Mangapot nin Posog sa Hayag na Pagtuga kan Saindong Paglaom na Daing Pagduwaduwa
1 An Pag-adal sa Torrengbantayan iyo an pangenot na paagi na an espirituwal na “kakanon sa igong panahon” itinatao sa banwaaan nin Dios ngonyan. (Mat. 24:45) Nag-aatender kita na may duwang pangenot na katuyohan: Tanganing mapakosog sa espirituwal na paagi, asin hayag na ituga an satong paglaom sa iba.—Heb. 10:23-25.
2 Pagkinabang Mismo Niato: Kinakarkulo na sa kadaklan na kongregasyon un-tersio sana kan mga nagdadangog an patienot na nag-aadal kan leksion. Mga arog man kaiyan kadakol an nakikikabtang sa pagkomento. An matagas na espirituwal na kakanon sa Pag-adal sa Torrengbantayan dai lubos na masasabotan durante kan mismong pagtiripon. Kaipuhan nindong magtagama nin panahon sa patienot na pag-adal kan materyal.
3 Kun nag-aandam para sa pag-adal, marahay na basahon nguna an mga hapot sa kahon sa katapusan kan artikulo. Isesentro kaini an saindong atension sa pangenot na mga punto na pag-oolayan sa leksion.
4 Durante kan pag-adal maghinanyog nin maingat sa sinasabi. Magtao nin atension sa pambukas na mga tataramon kan nangengenot. Tibaad magpalataw sia nin tolo o apat na hapot na sisimbagon, o tibaad repasohon nia an tampok na mga kabtang sa leksion kan nakaaging semana. Kun igwa nin pirang pagliliwat sa satong pakasabot manongod sa sarong hula sa Biblia o sa Makakasuratan na prinsipyo, sasambiton nia ini. Siyempre, an mga komento kan nangengenot kaipuhan na halipot, huling an sarong katuyohan kan pag-adal iyo na tawan an kongregasyon nin oportunidad na ikapahayag an saindang paglaom.
5 Ipahayag an Saindong Paglaom: Regular daw kamong nagtatao nin komento durante kan pag-adal? An halipot, direktang mga komento mas marahay. (Ikomparar an Lucas 21:1-4.) An simpleng komento gikan sa puso inaapresyar nin gabos. Parateng an enot na komento sa sarong hapot maninigong halipot asin direkta. Tinotogotan kaini an iba na magsambit nin teksto o darahon an atension sa sarong detalye sa parapo. Sa paaging ini dakol an makagigibo nin hayag na pagtuga kan saindang paglaom. An mga komento maninigong perming positibo asin nakapakokosog.
6 Kun nagpopoon pa sana kamong mag-atender o kun nininerbiyos kamong magkomento, tibaad boot nindong humagad nin tabang sa nangengenot. Hagadon saiya na hanapon an saindong kamot kun pinag-oolayan an sarong parapo. Tibaad puwede kamong magboluntaryo na bumasa nin sarong teksto asin iaplikar an kahulogan kaiyan. Isurat an pirang nota sa pagirilid tanganing matabangan kamo na magirumdoman an boot nindong sabihon. Kun ika sarong aki, girumdomon na inaapresyar an saimong mga komento.—Mat. 21:16.
7 Mahalaga na ipahayag niato an satong pagtubod, asin an Pag-adal sa Torrengbantayan nagtatao nin marahay na oportunidad na gibohon iyan. An librong Qualified to Be Ministers arog kaini an pagkasabi: “Ano man an problema, pangganahan iyan asin piriton na tumao nin kisuerra sarong simbag. Makakakontribuwir kamo sa pagtiripon, asin magigin marahay an pagmate nindo dian.” (Pahina 99) Kaya taano ta dai planohon na tumao nin kisuerra sarong komento sa masunod na Pag-adal sa Torrengbantayan?—Tal. 15:23.