Hapot
◼ Paano maninigong mansayon an paglilingkod bilang auxiliary payunir?
Maninigong mansayon an pag-o-auxiliary payunir kapwa bilang sarong pribilehiyo asin sarong magabat na paninimbagan. Manampulong ribo kan parahayag kada bulan an ninonombrahan na maglingkod bilang auxiliary payunir, asin an iba dagos-dagos. Kinokomendaran mi an maigot na mga parahayag na ini na an mga kamugtakan nagtotogot sainda na gamiton an kahagadan na 60 oras sa paglilingkod sa langtad kada bulan na naglilingkod sinda bilang auxiliary payunir. An mga magurang siring man an iba maninigong pakosogon an mga parahayag na nagpapalista para sa paglilingkod bilang auxiliary payunir na akoon nin odok sa boot an saindang nombramiento asin likayan an ano man na tendensia na magin kaswal.
Kapareho nin mga regular payunir, an mga nagboboluntaryo bilang auxiliary payunir sa laog nin saro o dakol na bulan kaipuhan nguna na magkuwenta kan gastos. (Luc. 14:28) Kabale digdi an pagdeterminar nin patienot kun baga rasonable nindang malalaoman na gamiton an kahagadan na oras sa ministeryo sa langtad na dai pinababayaan an ibang Kristianong paninimbagan. An desisyon nin saro na magpalista bilang auxiliary payunir kaipuhan na gibohon pakatapos nin mapagngayongayong pagkonsiderar sa saiyang personal na mga kamugtakan. Iyan dai maninigong pahiroon nin mga emosyon na napukaw huli ta an iba nagpapalista. Iyan kaipuhan na sarong pinag-isipan na desisyon, kaibanan an paggibo nin nasusurat na iskedyul tanganing maotob an mga kahagadan. Mahalagang basahon nin maingat an aplikasyon asin magdesisyon an saro sa sadiring puso na kaya niang sadiosan na sumimbag nin iyo sa kun ano an hinahagad.
Siyempre, kabale an ekstrang paghihingoa. An pirang bulan kan taon angay na marhay sa pagigin “masibot na gayo” sa paghuhulit kan maogmang bareta. (Gibo 18:5) Kabale digdi an panahon nin Memorial na Marso, Abril, asin Mayo asin an mga bulan kun nagdadalaw sa kongregasyon an paraataman sa sirkito. Kadakol na parahayag an maogmang dinidisiplina an saindang sadiri na sunodon an medyo estriktong iskedyul tanganing magkaigwa nin ekstrang pakikakabtang sa paghuhulit durante kan mga panahon na ini nin espesyal na aktibidad, na nakasasabot na mayaman na mga bendisyon an parateng ibinubunga. (2 Cor. 9:6) An dakol na parahayag minagibo nin espesyal na mga paghihingoa na makapayunir durante kan mga bulan nin bakasyon asin arin man na bulan kan taon na igwa nin limang Sabado asin Domingo. Alagad kun nagpapalista, nasasabotan ninda an pangangaipo na mangapot sa prinsipyo na ‘An saindong Iyo mani Iyo’ paagi sa paggibo kan saindang pinakamakakaya na magreport nin 60 o labi pang oras kada bulan na sinda naglilingkod bilang auxiliary payunir.—Mat. 5:37.
An mga parahayag na tibaad dai kayang magpayunir puwedeng makatabang paagi sa pagigin andam na umiba sa mga auxiliary payunir, na iinaareglo an depinidong mga pakikiibanan sa sainda. Nakatatabang na gayo na maglingkod nin mas halawig kaibanan nin mga payunir kun posible. Nangorognang pahahalagahan nin mga payunir an pagkakaigwa nin suporta kan ibang parahayag kun amay na aga, bago bumanggi, o amay na mga oras nin banggi. Naoogma an mga auxiliary payunir na imbitaran na makaibanan nin iba sa mga pagdalaw liwat asin pagpopoon nin mga pag-adal sa Biblia sa harong. An mga puwedeng sumuportar sa mga auxiliary payunir sa mga paaging ini seguradong mag-aani kan mas dakulang kaogmahan na minagikan sa pagtatao.—Gibo 20:35.
An kahigosan kan kadakol na auxiliary payunir biyong pinahahalagahan. An mga nahimong makaiba sa sainda makalalaom sa mayaman na mga bendisyon. (Tal. 10:4) Noarin daw kamo otrong makikakabtang sa mga kagayagayahan nin dinugangan na aktibidad bilang auxiliary payunir?