Pagpasimple kan 1995 Pandistritong Kombension

¹ Abaa kanakaoogma na magin presente sa espirituwal na mga kapiyestahan, baga man sa mga pagtiripon sa kongregasyon, pansirkitong asamblea, espesyal na aldaw nin asamblea, o pandistritong kombension! Taano? An pakikiiba sa satong mga tugang nakakarepresko, asin an espirituwal na mga bagay na iinaatubang nagpapagirumdom sa sato kan mas importanteng mga bagay.

² Padakol nang padakol na ribo an naakit sa siring na espirituwal na mga katiriponan sa dai pa sana nahahaloy na mga taon. Sa pag-oltanan kan mga taon nin 1985 asin 1994, an bilang nin mga kongregasyon sa bilog na kinaban nag-oswag nin labing 50 porsiento, poon sa 49,716 sagkod sa 75,573. Mantang pinaririkas ni Jehova an gibohon, an bilang nin pandistritong mga kombension asin pansirkitong mga asamblea nag-ooswag kadungan kaiyan. (Isa. 60:22) Minsan an pag-oswag sa bilang nin mga kombension na ginibo sa Pilipinas sana, poon sa 23 kan 1985 sagkod sa 42 kan 1994, nagpapabanaag kan dakulaon na pagtalubong ini sa bilang nin mga kongregasyon. Nagdadakol an gibohon na kalabot sa pag-areglo para sa asin pag-asikaso kan mga kombension na ini. Mantang nagtitiripon kita tanganing makinabang sa espirituwal na programang inandam para sa mga kapiyestahan na ini, madonong na pasimplehon sagkod na mapupuwede an pag-asikaso sa pisikal na mga pangangaipo.

³ Dugang Pang mga Paagi na Gigibohon: Naglalaom kita ki Jehova para sa saiyang bendisyon mantang kita progresibong nag-aabante. Naoogma kitang maheling na tinawan nia an saiyang banwaan kan kinakaipuhan na espiritu nin kadonongan asin pakasabot. Kaipuhan kitang umoyon na paagi sa maimbod na grupong oripon, epektibong giniyahan ni Jesu-Cristo an mga bagay para sa pagkaotob kan katuyohan ni Jehova sa makangangalas na paagi. (Mat. 24:​45-47; Col. 1:​9, 10) Ngonyan an maimbod na oripon dai pa sana nahaloy na iinanunsiar ini: “Poon sa 1995 pandistritong mga kombension asin sa Setyembre 1995 pansirkitong mga asamblea asin espesyal na mga aldaw nin asamblea, mayo nin ipupuwestong pagkakan. An kada saro dapat na magdara nin saiyang sadiring pagkakan asin inomon.” Iaaplikar man niato an areglong ini digdi sa Pilipinas. Puwedeng ipadagos kan pansirkitong mga asamblea asin espesyal na mga aldaw nin asamblea an saindang presenteng mga areglo sa pagpapakakan sagkod sa Agosto 1995 kun boot ninda. Minsan siring, an mga nakaiskedyul pakalihis kan Setyembre 1 susunodon an areglo sa enotan. Nasisierto niamo na magkakaigwa nin positibong reaksion sa anunsiong ini. Puwedeng interesado kamong maaraman kun paano an pagbabagong ini magigin kapakipakinabang. Tibaad an minasunod na pagrepaso sa mga pagliliwat na ginibo na sa dai pa sana nahahaloy na mga taon magigin marahay na pagirumdom sa mga pakinabang na naako na paagi sa pagpasimple kan trabaho sa mga kombension.

