Kamtan an mga Pakinabang sa Banal na Pagtotokdo
“Ako, si Jehova, an saimong Dios, an Saro na nagtotokdo saimo na pakinabangon an saimong sadiri.”—ISAIAS 48:17.
1. Ano an magigin kamugtakan niato kun iaaplikar ta an banal na pagtotokdo sa satuyang buhay?
SI Jehova Dios nakakaaram kan pinakamarahay. Mayo nin siisay man na nakalalabi sa saiya sa kaisipan, tataramon, o gibo. Bilang satuyang Kaglalang, aram nia an satong mga pangangaipo asin abundang itinatao iyan. Tunay na aram nia kun paano kita totokdoan. Asin kun iaaplikar niato an banal na pagtotokdo, kita makikinabang asin magkakamit nin tunay na kaogmahan.
2, 3. (a) Paano kutana nakinabang an suanoy na banwaan nin Dios kun saindang kinuyog an saiyang mga togon? (b) Ano an mangyayari kun iaaplikar ta an banal na pagtotokdo sa satong buhay ngonyan?
2 Ihinahayag kan banal na pagtotokdo an odok na pagmawot nin Dios na an saiyang mga lingkod makalikay sa kalamidad asin mag-ogma sa buhay paagi sa pagsunod sa saiyang mga pagboot asin prinsipyo. Kun an suanoy na banwaan ni Jehova nagdangog sana sa saiya, nakamtan kutana ninda an mayaman na mga bendisyon, huli ta sinabihan nia sinda: “Ako, si Jehova, an saimong Dios, an Saro na nagtotokdo saimo na pakinabangon an saimong sadiri, an Saro na nagpapangyari saimo na maglakaw sa dalan na maninigo mong lakawan. O kun dadangogon mo sana kutana an sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.”—Isaias 48:17, 18.
3 An suanoy na banwaan nin Dios nakinabang kutana kun dinangog ninda an saiyang mga togon asin instruksion. Imbes na mag-agi nin kasakitan sa mga kamot kan mga Babilonyo, nakamtan kutana ninda an katoninongan asin prosperidad na arog kapano, kahararom, asin kadaing sagkod kan salog. Dugang pa, an saindang matanos na mga gibo nagin kutana arog kadai mabilang kan mga alon nin dagat. Kaagid kaiyan, kun iaaplikar niato an banal na pagtotokdo sa satong buhay, puwede tang kamtan an dakol na pakinabang dian. Ano an pira sa mga ini?
Binabakle Kaiyan an Buhay
4. Paano an banal na pagtotokdo nakaapektar sa buhay nin dakol na tawo?
4 An banal na pagtotokdo napapakinabangan na nin dakol na tawo paagi sa pagbakle kan saindang buhay. An mga iinaaplikar an pagtotokdo ni Jehova binabayaan an “mga gibo nin laman,” arog nin malaswang gawe, idolatriya, espiritismo, iriwal, asin pangimon. Imbes, ipinaheheling ninda an mga bunga kan espiritu na pagkamoot, kaogmahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri. (Galacia 5:19-23) Hinihimate man ninda an hatol kan Efeso 4:17-24, na dian sinasadol ni apostol Pablo an mga kapagtubod na dai maglakaw nin siring sa paglakaw kan mga nasyon, sa pagigin daing kamanungdanan kan saindang isip asin sa kadikloman sa isip, na suhay sa buhay na gikan sa Dios. Huling dai nagigiyahan nin matagas na puso, an arog-Cristong mga tawo ‘hinale an daan na pagkatawo na oyon sa dati nindang paggawe asin binago sa puwersa na nagpapahiro kan saindang isip.’ Sinda ‘nagsolog kan bagong pagkatawo na linalang oyon sa kabotan nin Dios sa tunay na katanosan asin kaimbodan.’
