministeryo. Minsan ngani bakong gabos makapagpapayunir, maninigo kitang maghingoa na pataluboon an espiritu nin pagpapayunir. Naggagayagaya kita kaiba kan dakol na nakahihimong lumaog sa pagpapayunir.
2 An pagigin asin pagdadanay na payunir dakulang bagay. An mga payunir nagsasaabaga nin dakulang kabtang kan paghuhulit asin pagtotokdo. Ini nagkakaipo nin dakulang paghihingoa asin sakripisyo. Paano makasusuportar asin makapakokosog an iba sa mahigos na pambilog na panahon na mga lingkod na ini?
3 Kun Ano an Magigibo: Kaipuhan nin mga payunir an pagsuportar kan kamagurangan. Dakulang pagpakosog an ikinatatao kun iniibanan kan kamagurangan an mga payunir. An dakol na magurang naghihingoang ibanan an kada payunir sa kongregasyon kisuerra sarong beses kada taon. Siring man, bobooton nin kamagurangan na siertohon na may bastanteng teritoryo an mga grupo. Puwedeng mag-iskedyul nin dugang pang pagtiripon bago maglingkod sa mga hapon o banggi tanganing matawan nin lugar an iskedyul kan mga payunir. Ini nangorognang totoo sa mga bulan na dakol an auxiliary payunir.—Isa. 40:11.
4 An ministeryal na mga lingkod nasa marahay na kamugtakan na tumabang sa mga payunir paagi sa pagsuportar sainda sa ministeryo asin sa maimbod na pag-asikaso sa mga areglo kan kongregasyon. Inaapresyar nin mga payunir na tugang na babae kun an mga tugang na lalaki nangengenot sa pag-organisar sa mga grupo sa paglilingkod sa langtad. Puwedeng siertohon kan mga nagkakapot kan literatura asin magasin na may bastanteng suplay.
5 Makatatabang an Gabos: Makatatabang an mga parahayag paagi sa pag-areglo na mas parateng umiba sa mga payunir. Ikinaoogma nin mga payunir an pakikiiba asin pagsuportar kan ibang parahayag. Tibaad ikaaareglo nindong umiba sa mga payunir sarong beses sa semana o duwang beses sa laog kan bulan. Puwede man na hirasan nin materyal na mga bagay an mga payunir, asin pinasasalamatan na gayo ninda an pagkamatinaong ini.—Fil. 4:14-19.
6 Dakula an magigibo nin mga pamilya sa pagtabang sa mga miembro ninda na nagpapayunir. Sa parate, puwedeng maareglar an mga trabaho sa harong tanganing matogotan an saro o labi pang miembro kan pamilya na magpayunir. An sarong tugang na babae na may tolong aki nagtatrabaho nin duwang aldaw sa laog kan semana. An mga aki niang lalaki nagtatabang paagi sa pag-asikaso sa pagsaod asin pagtrabaho sa harong. An aking babae nagtatabang sa paglinig asin pagluto. Poon kan sia maggraduwar, nagpoon naman siang magpayunir, na nakikisarusalida sa saiyang ina sa pagtrabaho. An siring na kooperasyon sa laog kan pamilya nagpapangyari sa mas dakol na magpayunir asin nagtatao nin mga bendisyon sa pamilya.
7 An maimbod na mga payunir nagigin bendisyon sa kongregasyon sa dakol na paagi. An saindang kaigotan asin halimbawa nakadadagka sa dakol na gumibo nin orog pa sa paglilingkod. Tunay na maninigo niatong mawoton na gibohon an kaya niato sa pagsuportar sa sainda. An siring na sararong paghihingoa nagtatao nin kagayagayahan sa gabos asin nagbubunga nin pag-omaw ki Jehova.