⁴ Nakaaging mga Pagliliwat Tanganing Mapasimple: Bago kan pinasimpleng mga areglo sa pandistritong kombension, siring baga kan pagpapakakan, pagboboluntaryo, asin dadagusan, dakol na gibohon an hinahagad sa rinibong lokal na tugang sa trabaho bago an kombension. Huli sa mga kagipitan sa satong mga tugang dahelan sa pan-aroaldaw na pamumuhay asin sa padagos na pagtalubo kan organisasyon, tunay nanggad na kaipuhan an mga pagliliwat tanganing mapasimple an gibohon. Dagdag pa, bilang resulta kan pagpasimple kan saindang pagpapakakan sa Estados Unidos kan 1978, labing 70,000 na tugang na dating mahigos na nagtatrabaho durante kan mga sesyon tanganing makatao sa sato nin pagkakan an nakahinanyog sa programa. Kan 1987 dugang pang pagpasimple an ginibo sa Estados Unidos sa pagpapakakan sa mga kombension asin Assembly Hall. Dai nahaloy, nakukua kan mga nag-aatender an pagkakan na mayong bayad sa mga kombension asin asamblea. Kanigoan karahay na mga pagliliwat ini, na mas pinagian an trabaho asin nagtotogot na mas orog na atension an ikatao sa espirituwal na mga kabtang kan kombension, na an mga trabahador nakahihinanyog asin orog na nakikinabang sa programa. (Deut. 31:12) Pero anong gibohon an puwede pang haleon tanganing magin posible para sa dakol pa na makinabang nin lubos sa espirituwal na programa?

⁵ Inaantisipar na mga Pagbabago: Durante kan mga taon na pinasimpleng pagkakan an ipinuwesto sa Estados Unidos asin sa iba pang nasyon, naheling na “nagkapira sanang bagay” an tunay na “kaipuhan.” (Ikomparar an Lucas 10:​38-42.) Alagad, nangahulogan pa man giraray ini nin dakolon na suplay asin gibohon, siring man nin mahal na kasangkapan. Saro pa, kaipuhan an kadakol na boluntaryo tanganing organisaron asin suportaran an mga areglo. Naggagamit an Sosyedad nin darakulang refrigerated trailer sa nagkapirang nasyon tanganing ibiyahe an pagkakan sa dakol na milya. Nangaipo ini nin mantension. Paagi sa dugang pang pagpasimple, an ekstrang gibohon asin gastos na ini mahahale na.

⁶ An boluntad na paglilingkod kan mga nagboluntaryo sa mga lugar na ini pinahahalagahan na marhay. Minsan siring, paagi sa dugang pang pagpasimpleng ini, an dakol na tugang na nagtrabaho sa pamamakal, pag-andam, asin pagpuwesto kan pagkakan magagamit an saindang panahon sa ibang mahalagang mga aktibidad kan Kahadean, kabale an lubos pang kaogmahan sa pakikiasosyar sa mga kombension. An mga boluntaryo na naglingkod sa pagpapakakan makakatabang na ngonyan sa ibang departamento, arog baga kan Attendants asin Paglinig. Pagigianon kaini an paninimbagan kan gabos asin dai maghahagad na dakol an magtrabaho sagkod sa matanga, amay na aga, o durante kan mga sesyon, siring sa nagin kamugtakan kan dakol sa Pagpapakakan.

⁷ Pagsuportar sa mga Areglo: Pinahahalagahan na gayo kan Sosyedad an marahay na suporta na itinao nindo mga tugang na may “bilog na puso” sa nag-aging mga taon sa mga areglo nin kombension, kabale an pagpapakakan. (1 Cron. 29:9) Nakatabang ini sa dakol na paagi. Pinagin posible kaiyan na mag-arkila nin mga pasilidad sa kombension asin masustentohan an mga gastos kan kombension. Pinangyari man kaiyan an mga nag-aatender na magdanay sa lugar nin kombension durante kan pahingalo sa odto tanganing kombenyenteng makakua nin pagkakan, marepreskohan, dangan magin presente para sa espirituwal na programa. Asin daing duwa-duwa na an pagkabuka-an-palad asin suporta na ipinaheling kan mga tugang sa boluntad na pagkontribuwir para sa mga gastos kan kombension mapadagos, na ginagamit an mga kahon nin kontribusyon.​—Tal. 11:25; Luc. 16:9.

