Sarong Pansirkitong Asamblea Tanganing Tabangan Kitang Ingatan an Satong Espirituwalidad
1. Ano an sarong probisyon hale ki Jehova tanganing tabangan kitang maotob an sugo sa sato na ilakop an maogmang bareta?
1 Si Jehova buka an palad na nagtatao nin impormasyon, pagsasanay, asin pagparigon sa boot na kaipuhan niato tanganing makapakikabtang kita sa sugo nin Dios na ilakop an maogmang bareta. (Mat. 24:14; 2 Tim. 4:17) An satong taonan na pansirkitong asamblea saro sa siring na probisyon. Ipapaliwanag sa bagong programa para sa 2010 an temang “Ingatan an Saindong Espirituwalidad,” na basado sa Roma 8:5 asin Judas 17-19. An bagong mga serye nakaiskedyul na magpoon sa ikatolong semana nin Enero 2010.
2. (a) Sa anong mga paagi magigin kapakipakinabang sa sato an pansirkitong asamblea? (b) Paano nakatabang sa saindong ministeryo an nakaaging pansirkitong mga asamblea?
2 Kun Paano Iyan Kapakipakinabang: An programa matabang sa sato na magin alisto sa mga peligro, siring kan mga pandisturbo na puedeng mag-ubos kan satong panahon asin magrayo kan satong atension sa kun ano talaga an mahalaga. Maaaraman niato kun paano lalabanan an pagigin mapagkonsinte, asin eestudyaran niato kun ano an kalabot sa pagigin espirituwal na tawo. Ipapaheling kan simposium sa Domingo kun paano mapapakosog nin mga indibiduwal asin mga pamilya an saindang espirituwalidad sa ibong nin nag-oorog na mga kasakitan asin grabeng mga pagbalo sa pagtubod. An programa makakatabang sa sato na maingatan an satong puso, mapagdanay an satong espirituwal na salud, asin papagdanayon na malinaw sa isip an makangangalas na mga bendisyon na naghahalat sa mga nag-iingat kan saindang espirituwalidad.
3. Noarin an sunod nindong pansirkitong asamblea, asin ano an maninigong magin determinasyon nindo?
3 Pagkatapos tolos na maaraman nindo kun noarin asin kun saen gigibohon an sunod na pansirkitong asamblea nindo, planohon na kun paano magigin presente asin atentibo sa gabos na sesyon sa laog nin duwang aldaw. Makakasierto kamo na binebendisyonan ni Jehova an mahigos.—Tal. 21:5.
4. Ano an siertong maaako niato sa satong nagdadangadang na pansirkitong asamblea?
4 Tunay nanggad, si Jehova an Paratao kan marahay na balaog na ini. An programang ini na iinandam kan grupong maimbod na oripon iyo nanggad an kaipuhan niato tanganing makapagpadagos bilang Kristianong mga ministro. Nagpapasalamat kita ki Jehova sa gabos na mamomoton na probisyon nia na nakakatabang sa sato na ‘mangapot nin higot sa pagpapahayag sa publiko kan satong paglaom na daing pag-urong-sulong.’—Heb. 10:23-25; Sant. 1:17.