Gamiton an mga Magasin sa Paghiras kan Katotoohan
1 An totoong impormasyon biyong pinaluluya ngonyan huli sa sobradong pag-anunsiar, nakadadayang politikal na mga panuga, asin mapandayang internasyonal na mga deklarasyon. An Torrengbantayan asin Awake! napapalaen huli ta ini sana an nagpapahayag kan katotoohan dapit sa Kahadean nin Dios asin nagpapaliwanag kun ano an kaipuhan na gibohon nin gabos tanganing magkamit kan mga bendisyon na dadarahon kaiyan.
2 Sa sarong nasyon an sarong opisyal kan ministri nin impormasyon na inapresyar an halaga kan mga magasin na ini tolos-tolos na nagtabang sa pagkua nin pag-aprobar para sa distribusyon kan mga ini. Sia nagsabi: “Ibinibilang ko An Torrengbantayan na saro sa pinakamarahay na mga magasin; ogmahon akong makatabang.” Paano nindo iaatubang an nagtataong-buhay na mga magasin na ini ngonyan na Mayo? (Juan 17:3) Tibaad makakatabang an minasunod na mga suhestion.
3 Kun itinatampok nindo an pambukas na mga artikulo sa Mayo 15 “Torrengbantayan,” puwede nindong sabihon:
◼ “Nakikipag-olay kami sa mga tawo dapit sa pinakamabentang libro sa kinaban. Aram daw nindo kun ano iyan? [Pasimbagon.] Iyo, iyan an Biblia. An dahelan kun taano an kadakoldakol na tawo ta buminakal nin Biblia manonompongan sa 1 Timoteo 3:16.” Pakabasaha kan teksto, idoon an mga punto sa saro sa mga artikulo.
4 O pakatapos nin halipot na introduksion, puwede kamong magsabi kaini:
◼ “Tibaad narisa nindo na igwa nin kahaditan sa bilog na kinaban huli sa mga problema na napapaatubang sa mga aki. Anong mga problema an saindong naheheling sa lokal na nahahaditan nindo?” Pasimbagon. Sabihon an pira sa seryosong mga problema na inaatubang nin mga aki siring kan ipinaliwanag sa pambukas na mga artikulo kan Mayo 8 Awake!, asin itokdo an solusyon na iinaalok kan Kahadean nin Dios.
5 Sa rekord nindo nin mga pagdalaw liwat, posibleng igwa kamo nin lista kan mga nagpaheling nin kadikit na interes kan enot. Puwede nindong gamiton an listang ini tanganing magkaigwa nin ruta sa magasin. Kun maheling nindo an sarong artikulo na tibaad nakakaakit sa sarong partikular na tawo, siertohon na dalawon an indibiduwal na iyan asin ialok an magasin.
6 Impormal na Pagpatotoo: Ini ekselenteng paagi sa pagpukaw nin interes sa mga magasin. An nakakaakit sa mata na mga tutob puwedeng igo nang makapoon nin pag-orolay. An sarong tugang na babae nagbugtak sa saiyang lamesa nin pirang luwas tanganing maheling iyan kan saiyang mga katrabaho mantang sinda minaagi; nakapasakamot sia nin nagkapira. Magdara kamo nin pirang kopya, asin ialok iyan ngonyan na bulan kun kamo nananaod, minalaog sa eskuwelahan, o nakalunad sa awto.
7 Paagi sa tabang kan An Torrengbantayan asin Awake!, nanompongan ta an mga simbag sa mahalagang mga hapot manongod ki Jehova asin sa pagsamba saiya. Boot niatong gamiton an mga magasin na ini sa gabos na paaging posible na tabangan an iba na mamidbid si “Jehova na Dios nin katotoohan.”—Sal. 31:5.