5. Paano an banal na pagtotokdo nakaaapektar sa paglakaw nin mga tawo?
5 An sarong marahay na pakinabang sa pag-aplikar kan banal na pagtotokdo iyo na ipinaheheling kaiyan sato kun paano lumakaw kaiba nin Dios. Kun malakaw kita kaiba ni Jehova, arog kan ginibo ni Noe, susunodon niato an dalan nin buhay na isinabi kan satuyang Kaharohalangkaweng Paratokdo. (Genesis 6:9; Isaias 30:20, 21) An mga tawo kan mga nasyon “naglalakaw sa pagigin daing kamanungdanan kan saindang isip,” arog kan sabi ni apostol Pablo. Asin an nagkapirang isinurat kan mga isip na iyan kanigoan nanggad kadaing kamanungdanan! Sa pagrisa kan mga surat-surat nin iba sa sarong lanob sa Pompeii, an sarong paramasid mismo nagsurat: “Makangangalas nanggad, O lanob, na dai ka pa narurumpag sa gabat kan kadakol na nakasurat na kalokohan.” Alagad mayo nin kalokohan sa “katokdoan ni Jehova” asin sa paghuhulit kan Kahadean na pinapangyari kaiyan. (Gibo 13:12) Paagi sa gibohon na iyan, an mga tawong namomoot sa katotoohan naulian sa toltol na pag-isip. Tinokdoan sinda kun paano umontok sa paglakaw sa saindang makasalan na dalan, na ignorante dapit sa mga katuyohan nin Dios. Mayo na sinda sa kadikloman sa isip, ni minomotibar pa man nin matagas na puso na naghahanap nin daing kamanungdanan na mga pasohan.
6. Ano an koneksion kan satong pagkuyog sa katokdoan ni Jehova asin kan satong kaogmahan?
6 Nakikinabang man kita sa banal na pagtotokdo sa paagi na ipinapamidbid kaiyan sa sato si Jehova asin an saiyang mga gibo. An siring na kaaraman irinarani kita sa Dios, pinaoorog an satong pagkamoot sa saiya, asin pinakokosog an satong pagmawot na kuyogon sia. An sabi kan 1 Juan 5:3: “Ini iyo an boot sabihon kan pagkamoot sa Dios, na kuyogon niato an saiyang mga kapagbootan; asin an saiyang mga kapagbootan bakong magabat.” Sinusunod man niato an mga katogonan ni Jesus huli ta aram niato na an saiyang katokdoan gikan sa Dios. (Juan 7:16-18) An siring na pagkamakinuyog iniingatan kita sa espirituwal na peligro asin pinaooswag an satong kaogmahan.
Sarong Tunay na Katuyohan sa Buhay
7, 8. (a) Paano niato sasaboton an Salmo 90:12? (b) Paano kita magkakamit nin puso na may kadonongan?
7 An pagtotokdo ni Jehova kapakipakinabang sa pagpaheling sato kun paano gagamiton an satong buhay sa makatuyohan na paagi. Sa katunayan, ipinaheheling sato kan banal na pagtotokdo kun paano bibilangon an satong mga aldaw sa espesyal na paagi. An lawig nin buhay na 70 taon nanunuga nin mga 25,550 aldaw. An sarong tawo na 50 anyos ginamit na an 18,250 kaiyan, asin an linalaoman na natatada pa niang 7,300 na aldaw garo baga talagang kadikit na sana. Sa panahon na iyan nangorognang mas lubos niang masasabotan kun taano si propeta Moises ta namibi sa Dios sa Salmo 90:12: “Tokdoi kami kun paano bibilangon an samuyang mga aldaw sa paagi na magkamit kami nin puso na may kadonongan.” Pero ano an boot sabihon kaiyan ni Moises?
8 Dai boot sabihon ni Moises na ihahayag nin Dios an magigin eksaktong bilang nin mga aldaw sa buhay nin lambang Israelita. Sono sa Salmo 90, bersikulo 9 asin 10, minidbid kan Hebreong propeta na iyan na an lawig nin buhay puwedeng magin mga 70 o 80 taon—halipot nanggad. Kaya an mga tataramon sa Salmo 90:12 malinaw na ipinahayag an mapagngayongayong pagmawot ni Moises na si Jehova ipaheling, o itokdo, sa saiya asin sa Saiyang banwaan an paggamit nin kadonongan sa pagpahalaga sa ‘mga aldaw nin saindang mga taon’ asin sa paggamit kaiyan sa paaging inooyonan nin Dios. Bueno, kun siring, kumusta man kita? Inaapresyar daw niato an kada aldaw? Nagkakamit daw kita nin puso na may kadonongan paagi sa paghihingoang gamiton an kada aldaw sa kapakipakinabang na paagi sa ikamumuraway kan satuyang Kaharohalangkaweng Paratokdo, si Jehova Dios? Tinatabangan kita kan banal na pagtotokdo na gibohon iyan mismo.
