Ingatan an Saimong Isip

1. Ano an tema kan pansirkitong asamblea para sa 2013, asin ano an katuyohan kan programa?

¹ Pinagbotan ni Jesus an saiyang mga disipulo na kamotan si Jehova sa bilog nindang puso, kalag, asin isip. (Mat. 22:37, 38) An mga kombension ngonyan na taon asin an pansirkitong mga pagtiripon sa sunod na taon dinisenyo tanganing tabangan kitang mapaoswag an panglaog na pagkatawo niato. Arog kan aram nindo, an tema kan pandistritong kombension niato iyo an “Ingatan an Saimong Puso!” An programa kan aldaw nin espesyal na asamblea para sa 2013 may temang “Ingatan an Saimong Konsensia.” Asin itatampok sa serye nin mga pansirkitong asamblea na mapoon sa sunod na bulan an temang “Ingatan an Saimong Isip,” basado sa Mateo 22:37. An programang ini dinisenyo tanganing tabangan an lambang saro sa sato na siyasaton an sadiri tang kaisipan tanganing iyan magin mas kawiliwili ki Jehova.

2. Durante kan programa, maninigo tang antabayanan an simbag sa anong mga hapot?

² Kun Ano an Ipepresentar: Mantang naghihinanyog kita sa pansirkitong asamblea, maninigo tang antabayanan an simbag sa mga hapot na ini, na nagrerepresentar sa pangenot na mga punto:

• Paano niato malilikayan na isipon an ‘mga kaisipan nin tawo’?

• Paano kita makakatabang na mahale an tahob na nakakabuta sa isip nin mga dai nagtutubod?

• Gusto niatong magkaigwa nin anong klaseng kaisipan?

• Ano an mga pakinabang sa tamang paghorophorop?

• Paano niato tinotogotan si Jehova na moldehon an satong kaisipan?

• Paano makakakontribwir sa kaogmahan kan pamilya an mga agom na lalaki, agom na babae, magurang, asin aki?

• Paano kita magigin andam sa aldaw ni Jehova?

• Ano an boot sabihon nin hagkosan an satong isip para sa gibohon?

• Anong pakinabang an makukua kan mga nag-aaplikar kan saindang nanonodan?

3. Taano ta mahalaga na kita mag-atender sa duwang aldaw kan asamblea, maghinanyog na marhay, asin mag-aplikar kan nanodan?

³ Si Satanas naghihingoang magtanom nin mga pagduda sa satong isip asin nagmamaigot na raoton iyan. (2 Cor. 11:3) Kun siring, kaipuhan tang protektaran an isip asin kontrolon an kaisipan. Kaipuhan na padagos tang ipabanaag an kaisipan ni Cristo asin labanan an impluwensia kan maribok na kinaban na ini. (1 Cor. 2:16) Kaya planohon na umatender sa duwang aldaw kan pansirkitong asamblea. Maghinanyog na marhay. An pag-aplikar sa mahalagang marhay na impormasyon na ipepresentar makakatabang sa sato na andamon an isip para sa maigot na paglilingkod sa Kahadean.—1 Ped. 1:13.