Mahiwas na Idistribwir an Kingdom News Num. 35

¹ An Oktubre asin Nobyembre magigin sibot na mga bulan para sa sato gabos. Durante kan enot na 11 aldaw ngonyan na Oktubre, iaalok niato an lambang kopya kan An Torrengbantayan asin Awake! Dangan, poon sa Domingo, Oktubre 12, sagkod sa Domingo, Nobyembre 16, maiba kita sa bilog na kinaban na pagdistribwir kan Kingdom News Num. 35. Pribilehio niatong darahon an importanteng mensahe sa gabos na tawo sa satong lugar. Iyan an simbag sa hapot na, “Magkakaminorootmootan Pa daw an Gabos na Tawo?” Durante kan espesyal na kampanyang ini, ididistribwir niato an Kingdom News Num. 35 sa ordinaryong mga aldaw kan semana. Sa mga Sabado asin Domingo, dagdag pa sa pag-atubang kan Kingdom News, itatampok niato an bagong luwas kan mga magasin.

² Siisay an Puedeng Makikabtang? Siring kan dati, an kamagurangan an mangengenot sa gibohon. An gabos naoogmang magdistribwir nin Kingdom News, asin mayong duwa-duwa na kadakol na parahayag an mapalista bilang auxiliary payunir durante kan saro o duwang bulan kan kampanya. An ibang mga parahayag bobooton na gumamit nin mas dakol na panahon sa ministeryo kisa kan dati.

³ Igwa daw kamong estudyante sa Biblia na haloy-haloy na sa saiyang pag-adal sa librong Kaaraman asin madali nang makualipikar na maglingkod sa langtad? Tibaad puede na siang magin dai pa bautisadong parahayag sa panahon na iyan tanganing makiiba sa kampanya kan Kingdom News. An kaipuhan saro sanang simpleng pag-atubang sa pag-introdusir kan tract. Halimbawa, puedeng sabihon nin saro: “Importanteng marhay an mensaheng ini kaya idinidistribwir iyan sa bilog na kinaban ngonyan na bulan sa 169 lenguahe. Boot kong magkaigwa kamo nin personal na kopya.” Maski an sadit na mga aki puedeng magkaigwa nin marahay na pakikikabtang sa maogmang gibohon na ini.

⁴ An mga nangengenot sa pag-adal sa libro maninigong enkaminaron an lambang miembro kan saindang grupo na makikabtang nin lubos sa pagdistribwir kan Kingdom News Num. 35. Tibaad may mga parahayag man na nagin inaktibo alagad magigin aktibo giraray sa paglilingkod kun mag-aako sinda kan kinakaipuhan na pagparigon sa boot. Bago an kampanya, maninigong dalawon kan kamagurangan an kada saro sa mga ini tanganing maheling kun ano an magigibo sa pagtabang sa sainda na umiba sa eksperyensiadong mga parahayag sa kabtang na ini kan ministeryo.

⁵ Noarin Kita Puedeng Magtiripon Bago Lumuwas sa Paglilingkod? An gabos na aktibidad na ini mangangaipo nin mga areglo para sa grupong pagpapatotoo na kapwa kombenyente asin praktikal. Kun posible, maninigong mag-organisar nin mga pagtiripon bago lumuwas sa paglilingkod para sa kada ordinaryong aldaw kan semana, sa mga Sabado asin Domingo, asin sa mga banggi. Iyan maninigong gibohon sa mga panahon na magpapangyari sa mga parahayag asin payunir na lubos na aprobetsaran an panahon kan pagpapatotoo. Puede man na gumibo nin mga areglo na magtiripon sa mga oras bago bumanggi para sa kapakinabangan kan mga estudyante sa eskuelahan, relyibong trabahador, asin iba pa. Maninigong siertohon kan paraataman sa paglilingkod na igwa nin dakol na teritoryo sa pagharongharong asin lugar nin negosyo tanganing an gabos makapakikabtang nin lubos sa gibohon. Sa lugar na dakol an parahayag, maninigo na magin madonong sinda dapit sa kun pira an maghuhulit sa sarong kabtang nin teritoryo.

⁶ Kumusta Man an mga Mayo sa Harong? Gusto niatong personal na makaolay an pinakadakol na kagharong na mapupuede tangani na ipaliwanag kun taano ta maninigo nindang basahon an Kingdom News Num. 35. Kaya kun mayo ni sarong tawo sa harong sa pagsongko nindo, isurat an adres asin sumongko giraray sa laen na oras kan aldaw. Kun pag-abot kan huring semana kan kampanya bako pa man giraray mapanggana an mga paghihingoa nindo na makaolay an mga kagharong na ini, puede kamong magwalat nin sarong kopya kan Kingdom News sa pinto sa lugar na dai iyan maheheling nin mga nag-aagi. Sa residensial na mga lugar, magin alistong ialok an Kingdom News sa mga indibiduwal na tibaad naglalakaw sa tinampo. Kun naggigibo sa puerang mga lugar asin kun saen dakol pa an teritoryo na dai makokobrehan durante kan kampanya, puedeng magwalat nin sarong kopya kan Kingdom News sa mga mayo sa harong sa enot na pagsongko.

⁷ Ano an Satong Katuyohan? Maninigong hingoahon kan mga kongregasyon na gamiton an saindang enterong suplay kan Kingdom News tanganing makobrehan an gabos nindang teritoryo bago matapos an kampanya sa Nobyembre 16. Kun talagang dakula an asignadong teritoryo sa saindong kongregasyon asin kun ligtas na gibohon nin nagsosolo kisa sa may kapadis, puedeng manompongan nindong praktikal na gibohon iyan. Pangyayarihon kamo kaini na mapaabotan kan maogmang bareta an pinakadakol na maninigo na mapupuede. (Mat. 10:11) Puedeng magin kapakipakinabang na magdara kamo nin nagkapirang tract asin sarong Biblia sa saindong bulsa o sadit na bag, kisa sa gumamit nin portpolyo. Seguradohon na magkaigwa nin sarong marahay na rekord kun saen may nanompongan na interes.

⁸ Andam Na daw Kamong Pumoon? Maninigong antisiparon kan kamagurangan kun pirang dagdag na magasin an kakaipuhanon kan kongregasyon asin maninigong magpedido sono dian. Dai na kaipuhan na pedidohon an Kingdom News Num. 35, huling ipadadara an suplay sa kada kongregasyon. Kun saen may supisyenteng teritoryo, an mga espesyal, regular, asin auxiliary payunir maresibi nin 250 kopya kada saro na ididistribwir, mantang an mga parahayag kan kongregasyon tatawan nin 50 kopya kada saro. Dakol kitang gigibohon. Galaga daw kamong makikabtang sa nakaoogmang marhay na aktibidad na ini? Mayong duwa-duwa na iyo. Mahiwas na idistribwir niato sagkod sa mapupuede an importanteng mensahe na basado sa Biblia na nasa Kingdom News Num. 35!