9. Ano an puwedeng laoman kun manonodan niatong bilangon an satong mga aldaw sa ikamumuraway ni Jehova?
9 Kun makakanood kitang bilangon an satong mga aldaw sa ikamumuraway ni Jehova, puwedeng dagos-dagos na kita sa pagbilang, huli ta an banal na pagtotokdo nagtatao nin kaaraman para sa buhay na daing sagkod. “Ini nangangahulogan nin buhay na daing katapusan,” an sabi ni Jesus, “an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Siyempre, kun nakamit niato an gabos na makukuang kinabanon na kaaraman, dai iyan magtatao sato nin buhay na daing sagkod. Pero mapapasato an buhay na daing katapusan kun satong kamtan asin iaaplikar an tamang kaaraman dapit sa duwang pinakaimportanteng persona sa uniberso asin tunay na gumibo nin pagtubod.
10. Ano an sinasabi nin sarong ensiklopedya manongod sa edukasyon, asin paano iyan ikakakomparar sa mga pakinabang nin banal na pagtotokdo?
10 Gurano man kita kahalawig nang nabuhay, girumdomon niato an risang pakinabang na ini nin banal na pagtotokdo: Tinatawan kaiyan nin tunay na katuyohan sa buhay an mga nag-aaplikar kaiyan. An The World Book Encyclopedia nagsasabi: “An edukasyon maninigong tumabang sa mga tawo na magin kapakipakinabang na mga miembro nin sosyedad. Maninigong tabangan man sinda kaiyan na magpatalubo nin apresasyon sa saindang mana sa kultura asin magkaigwa nin mas nakakokontentong buhay.” An banal na pagtotokdo kapakipakinabang sa pagtabang sato na magkaigwa nin nakakokontentong buhay. Pinatatalubo kaiyan sa sato an odok na pag-apresyar sa espirituwal na mana niato bilang banwaan nin Dios. Asin ginigibo nanggad kita kaiyan na magin kapakipakinabang na mga miembro nin sosyedad, huli ta pinapangyayari kita kaiyan na otobon an sarong mahalagang kabtang sa pagpanigo sa mga pangangaipo nin mga tawo sa bilog na daga. Taano ta masasabi iyan?
Pankinaban na Programa nin Pagtotokdo
11. Paano itinampok ni Thomas Jefferson an pangangaipo para sa tamang edukasyon?
11 Bakong arog nin ano pa man na programa nin pagtotokdo, an banal na pagtotokdo pinapanigoan an mga pangangaipo sa edukasyon kan mga tawo. An pangangaipong tokdoan an mga tawo narisa ni Thomas Jefferson, na nagin ikatolong presidente kan Estados Unidos. Sa sarong surat kan Agosto 13, 1786, ki George Wythe, sarong katood asin kaibang nagpirma sa Deklarasyon nin Independensia, si Jefferson nagsurat: “Sa paghona ko an pinakaimportanteng ley sa bilog niatong kodigo iyo an ley para sa pagpalakop nin kaaraman sa mga tawo. Mayo nang iba pang seguradong pasisikadan na magigibo, para sa pagpreserbar nin katalingkasan asin kaogmahan. . . . Ihulit mo po, namomotan kong katood, an sarong krusada tumang sa pagkaignorante; establisaron asin pakarhayon an ley sa pag-edukar sa ordinaryong mga tawo. Ipaaram sa satong mga namamanwaan . . . na an buhis na ibabayad para sa [edukasyon] dai malabi sa ikasangribong kabtang kan ibabayad sa mga hade, padi, asin mahal na mga tawo na matindog sa tahaw niato kun satong pababayaan na ignorante an mga tawo.”
12. Taano ta masasabi na an banal na pagtotokdo iyo an pinakamapanggana asin pinakakapakipakinabang na programa para sa panglobong edukasyon?