⁸ Pag-asikaso kan Saindong mga Pangangaipo sa Pagkakan: Minsan siring, huli sa dugang pang pagliliwat na ini, kaipuhan na an mga indibiduwal asin pamilya magtagama para sa sainda sanang sadiri kan kinakaipuhan na materyal na pagkakan durante kan pahingalo niato sa odto. Kabale digdi an mga payunir, na madara man kan sadiri nindang pagkakan, siring kan saindang ginigibo kun sinda nasa destino nindang teritoryo. Pinahahalagahan tang gayo an marahay na mga pakinabang sa espirituwal na programa. Magigin bakong madonong an pagtao nin dai na maninigong importansia sa pisikal na pagkakan. Mahalaga na an kada saro “makasierto sa orog na mahalagang mga bagay” manongod kaini. (Fil. 1:​9, 10a) An dai pa sana nahahaloy na darakulang kombension kan banwaan ni Jehova sa Polandia, Rusya, asin Ukraine, siring man sa iba pang lugar, nagibo na igwa nin marahay na kapangganahan na mayo nin mga areglo sa pagpapakakan. Sa mga lugar na ini, an mga delegado nagdara kan saindang sadiring pangodtohan. Manonompongan niato na kun madara sana kita nin merienda sa pangodto, bakong nin magabat na pagkakan, makakakontribuwir iyan sa satong pagkakaigwa nin alistong isip, tanganing lubos na makinabang sa programa sa hapon. Kaoyon kaini, an gabos maninigong magdara nin pagkakan na simple asin masustansia. Halimbawa, kan pakakanon ni Jesus an mga kadaklan, duwa sana an itinao nia, tinapay asin sira. (Mat. 14:​16-20; helingon man an Lucas 10:42a.) Sa katuyohan na iyan, naoogma kaming magtao nin nagkapirang suhestion sa kun ano an puwedeng magin angay asin praktikal huli sa pinahalipot na pahingalo sa odto asin sa klase nin mga pasilidad na ginagamit niato.

⁹ Mantang mayo na nin mga areglo sa pagpapakakan sa kombension, paagi sa marahay na pagplano an mga nag-aatender makakapamahaw kaiba kan saindang pamilya magsalang sa harong o sa saindang dinadagusan, o sa sarong lokal na kakanan. Paagi sa pagtorog nin supisyente kan nakaaging banggi, sierto na kamo makakamata nin amay tanganing andamon an kaipuhan para sa saindong pamahaw asin pangodto asin umabot sa kombension na nasa panahon tanganing makiasosyar sa ibang delegado.

¹⁰ An pahingalo sa odto magigin medyo halipot kisa sa nakaaging mga kombension. Minsan siring, magtatao pa man giraray iyan nin oportunidad na kumakan nin simple, siring man nin panahon para sa pakikiasosyar sa iba. An satong mga tugang na lalaki asin babae na nag-iistar sa lugar kan kombension o sa harani asin aroaldaw na nagpupuli sa banggi pasil sanang makakaandam nin dikit na pagkakan para sa kada miembro kan pamilya na babalonon para sa pahingalo sa odto sa aldaw na iyan. Magigin ining kaparehong gayo kan pangodtohan na binabalon nin mga hobenes sa eskuwelahan, tibaad dikit na maluto asin panira, o sarong sanwits asin prutas, sopas, asin inomon. Dakol na tawo an nagbabalon nin kaagid na mga pangodtohan sa saindang sekular na mga trabaho.

¹¹ Daing duwa-duwa na matao ini nin orog na angat para sa mga maatender hale sa mga lokalidad sa luwas kan lugar kan kombension, huling kaipuhan an patienot na pagplano para sa saindang pangodtohan. Puwedeng darahon hale sa harong an mga bagay na siring baga kan mga serbilyeta asin sararoan sanang gamit na baso. Puwedeng manompongan nin nagkapira na an merienda na preskong prutas igo na tanganing mapanigoan an saindang mga pangangaipo, asin puwede man ining darahon hale sa harong. An iba pang pangangaipo sa pagkakan para sa pahingalo sa odto kada aldaw puwedeng bakalon sa mga tindahan nin pagkakan sa lugar kan kombension.

