‘Mangyari Logod an Kabotan nin Dios’

1. Ano an tema kan programa para sa 2012 na aldaw nin espesyal na asamblea, asin taano ta angay na pag-olayan niato ini?

¹ Nalalang kita huli sa kabotan ni Jehova. (Kap. 4:11) Huli kaini, imposibleng maotob an katuyohan kan satong pag-eksister kun dai niato aaramon asin gigibohon an kabotan nin Dios. Bako ining pasil arog kan tibaad iniisip niato, huling kaipuhan tang labanan an panglaog na tendensia na gumibo “kan magña mawot nin laman asin nin pagisip” o “kan mawot nin magña Gentil.” (Efe. 2:3; 1 Ped. 4:3; 2 Ped. 2:10) Kun mayong tabang nin Dios, namemeligro pa ngani kitang ‘mabihag kan Diablo sa pagsunod sa saiyang kabotan.’ (2 Tim. 2:26) An programa kan satong aldaw nin espesyal na asamblea para sa 2012 makakatabang sa lambang saro sa sato na gibohon an mga bagay-bagay kaoyon kan ikatolo sa pangenot na mga kahagadan sa modelong pamibi. (Mat. 6:​9, 10) An tema kaiyan, ‘Mangyari Logod an Kabotan nin Dios.’

2. Anong mga hapot an sisimbagon durante kan programa?

² Mga Hapot na Sisimbagon: Mantang naghihinanyog sa programa, abangan nindo an simbag sa mga hapot na ini: Ano an siring kaimportante kan pagdangog sa Tataramon nin Dios? Paano niato padagos na sasaboton kun ano an kabotan nin Dios para sa sato? Taano ta kaipuhan na andam kitang hulitan an gabos na klase nin tawo? Paano kita magkakaigwa nin makahulogan asin nakakakontentong buhay? Mga hoben, ano an kaipuhan nindong patunayan ki Jehova? Anong mga balos an makakamtan sa paggibo kan kabotan nin Dios? Taano ta apurado na pakosogon asin parigonon niato an boot nin iba?

3. Paano kita lubos na makikinabang sa espirituwal na probisyon na ini?

³ Seguradohon na makaatender asin maghinanyog na marhay sa programa. Posibleng marhay na may representante nin Bethel o nagbibiaheng paraataman bilang nagdadalaw na ispiker. Bago asin pagkatapos kan programa, dai mag-alangan na makipag-olay sa saiya asin sa agom nia, kun igwa. Pagpuli nindo, dai magin “paradagñog na naliligñao,” kundi repasohon an programa bilang pamilya o indibiduwal asin pag-olayan kun paano nindo mas lubos na magigibo an mga bagay-bagay kaoyon kan pagboot nin Dios.​—Sant. 1:25.

4. Taano ta mahalaga na magin prioridad niato an paggibo kan kabotan nin Dios?

⁴ Dai na nanggad mahahaloy, lalaglagon na an mga nagpapadagos sa paggibo kan sadiri nindang kamawotan asin habong magpasakop sa kabotan ni Jehova. (1 Juan 2:17) Kun siring, nagpapasalamat kita na inandam ni Jehova an napapanahon na impormasyon na ini tanganing tabangan kitang magin prioridad an paggibo kan kabotan nin Dios!