Mga Paraataman na Nangengenot—An Konduktor sa Pag-adal sa Torrengbantayan
1 An Torrengbantayan Nagpapahayag kan Kahadean ni Jehova an pangenot na probisyon kan “fiel asin madonong na oripon” para sa pagtao nin espirituwal na kakanon sa sato “sa igong panahon.” (Mat. 24:45) An magurang sa kongregasyon na nagkokondukta kan Pag-adal sa Torrengbantayan igwang mahalagang marhay na paninimbagan bilang sarong may kakayahan na paratokdo na nagtatao nin marahay na halimbawa sa Kristianong pamumuhay.—Roma 12:7; Sant. 3:1.
2 Tangani na epektibong makapagtokdo, an konduktor sa Pag-adal sa Torrengbantayan dapat na maghingoang marhay sa pag-andam kada semana. Ginigibo nia iyan sa mapagngayongayo asin maingat na paagi. An saiyang odok na interes sa kongregasyon nababanaag sa tunay na paghihingoa na aboton an satong puso kan materyal na pinag-aadalan. Sia nagkokonsentrar sa pangenot na mga punto kan leksion asin tinatabangan kita na masabotan kun paano an mga iyan konektado sa tema kan artikulo.
3 Kaiba sa saiyang maingat na pag-andam an patienot na pagbasa kan mga teksto tangani na maaraman kun paano iyan minaaplikar. Saiya pirmeng pinapalataw an Tataramon nin Dios paagi sa pag-enkaminar sa kongregasyon na gamiton nin marahay an Biblia durante kan pag-adal. Kun may importanteng punto na dai nakobrehan sa mga komento kan kongregasyon o kun nalaktawan an aplikasyon nin sarong pangenot na teksto, nagtatao sia nin dugang pang espesipikong hapot tanganing mapalataw an impormasyon. Paagi kaini, tinatabangan nia kitang makaabot sa tamang mga konklusyon asin maaraman kun paano iaaplikar sa satong buhay an satong nanonodan.
4 An konduktor sa Pag-adal sa Torrengbantayan progresibong nagmamaigot na mapaoswag an saiyang sadiring abilidad sa pagtotokdo. Sia dai nagpaparakomento kundi ineenkaminar kitang magkomento—sa satong sadiring tataramon, halipot, asin direkta sa punto. Kun minsan puede nia kitang pagirumdomon na an enot na makomento sa sarong parapo maninigong magtao nin halipot, direktang simbag sa nasusurat na hapot. An dugang pang mga komento kan mga nagdadangog puedeng darahon an atension sa pag-aplikar nin teksto, nagsusuportar na mga argumento, o praktikal na pag-aplikar kan materyal. Paagi sa pagpaoswag sa personal asin pampamilyang pag-andam, an konduktor sa Pag-adal sa Torrengbantayan naghihingoang pukawon an pagmawot nin gabos na makikabtang.
5 Bilang “mga tawong tinokdoan ni Jehova,” pinahahalagahan niato an “balaog na mga lalaki,” siring baga kan mga konduktor sa Pag-adal sa Torrengbantayan, na ‘nagmamaigot sa pagtokdo.’—Isa. 54:13; Efe. 4:8, 11; 1 Tim. 5:17.