¹² Huli sa bagong areglong ini, mas gusto mi na an gabos na maatender hale sa hararayong lugar sumurat asin humagad nin mga dadagusan sa pribadong mga harong o hotel na harani, imbes na sa mga eskuwelahan o saen man sa palibot kan istadyum. Ini huli ta estriktong MAYO NIN PAGLULUTO NA TOTOGOTAN SA ANO MAN NA ORAS SA LAOG KAN PASILIDAD KAN KOMBENSION. Bako sanang peligroso ini, makanoson man iyan na paghelingon. Kun siring an mga boot na magluto nin para sa saindang pahingalo sa odto kaipuhan na gibohon ini sa harong o sa saindang dinadagusan bago sinda dumuman sa kombension. O tibaad may sarong tindahan na harani sa saindong dinadagusan na igwa nin mga pagkakan na luto na. An pagbakal kan klaseng ini nin pagkakan na luto na hahaleon o iinaan an pag-andam nin pagkakan sa saindong mga dinadagusan. Sa ibang parte kan nasyon aram nin mga tugang kun paano aandamon an maluto sa paagi na dai iyan mapanos maski pakalihis nin nagkapirang aldaw. Siring man, an badi o tinapa o adobo minahaloy na dai minapanos. Kun ini ikaaandam nin patienot, malilikayan kaiyan an pagluto kada aldaw.

¹³ Mantang an lugar kan kombension aktuwal na nagigin sarong dakulang Kingdom Hall durante kan kombension, madonong man na likayan na magin garo piknik an kamugtakan durante kan pahingalo sa odto. Sa katuyohan na ini, magigin pinakamarahay para sa kada miembro nin pamilya na magkaigwa nin sadiri niang sadit na balonan, na puwedeng panoon nin pagkakan bago maghale sa dinadagusan sa aga, imbes na magdara nin dakulang lalagan dangan magluwag kaiyan sa kada miembro kan pamilya sa kombension. Asin kun paanong dai kita nagkakakan durante kan mga pagtiripon sa Kingdom Hall, dai man kita makakan o mainom durante kan mga sesyon sa kombension. An darakulang pampamilyang cooler na pampiknik dai itotogot sa pasilidad kun saen ginigibo an kombension. Puwede iyan magin dahelan nin mga peligro asin dai puwedeng iwalat sa mga pasilyo o ibugtak sa mga tukawan. An magagamit giraray na mga supot o saradit na lalagan na plastik tibaad mas angay sa mga merienda na kakaipuhanon para sa pahingalo niato sa odto. Kun kaipuhan, puwedeng gamiton an sadit na cooler na puwedeng ibugtak sa irarom, bakong sa ibabaw, nin tukawan.

¹⁴ Kaipuhan man na mag-ingat mapadapit sa mga klase nin inoman na gusto tang darahon sa lugar kan kombension. An mainit o malipot na mga inomon puwedeng darahon na nasa mga termo. An ano man na klaseng lalagan na mapapasaon puwede nanggad na magin peligro. Hinahagad mi, kun siring, na MAYO NIN LALAGAN NA MAPAPASAON na dadarahon sa mga lugar kan kombension. Kun an napili nindong malipot na inomon dai nababakal sa sarong lalagan na plastik o aluminio, pinakamarahay na ipalis iyan sa saro pang sadit na plastik na lalagan.

¹⁵ Dagdag Pang mga Pakinabang: Tunay na maheheling niato an kadonongan nin siring na liniwat na mga areglo. An gabos makatatao nin lubos na atension sa pag-ako nin espirituwal na mga pakinabang​—-an tunay na katuyohan kan satong pagtiripon. An mga pakinabang na ini itinatao sa pakikiasosyar niato siring man sa programa mismo. Kaya imbes na lumuwas pa sa panahon kan pahingalo sa odto tanganing bumakal nin pagkakan sa hararaning restawran, mas kapakipakinabang na magbalon kita nin makakakan. Gigibohon kaining posible na makiasosyar sa satong mga tugang na lalaki asin babae asin oolangon kita na malihisan an ano man sa programa sa hapon. Didisganaron man kaiyan an satong pagbakal sa mga paratinda sa luwas na boot na aprobetsaran an darakulang kadaklan.

¹⁶ Huling narepreskohan sa espirituwal pakatapos kan programa sa hapon, an iba tibaad gustong ipadagos an Kristianong pag-iribaiba kaiba kan pamilya asin mga katood sa sarong mas bastanteng pagkakan sa lokal na mga restawran. An iba puwedeng bumakal na sana nin pagkakan sa sarong groseriya na aagihan papuli. An mga makakapuli sa saindang sadiring harong puwedeng mamanggi duman, siring sa saindang ginigibo sa ibang mga aldaw na ginagamit ninda sa sekular na trabaho o sa paglilingkod sa langtad.

