Ipamate na Istimado Sinda sa Memorial
1 Sa nakaaging pirang taon, solamente 1 sa 3 katawo na nag-atender sa Memorial an parahayag kan maogmang bareta. Posibleng magin totoo man iyan ngonyan na taon. An iba puwedeng umatender sa imbitasyon nin sarong paryente o katood, mantang an iba tibaad inimbitaran kan lokal na mga parahayag. An iba pang maatender, dawa ngani bautisado, bako nang aktibo sa ministeryo. Odok sa boot niatong inaako an gabos na nagpapaheling nin paggalang sa pagboot ni Jesus: “Padagos nindong gibohon ini sa paggirumdom sa sako.”—1 Cor. 11:24; Roma 15:7.
2 An iinasignar na mga attendant maninigong magin alisto na istimaron an gabos pag-abot ninda sa Kingdom Hall. Alagad, kita gabos puwedeng kuyogon an dalan nin pagkamapagpasakat sa Memorial. (Roma 12:13) Paano daw niato magigibo ini?
3 Sa bangging iyan an ibang parahayag magigin sibot sa pagtao nin transportasyon para sa interesadong mga tawo. An iba tibaad kayang umabot nin amay tanganing taratarahon an mga bisita na nag-aarabot na mayo nin kaibanan. Kun minalaog sa hall an sarong estranyo, taratarahon sia nin mainit. Hapoton sia kun midbid nia an siisay man sa mga tugang. Kun iyo, asikasohon sia sagkod na umabot an saiyang mga kamidbid. (Ikomparar an Lucas 10:35.) Kun mayo siang kamidbid, taano ta dai sia imbitaran na tumaed saindo? Ipaliwanag kun paano gagamiton an arak asin an tinapay. Tibaad nangangaipo sia nin tabang sa paghanap kan mga Kasuratan na kinokotar kan espiker.
4 Pagkatapos kan selebrasyon nin Memorial, sabihan sia na naoogma kamong nag-abot sia. Tibaad may mga hapot sia manongod sa satong gibohon na puwede nindong simbagon. An saindong personal na interes puwedeng gumiya sa sarong pag-orolay manongod sa sarong topiko sa Biblia. May ekselenteng mga pag-adal na naponan nin alistong mga tugang na guminibo kaini. Bago sia humale sa Kingdom Hall, iintrodusir sia sa iba, asin imbitaran sia na bumalik.
5 Maogmahon nanggad kitang istimaron an satong namomotan na mga tugang na dai na nag-aatender nin regular o bako nang aktibo sa ministeryo sa laog nin haloy na panahon! Imbes na hapoton kun taano sinda ta dai nakaaatender sa mga pagtiripon, ipahayag sana an saindong kagayagayahan na presente sinda. Tibaad may madangog sinda durante kan diskurso sa Memorial na mapahiro sainda na siyasaton liwat an saindang idinusay na relasyon ki Jehova. An mainit na pag-istimar na itinatao niato asin an pagmakolog na ipinaheheling niato tibaad makapahiro sa saindang puso. Ipaaram sainda na naglalaom kamo na maheling sinda giraray.—Roma 1:11, 12.
6 May espesyal na pahayag-publiko na itatao sa Abril 10 na may temang “An Tunay na Relihiyon Pinaninigoan an mga Pangangaipo kan Sosyedad nin Tawo.” Siertohon na imbitaran an gabos na nag-atender sa selebrasyon kan Memorial. Linalaoman niato na an mga maatender sa espesyal na mga miting na ini makamate na istimado asin makaeksperyensia kan mainit na espiritu nin pakikiasosyar sa tahaw kan banwaan ni Jehova.—Sal. 133:1.