12 Imbes na pabayaan na ignorante an may matanos na pusong mga tawo, an pagtotokdo ni Jehova nagtatao kan pinakamarahay na programa para sa panglobong edukasyon para sa saindang kapakinabangan. Mantang nanraraot pa an Guerra Mundial II kan 50 taon na an nakaagi, an Committee on Educational Reconstruction sa E.U. naheling an apuradong pangangaipo para sa “panglobong edukasyon.” Yaon pa sagkod ngonyan an pangangaipong iyan, pero an banal na pagtotokdo iyo an solamenteng mapangganang programa para sa panglobong edukasyon. Iyan man an pinakakapakipakinabang huli ta binubuhat kaiyan an mga tawo hale sa pagkadesesperar, pinakokosog sinda sa moral asin espirituwal, iliniligtas sinda sa kapalangkawan asin pagpalaenlaen kan kinaban, asin itinatao an kaaraman para sa buhay na daing sagkod. Orog sa gabos, an programang ini napakikinabangan nin mga tawo sa gabos na lugar paagi sa pagtotokdo sainda na maglingkod ki Jehova Dios.
13. Paano an Isaias 2:2-4 naootob ngonyan?
13 An mga pakinabang nin banal na pagtotokdo nakakamtan nin kaburonyogan na ngonyan nagigin mga lingkod nin Dios. Nakakamate sinda kan saindang espirituwal na pangangaipo asin lubos na nakakaaram na an aldaw ni Jehova harani na. (Mateo 5:3; 1 Tesalonica 5:1-6) Ngonyan mismo, “sa huring kabtang kan mga aldaw,” an mga tawong ini kan gabos na nasyon nagtuturukad pasiring sa bukid ni Jehova, an saiyang dalisay na pagsamba. Iyan marigon na nagtitindog asin mas halangkaw nanggad sa gabos na pagsamba na tumang sa kabotan nin Dios. (Isaias 2:2-4) Kun kamo dusay na Saksi ni Jehova, dai daw kamo naoogma na mapabilang sa orog pang nagdadakol na kaburonyogan na nagsasamba saiya asin nakikinabang sa banal na pagtotokdo? Makangangalas nanggad na mapabilang sa mga nagkakagsing na: “Omawa nindo si Jah, banwaan!”—Salmo 150:6.
Kapakipakinabang na Epekto sa Satuyang Espiritu
14. Ano an pakinabang sa pagsunod sa hatol ni Pablo sa 1 Corinto 14:20?
14 Saro sa dakol na pakinabang nin banal na pagtotokdo iyo an marahay na epekto kaiyan sa satong kaisipan asin espiritu. Pinahihiro kita kaiyan na isipon an mga bagay na matanos, malinig, marahay, asin inoomaw. (Filipos 4:8) An katokdoan ni Jehova tinatabangan kitang masunod an hatol ni Pablo: “Magin kamong mga omboy kun dapit sa karatan; alagad magin maygurang sa mga kapangyarihan nin pagsabot.” (1 Corinto 14:20) Kun iaaplikar ta an sadol na ini, dai kita maghahanap nin kaaraman sa karatan. Suminurat man si Pablo: “Magkaharale na logod saindo an gabos na malisyosong kapaitan asin kaanggotan asin kaongisan asin sirilyakan asin rilibakan kaibahan an gabos na karatan.” (Efeso 4:31) An paghimate sa siring na hatol matabang sato na likayan an inmoralidad asin iba pang magagabat na kasalan. Mantang ini kapakipakinabang sa pisikal asin mental, iyan nangorognang madara sato kan kagayagayahan sa pakaaram na napapaoyonan niato an Dios.
