Pag-atender sa Pagtiripon—Sarong Seryosong Paninimbagan

¹ Gurano kaseryoso para sa saindo kan pag-atender sa pagtiripon? An iba daw sa sato tinotogotan an sekular na trabaho, kapagalan, leksion na pag-aadalan, kadikit na pisikal na mga helang, o medyo maraot na kamugtakan nin panahon na makaolang sa satong obligasyon na umatender nin regular sa mga pagtiripon?​—Deut. 31:12.

² An iba sa satong mga tugang naglalakaw sa laog nin dakol na oras asin nagbabalyo sa peligrosong mga salog tanganing makaatender sa mga pagtiripon. Sa saindong sadiring kongregasyon, tibaad may maimbod na mga tugang na “dai noarin man nagpapalta” sa ibong nin grabeng mga problema sa salud, pisikal na mga diperensia, o magabat na mga asignasyon sa trabaho o sa eskuwelahan. (Luc. 2:37) Taano ta naghihingoa sindang umatender? Huli ta aram ninda na dai ninda kayang mapangganahan sa saindang sadiring kosog an mga pangigipit kan kinaban. Kinakaipuhan ninda an kosog na itinatao nin Dios.​—2 Cor. 12:​9, 10.

³ Gurano kaseryoso para sa saindong pamilya kan pag-atender sa pagtiripon? Iyan daw siring kaimportante sa saindo kan mga panahon nin pagkakan o sekular na trabaho? Sa mga oras nin pagtiripon, nakikiargumento daw kamo sa saindong sadiri kun baga maatender o dai, o an regular daw na asosasyon kaiba kan saindong mga tugang sarong bagay na bakong opsional sa laog kan saindong pamilya?

⁴ Bilang pamilya, taano ta dai magtao nin mapagngayongayong paghorophorop sa saindong pag-atender sa pagtiripon? Dangan gumibo nin kinakaipuhan na mga pagliliwat sa saindong iskedyul. An regular na pag-atender sa pagtiripon sarong mahalagang kabtang kan satong teokratikong edukasyon asin maninigong isaboot na gayo.