Kamo daw Bilog na Panahon na Saksi?
1 Masimbag daw kamo nin iyo sa hapot na ini? Minsan ngani bakong gabos na dusay na lingkod ni Jehova puedeng ilista sa bilog na panahon na ministeryo, bako daw rasonableng laoman na kita gabos maninigong mansayon an satong sadiri bilang saiyang bilog na panahon na mga Saksi? Maninigo nanggad na iyo.
2 Mayo kan inaapod na por orang Kristiano. Si Jesus nagsabi manongod sa saiyang Ama: “Danay kong ginigibo an mga bagay na nakapaoogma sa saiya.” (Juan 8:29) Si Pablo, na nakamate man kaiyan, sinadol kita na “gibohon an gabos na bagay sa ikamumuraway nin Dios.” (1 Cor. 10:31) Kun siring tunay nanggad na kita gabos maninigong midbidon an satong sadiri bilang bilog na panahon na mga Saksi ni Jehova. An pagrumdom niato na kita bilog na panahon na mga Saksi magkakaigwa nin nagdadanay na impluwensia sa gabos na aktibidad na ginigibo niato.
3 Konsideraron an Ebidensia: An satong itsura, pagtaram, asin gawe-gawe puedeng magparisa sa ibang mga tawo na kita tunay na Saksi ni Jehova. Namamatean niato na kaipuhan an mabining itsura, nakapakokosog na pagtaram, asin angay na gawe-gawe kun kita naglilingkod sa langtad o nag-aatender sa Kristianong mga pagtiripon. Minsan siring, baga man kita nag-eeskuela, nagtatrabaho nin sekular, o nag-aaling-aling, an gabos manongod sa sato maninigong magtao nin ebidensia na kita namumuhay sono sa matanos na mga pamantayan ni Jehova.
4 Si Jesus nagsabi: “An siudad dai matatago kun namumugtak sa itaas nin bukid. . . . Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mat. 5:14-16) Maninigong totoo ini sa gabos na ginigibo niato asin sa gabos na panahon. Kun madiskobre niato na kita nagduduwaduwang magpatotoo huli sa lugar na satong namumugtakan o sa satong ginigibo, kaipuhan niatong hapoton an satong sadiri, ‘Ako daw naglilingkod ki Jehova nin por ora o bilog na panahon?’ Dai logod niato noarin man palihison an oportunidad na kaolayon an iba manongod sa maogmang bareta kan Kahadean nin Dios.
5 Girumdomon, tinatawan niato nin onra asin pinaoogma si Jehova kun makasisimbag kita nin makosog na “Iyo!” sa hapot na, “Kamo daw bilog na panahon na Saksi?”