15. Ano an makatatabang sato na magdanay na marahay sa pag-isip?
15 Kun boot niatong magdanay na marahay sa pag-isip, an sarong tabang iyo an paglikay sa ‘maraot na pag-iriba na nakararaot sa marahay na mga ugale.’ (1 Corinto 15:33) Bilang mga Kristiano, dai kita makikiibaiba sa mga parapakisaro, parasambay, asin iba pang paragibo nin maraot. Makatanosan kun siring, dai kita dapat makiibaiba sa siring na mga tawo paagi sa pagbasa dapit sa sainda para sa makalaman na kasingawan o paagi sa pagdalan sa sainda sa telebisyon o sa mga pelikula. An puso madaya, madaling tuboan nin pagmawot nin maraot na mga bagay, asin puwedeng masugotan na gumibo kaiyan. (Jeremias 17:9) Kaya likayan niato an siring na mga sugot paagi sa pagsunod sa banal na pagtotokdo. Puwede iyan na makaapektar sa kaisipan kan “mga namomoot ki Jehova” sagkod sa kapakipakinabang na sokol na sainda nang ‘ikinakaongis an maraot.’—Salmo 97:10.
16. Paano an pagtotokdo nin Dios nakaaapektar sa espiritu na satong ipinaheheling?
16 Sinabihan ni Pablo an saiyang katabang na si Timoteo: “An Kagurangnan logod mapasa espiritu na saimong ipinapaheling. Mapasaindo logod an saiyang dai na kutana maninigong kabootan.” (2 Timoteo 4:22) Minawot kan apostol na aprobaran logod nin Dios, paagi sa Kagurangnan na si Jesu-Cristo, an nagpapahirong puwersa na nagmomotibar ki Timoteo asin sa iba pang Kristiano. An katokdoan nin Dios tinatabangan kitang magpaheling nin mamomoton, maboot, mahoyong espiritu. (Colosas 3:9-14) Asin laen nanggad iyan sa dakol na tawo sa huring mga aldaw na ini! Sinda mapalangkaw, dai tataong magbalos, dai nin pagkamoot, dai maoyonan, matagas an payo, mamomoton sa kasingawan, asin mayo nin tunay na diosnon na debosyon. (2 Timoteo 3:1-5) Alagad, mantang padagos niatong iinaaplikar sa satong buhay an mga pakinabang sa banal na pagtotokdo, ipinaheheling niato an espiritu na ikinamomoot sato nin Dios asin nin mga kapwa tawo.
Kapakipakinabang sa Relasyon sa mga Tawo
17. Taano ta mahalagang marhay an mapakumbabang pakikikooperar?
17 An katokdoan ni Jehova tinatabangan kitang masabotan an mga pakinabang sa mapakumbabang pakikikooperar sa mga kapwa parasamba. (Salmo 138:6) Bakong arog kan dakol na tawo ngonyan, dai niato binabalga an matanos na mga prinsipyo kundi madali kitang makaoyon. Halimbawa, dakol na karahayan an ibinubunga huli ta an nombradong mga paraataman madaling makaoyon durante kan mga miting nin mga magurang. An mga lalaking ini puwedeng magtaram nin kalmado para sa katotoohan, mantang dai tinotogotan an emosyon na tahoban an pagkamakatanosan o magcausa nin pasuruhay. An gabos na miembro kan kongregasyon makikinabang sa espiritu nin pagkasararo na satong nakakamtan kun padagos na iaaplikar niato gabos an banal na pagtotokdo.—Salmo 133:1-3.
18. An banal na pagtotokdo tinatabangan kitang magkaigwa nin anong pagmansay dapit sa mga kapagtubod?
18 An banal na pagtotokdo kapakipakinabang man sa pagtabang sato na magkaigwa nin tamang pagmansay dapit sa mga kapagtubod. Si Jesus nagsabi: “Dai nin nakakadolok sa sako kun dai sia dagkahon kan Ama, na nagsugo sa sako.” (Juan 6:44) Partikularmente poon kan 1919, ipinapapahayag ni Jehova sa saiyang mga lingkod an saiyang mga paghokom, asin an pankinaban na palakaw ni Satanas nayugyug asin natanyog kan panglobong patanid na ini. Kadungan kaiyan, an mga tawong may takot sa Dios—an “kawiliwiling mga bagay”—dinagka nin Dios na sumiblag sa mga nasyon asin makiiba sa linahidan na mga Kristiano sa pagpano nin kamurawayan kan harong nin pagsamba ni Jehova. (Haggeo 2:7) Tunay nanggad, maninigo niatong mansayon an siring na kawiliwiling mga tawo na dinagka nin Dios bilang namomotan na mga kairiba.
