Perming Atenderan an Saindong Pagtotokdo
1 An bagong programa sa Teokratikong Paadalan sa Pagmiministro mapoon sa Enero 1995. Ano an bago sa programang ini? An makaoogmang kasaysayan kan modernong aldaw na organisasyon ni Jehova an temang pag-oorolayan sa kadaklan na pahayag na nagtotokdo. Durante kan taon, pag-oolayan an 178 pahina kan librong Jehovah’s Witnesses—Proclaimer’s of God’s Kingdom. Mantang mayong mga hapot sa pagrepaso na masunod sa pahayag na nagtotokdo gikan sa librong Proclaimers, ano an puwede niatong gibohon tanganing maatenderan an satong pagtotokdo asin makinabang nin dakol?—1 Tim. 4:16.
2 Dawa ngani dakol an nakabasa na kan librong Proclaimers, an pag-orolay kaiyan sa paadalan matabang na mapahalagahan nin orog pa an saindang teokratikong pamana. (Sal. 71:17, 18) Taano ta dai mag-iskedyul nin panahon kada semana sa pagrepaso kan iinasignar na materyal sa librong Proclaimers?
3 Buhay Asin Interesanteng mga Pahayag na Nagtotokdo: An mga pahayag na nagtotokdo gikan sa librong Proclaimers maninigong iatubang sa paaging buhay asin interesante. Maninigong itampok man kaiyan an praktikal na halaga kan impormasyon, na ginagamit iyan na pararomon an paggalang sa organisasyon ni Jehova asin an pagpahalaga sa satong mga pribilehiyo bilang mga lingkod nin Dios. Kun an kada pamilya magdadara sa pagtiripon nin sarong kopya kan librong Proclaimers, puwedeng masundan nin marhay kan mga miembro nin pamilya an pahayag na nagtotokdo asin makinabang sa mga ilustrasyon saka mga retrato sa libro.
4 Nakakapukaw sa Isip na mga Pagbasa sa Biblia: An marahay na pagbasa, na igwa nin tamang pagdodoon asin pagmate, importanteng kabtang nin epektibong pagtotokdo. Dugang pa, an iinasignar na materyal na babasahon sa Pahayag Num. 2 bakong halawig, asin sa siring igwa nin igong panahon para sa pambukas asin pantapos na mga komento kan espiker. An introduksion maninigong makapukaw nin interes sa materyal asin andamon an mga nagdadangog na masabotan an praktikal na halaga kaiyan. Puwedeng iiba sa konklusyon an nagpapaliwanag na mga komento asin an pag-aplikar sa materyal, na ginagamit nin lubos kan espiker an itinaong oras.
5 An dagdag pang impormasyon dapit sa programa sa paadalan asin kun paano gigibohon an mga asignasyon makukua sa “Theocratic Ministry School Schedule for 1995.” Inaatenderan niato an satong pagtotokdo paagi sa pagrepaso sa mga instruksion sa materyal na ini, paagi sa pag-andam nin marhay kan satong mga asignasyon, asin paagi sa pag-aplikar kan sadol na itinatao sa sato. An mga dai pa nagpalista sa paadalan maogmang inaagda na gibohon iyan.