Hapot

◼ Anong atension an kaipuhan na itao sa kasangkapan na ginagamit niato sa pagpatotoo?

¹ Dawa ngani igwa nin nasa isip na angay na Makakasuratan na pag-atubang, puwedeng bakong andam an sarong parahayag kun mapadapit sa kasangkapan na ginagamit nia. Kun nasa pinto, tibaad mayo sia kan presenteng alok na literatura, o tibaad kumos o paknit an mga magasin, brochure, asin tract sa saiyang bag na ginagamit sa pagpapatotoo. Tibaad dai nia nakukua an panurat o house-to-house record huli ta an saiyang bag bakong tama an pagkaorganisar.

² Importante na magtao nin maingat na atension sa saindong kasangkapan bago makikabtang sa paglilingkod sa langtad. Ano an maninigong yaon sa sarong kompleto an laog na bag na ginagamit sa pagpapatotoo? Mahalaga an Biblia. Iiba an suplay nin mga house-to-house record. Siertohon na igwa kamo kan publikasyon na iinaalok para sa bulan. Kaipuhan man an presenteng mga luwas kan mga magasin siring man an mga tract asin brochure. Magdara nin kopya kan librong Reasoning. An pagkaigwa kan pinakahuring An Satong Ministeryo sa Kahadean tatabangan kamo na marepaso an isinuherir na mga pag-atubang bago magduman sa pinto. An pagkaigwa nin kopya kan saro sa satong mga publikasyon na dinisenyo para sa mga hobenes tatabangan kamo na magin andam na makipag-olay sa mga tin-edyer.

³ An gabos na bagay na ginagamit maninigong nasa marahay na kamugtakan asin aregladong marhay sa saindong bag. An bag dai man kaipuhan na bago, pero maninigo iyan na magin malinig asin marahay an kamugtakan. An bag na ginagamit nindo sa pagpapatotoo sarong kabtang kan saindong kasangkapan na ginagamit sa pagpahayag kan maogmang bareta. Pagdanayon iyan na nasa marahay na kamugtakan.