Hapot
◼ Siisay an maninigong mamibi sa mga pagtiripon kan kongregasyon?
An pamibi sa kongregasyon sarong mahalagang marhay na kabtang kan satong pagsamba. Sarong mahalagang marhay na pribilehio asin magabat na paninimbagan an pagrepresentar sa iba sa atubangan ni Jehova. Huli sa importansia kaiyan, an kamagurangan kaipuhan na gumamit nin marahay na paghusgar kun nagdedesisyon kun sairisay na mga tugang na lalaki an kualipikadong mamibi sa mga pagtiripon. An bautisadong mga tugang na lalaki na nagrerepresentar sa kongregasyon maninigo na maygurang na Kristianong mga ministro na midbid bilang marahay na mga halimbawa asin iginagalang kan kongregasyon. Maninigo na an saindang reberente asin magalang na mga pamibi maghayag nin marahay na relasyon ki Jehova Dios. An artikulong “Praying Before Others With a Humble Heart” sa Mayo 15, 1986 na luwas kan The Watchtower nagtatao nin mahalagang mga prinsipyo na nangorognang nakakatabang para sa mga namimibi sa publiko para sa kongregasyon.
Dai papamimibion kan kamagurangan an sarong tugang na lalaki kun sia midbid sa kuestionable o malokong gawe-gawe. Dai mapili nin sarong tugang na lalaki na may tendensiang maghinanakit o may inklinasyon na gamiton an pampublikong pamibi bilang paagi na ipahayag an personal na mga dai pagkaintindihan. (1 Tim. 2:8) Maski ngani bautisado na an sarong tinedyer na tugang na lalaki, dapat na determinaran kan kamagurangan kun baga sia maygurang na sa espirituwal na mamibi para sa kongregasyon.—Gibo 6:1, 2.
Kun minsan sa mga pagtiripon bago lumuwas sa paglilingkod sa langtad, tibaad kaipuhan na sarong bautisadong tugang na babae an mamibi kun mayo nin kualipikadong tugang na lalaki na marepresentar sa grupo. Kaipuhan niang gumamit nin angay na kolbong. Kun posibleng mayo nin kualipikadong tugang na lalaki na magigin presente sa nagkapirang pagtiripon bago lumuwas sa paglilingkod, maninigong mag-asignar an kamagurangan nin sarong kualipikadong tugang na babae na mangengenot.
Pinagkatodan nang an tsirman sa Pampublikong Pagtiripon an namimibi sa pagpoon. Minsan siring, sa ibang mga pagtiripon kan kongregasyon, na dakol an kualipikadong tugang na lalaki, an iba apuera kan tugang na lalaki na nagbukas kan pagtiripon o kan saro na iinasignar sa ultimong kabtang puedeng apodon na mamibi sa kapinonan o katapusan. Ano man an kamugtakan, an tugang na lalaki na aapodon na mamibi sa pagtiripon kan kongregasyon maninigong paisihon antes pa tangani na makapaghorophorop sia kan saiyang sasabihon. Dangan sia makatatao nin surusumpay, odok na pamibi na angay sa partikular na pagtiripon na iyan.
An siring na mga pamibi dai kaipuhan na halawig. Kun an sarong tugang na lalaki namimibi sa publiko, sa parate sia mas masasabotan kun sia nakatindog, na ipinahahayag an saiyang sadiri na may supisyenteng kosog nin boses, asin nagtataram nin malinaw. Totogotan kaini an gabos na nagtitiripon na madangog an pamibi asin sa pagtatapos magsabi nin odok sa pusong “Amen!”—1 Cron. 16:36; 1 Cor. 14:16.