¹⁷ Tunay na ikinaoogma niato an espirituwal na bangkete sa mga asamblea asin kombension na ini, kun saen nag-aako kita nin bagong mga publikasyon, marahay na pagtotokdo, asin praktikal na sadol. An mga bendisyon na ini an nagigirumdoman nin gabos, kaiba an kagayagayahan na makaiba an nagkakatiripon na banwaan nin Dios. An Talinhaga 10:22 nagsasabi: “An bendisyon ni Jehova​—iyan an nakakapayaman, asin dai nia iyan dinadagdagan nin kakologan.” Ini huli ta bilang banwaan ni Jehova, dai kita nag-aatender nin mga kombension na an katuyohan kamtan an materyal na mga kamawotan asin kaginhawahan. Nagtitiripon kita na igwa nin pagmawot na magkamit kan pinakadakulang pakinabang na mapupuwede sa espirituwal na paagi, asin mayaman kitang binibendisyonan ni Jehova huli sa espiritu na ipinaheheling niato.​—1 Tim. 6:​6-8; Heb. 11:6.

¹⁸ An mga okasyon na ini para sa pagpapakosog nagpapagirumdom man sa sato kan pag-oswag kan espirituwal na pag-ani. (Juan 4:​35, 36) An pambukas na mga tataramon sa Isaias kapitulo 54 inaapodan an arog-agom na organisasyon ni Jehova na mag-andam para sa magayagayang mga pag-oswag. An dugang pang pagtalubo, paghiwas, asin binagong kakosogan natatanaw na siring sa pagkahula ni Isaias: “Pahiwasa an lugar kan saimong tolda. Asin paignitan sa sainda an mga tahob kan saimong dakulang tabernakulo. Dai ka magduwaduwa. Palabaa an mga lubid kan saimong tolda,asin pasariga an mga taldok kan saimong tolda. Huli ta magkakagirisi ka sa too asin sa wala.” An kaotoban kan nakaoogmang hulang ini nagresulta sa pambihirang paghiwas nin tunay na pagsamba na naheheling niato ngonyan.​—Isa. 54:​1-4.

¹⁹ Tunay na malinaw na dalan nin marahay na paghusgar na ipaotob an orog pang pinasimpleng areglong ini sa kombension tanganing paagi sa mas dikit na kaolangan an gabos magkamit kan inandam na espirituwal na programa. Nagtitiwala kami na ini man bebendisyonan ni Jehova, huling totogotan kaiyan an orog kaepektibong pag-asikaso sa orog pang pagtalubo. Paagi sa pagsentro kan atension sa kinakaipuhan, makapaggagayagaya kita sa satong iplinanong mga aldaw nin maogmang asosasyon asin espirituwal na marahay na mga bagay. Sinsero niatong pamibi na bendisyonan logod ni Jehova an gabos niatong paghihingoa mantang nagpapadagos kita na magtiripon asin kumakan sa saiyang lamesa.​—Ikomparar an Deuteronomio 16:​14, 15.

[Kahon sa pahina 6]

Mga Pakinabang sa Mayong mga Areglo sa Pagpapakakan

◼ Kadikit an gibohon bago, durante, asin pakatapos kan programa, na nagtotogot nin mas dakol na pakikiasosyar

◼ Mayong mamanteneron na kasangkapan sa pagpapakakan

◼ Mas dakol na tawo an nakatatao nin lubos na atension sa espirituwal na programa

◼ Mas dakol na boluntaryo an andam na tumabang sa ibang departamento

◼ Mas dakol na oras an magagamit para sa ibang teokratikong aktibidad

Isinusuherir na mga Bagay na Mababalon Para sa Pahingalo sa Odto

◼ Magian sa tulak, simple, luto nang pangodtohan

◼ Preserbadong mga prutas, sanwits, preskong prutas

◼ Saradit na cooler kun kaipuhan

◼ Mga soft drink, fruit juice, o tubig na nasa bakong mapapasaon na mga lalagan

DAI Pagdarahon sa Pasilidad kan Kombension

◼ Mga inomon na de-alkohol

◼ Mapapasaon na mga lalagan

◼ Darakulang pampamilyang cooler na pampiknik

◼ Ano man na lutuan