Hapot

◼ Ano an tamang paggamit kan mga terminong “brother” asin “sister”?

Kun ginagamit sa literal na kahulogan, an mga terminong “brother” asin “sister” (sa Bicol, “tugang“) ipinanonongod sa mga indibiduwal na gikan sa iyo man sanang mga magurang. An natural na relasyon na ini parateng nagbubunga nin mainit na pagkadayupot.

Tinokdoan kita ni Jesus na apodon si Jehova sa pamibi na ‘Ama Niato.’ Nagpaparisa ini na bilang mga Kristiano, kita gabos kabtang nin sarong dayupot na pamilya. Sa siring sinabihan ni Jesus an saiyang mga parasunod: “Kamo gabos magturugang.”—Mat. 6:9; 23:8.

Huli sa satong dayupot na espirituwal na pagkaborogkos sa laog kan harong nin Dios, inaapod niato an lambang saro na “Brother” asin “Sister,” partikularmente sa mga pagtiripon kan kongregasyon. Durante kan mga pagtiripon na ini, an nangengenot minimidbid an bautisadong mga indibiduwal paagi sa paggamit kan ekspresyon na “brother” o “sister” na sinusundan kan apelyido kan saro.

Kumusta kun an saro na dai pa bautisado boot na makikabtang sa mga pagtiripon? Kun an saro haloy-haloy nang nakiaasosyar asin pasiring na sa pagdusay, na ibinibilang an saiyang sadiri na saro sa Mga Saksi ni Jehova, mayo nin sala sa pag-apod sa saiya na “Brother” o “Sister.” Nangorognang totoo ini kun an indibiduwal nagin nang dai pa bautisadong parahayag.

Sa ibong na kampi, an interesadong mga tawo na dai pa sana nahahaloy na magpoon na umatender sa mga pagtiripon dai pa nakagibo kan mga tangga na nagpapamidbid sa sainda na kabtang kan harong nin Dios. An mga indibiduwal na ini dai aapodon na “Brother” o “Sister,” huling an espirituwal na relasyon kan pamilya nin Dios mayo sa saindang kamugtakan. Kaya durante kan mga pagtiripon, aapodon ta sinda sa mas pormal na paagi, na ginagamit an angay na titulo na arog nin “Mr.” kaiba kan saindang apelyido. An paggamit kan ekspresyon na “brother” asin “sister” sa satong mga pagtiripon nagpaparisa nin sarong bogkos na dayupot na marhay kisa sa ano man na ipinaririsa kan paggamit nin mga ngaran. Ipinagigirumdom kaiyan sa sato an maogmang marhay na relasyon na nakakamtan niato bilang sarong espirituwal na pamilya sa irarom kan satong Ama, si Jehova Dios.—Efe. 2:19; 1 Ped. 3:8.