An Pagtotokdo nin Dios May Makosog na Impluwensia
1 Dakulaon an pribilehiyo niato na umako nin pagtotokdo sa Banal na Saro, an satong Kaglalang, si Jehova Dios! (Sal. 50:1; Isa. 30:20b) Hale sa gabos na nasyon ngonyan, kadakoldakol an nagtutukad sa saiyang bukid nin dalisay na pagsamba tanganing matokdoan nia. (Miq. 4:2) Minilyon pang iba an minalaog sa mga eskuwelahan na nag-oomaw sa kinabanon na kadonongan. Alagad an kadonongan na iniignoro si Jehova asin an saiyang nasusurat na Tataramon mangmang sa pagheling nin Dios.—Sal. 14:1; 1 Cor. 1:25.
2 Epekto sa Kristianong Pamumuhay: An pagtotokdo nin Dios nakakatabang sato na moldehon an satong konsensia. An lambang saro namundag na may konsensia, pero tanganing magiyahan kita kaiyan sa dalan nin katanosan, kaipuhan iyan na sanayon. (Sal. 19:7, 8; Roma 2:15) An mga tawo sa kinaban dai minolde an saindang kaisipan sono sa Tataramon nin Dios, asin huli sa dahelan na iyan sinda nariribaraw asin bakong segurado sa kun ano an tama asin kun ano an sala. Naglalakop an mga kontrobersia manongod sa moral na mga isyu huli ta an kada saro nag-iinsister sa paggibo kan tama sa saiyang sadiring mga mata. Gusto kan mayoriya an lubos na katalingkasan sa pagdesisyon sa saindang sadiring pamumuhay. Nagsasayuma sindang hinanyogon an solamenteng ginigikanan nin tunay na kadonongan. (Sal. 111:10; Jer. 8:9; Dan. 2:21) Alagad naresolberan na kan pagtotokdo nin Dios an isyung iyan para sa sato, asin kita nagdadanay na sararo bilang pamilya nin Dios huli ta tinotokdoan nia kita. May pagsarig kitang inaatubang an ngapit na may marahay na konsensia, na nagdadanay na sibot sa satong ministeryo.
3 Tinatabangan kita kan pagtotokdo nin Dios na labanan an “lambang doros nin katokdoan.” (Efe. 4:14) Dai kita naghahanga sa pag-adal nin pilosopiya, na ginigibo an mga tawo na magin paratatsar asin paraduda, nag-aanimar nin pagpili kun ano an gusto, asin naggigiya sa moral na kalapaan. Naoogma kita na matokdoan ni Jehova, asin sa siring nalilikayan niato an kamondoan asin kolog nin boot na naeeksperyensiahan nin dakol. An mga pagboot asin pagirumdom ni Jehova siring sa ‘tataramon sa likod niato,’ na nagsasabing: “Iyo ini an dalan. Maglakaw dian, kamo banwaan.”—Isa. 30:21.
4 An Satong mga Pagtiripon Asin Ministeryo: Sinasabot niato an Hebreo 10:23-25 na pagboot gikan sa Dios. Sa mga pagtiripon kan kongregasyon, tinotokdoan kita ni Jehova. Ugale daw niatong perming magin presente sa mga pagtiripon, o hihiheling daw niato na kadikiton an importansia kan pag-atender sa pagtiripon? Girumdoma, an pag-iribanan sa pagtiripon kabtang nin satong pagsamba. Dai iyan maninigong ibilang na opsional. Dai niato kayang palihison an ano man na kabtang kan programa nin espirituwal na pagpapakakan na inandam ni Jehova para sa sato.
5 Si Moises namibi sa Dios: “Tokdoi kami kun paano bibilangon an samuyang mga aldaw sa paagi na magkamit kami nin puso na may kadonongan.” (Sal. 90:12) Iyo man daw ini an satong pamibi? Inaapresyar daw niato an kada mahalagang aldaw? Kun iyo, kun siring ‘magkakamit kita nin puso na may kadonongan’ paagi sa paggamit sa kada aldaw sa kapakipakinabang na paagi, sa ikamumuraway kan satong Kaharohalangkaweng Paratokdo, si Jehova Dios. Tatabangan kita kan pagtotokdo nin Dios na gibohon iyan.