An Tataramon nin Diyos Kapakipakinabang sa Pagtutukdo

1. Ano an tema kan pansirkitong asembleya sa 2014, asin anong hapot an sisimbagon sa programa?

¹ An satong “Kahuruhalangkawing Instruktor,” si Jehova, iyo an pinakamarahay na paratukdo sa uniberso. (Isa. 30:20, 21, NW) Pero, paano niya kita tinutukduan? Itinao niya an sarong libro na nakakalabi sa gabos na iba pang libro—an saiyang ipinasabong na Tataramon, an Bibliya. Paano kita nakikinabang sa pisikal, mental, emosyonal, asin espirituwal na paagi gikan sa pagtutukdo nin Diyos? Sisimbagon ini sa satong programa kan pansirkitong asembleya sa 2014. An tema kaiyan ‘An Tataramon nin Diyos Kapakipakinabang sa Pagtutukdo,’ na basado sa 2 Timoteo 3:16.

2. Anong mga hapot an magtatampok kan panginot na mga punto?

² Antabayanan an Panginot na mga Puntong Ini: An panginot na mga punto sa programa itatampok sa simbag sa minasunod na mga hapot:

• Ano an epekto kan pagtutukdo nin Diyos sa satong buhay? (Isa. 48:17, 18)

• Kun pagmamaigutan niyatong gumibo nin mga pagbabago sa satong kamugtakan tanganing makapaglingkod ki Jehova nin bilog na panahon, ano an masisigurado niyato? (Mal. 3:10)

• Ano an dapat na magin reaksiyon niyato kun napapaatubang kita sa ‘dai midbid na mga katukduan’? (Heb. 13:9)

• Paano niyato maaarog an paagi nin pagtutukdo ni Jesus? (Mat. 7:28, 29)

• Taano ta maninigong tukduan kan mga nagtutukdo sa kongregasyon an saindang sadiri? (Roma 2:21)

• An Tataramon nin Diyos kapakipakinabang para sa ano? (2 Tim. 3:16)

• Ano an epekto sa mga tawo kan pagtanyog sa mga nasyon? (Hag. 2:6, 7)

• May tiwala si Jehova na kaya tang gibuhon an ano? (Efe. 5:1)

• Taano ta dapat kitang magmaigot na magdanay sa katukduan ni Jehova? (Luc. 13:24)

3. Taano ta mahalaga na mag-atender kita asin maghinanyog na marhay sa napapanahon na programang ini?

³ Sa inot na kabtang kan 2 Timoteo kapitulo 3, bago isurat an mga tataramon na pinagbasaran kan tema kan programa, ilinadawan ni Pablo an masakit na mga panahon na magigin tanda kan huring mga aldaw. Siya nagsurat: ‘An mga maraot na tawo asin mga madaya, magdadagdag sa karatan, na nagdadaya asin dinadayaan.’ (2 Tim. 3:13) Para dai kita madaya, mahalaga nanggad na maghinanyog kita asin iaplikar an pagtutukdo nin Diyos! Kaya, lugod na magin determinado kitang mag-atender asin maghinanyog na marhay sa napapanahon na programang ini.