19. Ano an ihinahayag kan pagtotokdo nin Dios manongod sa pagresolber sa personal na mga dai pagkasinarabotan nin mga kapwa Kristiano?
19 Huling kita gabos bakong sangkap, siyempre, dai perming magigin pasil an mga bagay. Kan si Pablo mapasiring na sa saiyang ikaduwang biyahe sa pagmimisyonero, si Bernabe desididong ipag-iba si Marcos. Dai ominoyon si Pablo huli ta si Marcos “buminulag sa sainda sa Pamfilia asin dai uminiba sa sainda sa gibohon.” Huli kaiyan, nangyari “an matarom na pagputok nin kaanggotan.” Ipinag-iba ni Bernabe si Marcos pasiring sa Chipre, mantang ipinag-iba ni Pablo si Silas sa Siria asin Cilicia. (Gibo 15:36-41) Kan huri, an siwang na ini risang naomayan, huli ta kaiba na ni Pablo si Marcos sa Roma, asin nagtaram nin marahay si Pablo manongod sa saiya. (Colosas 4:10) An sarong pakinabang kan banal na pagtotokdo iyo na ipinaheheling kaiyan sato kun paano reresolberan an personal na mga dai pagkasinarabotan sa pag-oltanan nin mga Kristiano paagi sa pagsunod sa hatol na arog kan ki Jesus sa Mateo 5:23, 24 asin Mateo 18:15-17.
Perming Kapakipakinabang Asin Mapanggana
20, 21. An satong pag-orolay dapit sa banal na pagtotokdo maninigong magpahiro sato na gibohon an ano?
20 Dawa sa halipot na pag-orolay niato dapit sa nagkapirang pakinabang asin kapangganahan nin banal na pagtotokdo, mayong duwa-duwa na naheheling niato gabos an pangangaipo na magpadagos sa pag-aplikar kaiyan sa satong buhay. Kaya paagi sa mapagngayongayong espiritu, magpadagos logod kitang makanood sa satong Kaharohalangkaweng Paratokdo. Sa dai na mahahaloy, an banal na pagtotokdo manggagana nin orog kisa kasuarin pa man. Magigin iyan mapanggana kun an mga madonong sa kinaban na ini nautsan na. (Ikomparar an 1 Corinto 1:19.) Dugang pa, mantang minilyon pa an nakakanood asin naggigibo kan kabotan nin Dios, an kaaraman dapit ki Jehova makakapano sa daga arog kan katubigan na nakatatahob sa mismong dagat. (Isaias 11:9) Kanigoan kamamuraway na makikinabang kaini an makinuyog na katawohan asin ibibindikar si Jehova bilang an Unibersal na Soberano!
21 An pagtotokdo ni Jehova perming magigin kapakipakinabang asin mapanggana. Padagos daw kamong makikinabang dian bilang maigot na estudyante kan dakulang Aadalan na Libro nin Dios? Namumuhay daw kamo kaoyon kan Biblia asin ihinihiras sa iba an mga katotoohan kaiyan? Kun iyo, makalalaom kamong maheling an lubos na kapangganahan kan banal na pagtotokdo, sa ikamumuraway kan satuyang Kaharohalangkaweng Paratokdo, an Soberanong Kagurangnan na Jehova.
Ano an Saindong Nanodan?
◻ Ano an puwedeng magin epekto sa satong buhay kan banal na pagtotokdo?
◻ Paano pinapanigoan kan pagtotokdo ni Jehova an mga pangangaipo sa edukasyon?
◻ Ano an puwedeng magin kapakipakinabang na epekto sa satong kaisipan asin gawe kan banal na pagtotokdo?
◻ Paano an pagtotokdo nin Dios napapatunayan na kapakipakinabang kun manongod sa relasyon sa mga tawo?
[Ritrato sa pahina 15]
Ipinaheheling sato kan banal na pagtotokdo kun paano maglalakaw sa kaibanan nin Dios, arog kan ginibo ni Noe
[Ritrato sa pahina 17]
An mga tawo kan gabos na nasyon nagtuturukad sa bukid ni Jehova