Kita Maninigong Magin mga Paratokdo, Bako Sanang mga Parahulit
1 Naoobserbaran na an “Mga Saksi ni Jehova aktuwal na nalalakopan an kinaban kan saindang paghuhulit.” Paano ini nagin posible? Bakong paagi sa puersa o kapangyarihan nin tawo, kundi paagi sa espiritu nin Dios na naghihiro sa saiyang mga lingkod mantang ginagamit ninda an manlaenlaen na probisyon tanganing otobon an sugo sa sainda na paghuhulit asin pagtotokdo.—Zac. 4:6; Gibo 1:8.
2 An inimprentang mga babasahon iyo an epektibong paagi tanganing magibo an satong paghuhulit. Sa nakalihis na mga taon bilyones na libro, pulyeto, brosyur, magasin, asin tracts an inimprenta asin idinistribwir kan Mga Saksi ni Jehova tanganing tumabang sa pagpaisi kan maogmang bareta kan Kahadean. An mga report sa 1997 Yearbook nagpapaheling na an pagprodusir nin mga babasahon luminangkaw na marhay. Sagkod sa presente, labi sa 91 milyones (91,000,000) na kopya kan New World Translation an naimprenta. Sa sarong taon an bilang kan magasin na An Torrengbantayan asin Awake! na inimprenta sa Estados Unidos luminangkaw nin 7.1 porsiento. Sa Alemania, an pagprodusir kan magasin luminangkaw nin 35 porsiento. Labi sa un-tersio kan mga magasin na pinoprodusir duman sa Alemania an para sa langtad na Ruso.
3 Taano ta nangangaipo nin kadakoldakol na babasahon? Sa bilog na kinaban, nagkaigwa nin dakulaon na simbag sa pagparigon sa boot na itinao sa sato na magpatotoo saen man igwa nin mga tawo. Mientras na dakol sa sato an nagpapahiwas kan satong paghuhulit—sa pampublikong mga lugar, sa mga tinampo, asin sa lugar nin negosyo—mas dakol na babasahon an ikinapapasakamot sa mga tawo na nagpapaheling nin interes. Dakol sa mga ini an bihirang nagkaoportunidad kaidto kun igwa man na makadangog kan mensahe kan Kahadean. Tanganing mapanigoan an pangangaipong ini, an mga kongregasyon perming igwa nin manlaenlaen na publikasyon na magagamit sa gabos na kabtang kan ministeryo.
4 Ano an Satong Pasohan sa Pagwaras nin Babasahon? An satong pasohan bako sanang magpasakamot nin babasahon. Kalabot sa sugo sa sato na gumibo nin mga disipulo an duwang aspekto—paghuhulit asin pagtotokdo. Enot, igwa kita nin pribilehio na paghuhulit kan maogmang bareta kan Kahadean, na ipinapaaram sa mga tawo na iyan an solamenteng paglaom para sa katawohan. (Mat. 10:7; 24:14) An satong basado sa Bibliang mga babasahon probado asin epektibong instrumento sa pagpukaw nin interes asin pagtao nin kaaraman sa iba manongod sa Kahadean.
5 Ikaduwa, tanganing makagibo kita nin mga disipulo, dapat na itokdo niato an gabos na mga bagay na ipinagboot ni Jesus. (Mat. 11:1; 28:19, 20) Sa giraray, an mga babasahon may importanteng kabtang sa pagpapaabot niato kan katotoohan sa puso kan mga estudyante, na tinatabangan sindang magin mga disipulo.
6 Idtong mga nag-aako nin babasahon tibaad ‘mga paradangog kan tataramon,’ alagad tibaad dai sinda magin mga paragibo kaiyan kun basta sana sindang babayaan. (Sant. 1:22-25) Kakadikit kan magigin mga disipulo apuera sana kun may magiya sa sainda. (Gibo 8:30, 31) Nangangaipo sinda nin paratokdo tanganing tabangan sinda na patunayan sa saindang sadiri an katotoohan na makukua sa Kasuratan. (Gibo 17:2, 3) An satong pasohan iyo na tabangan sinda na umoswag sagkod sa punto nin pagdusay asin pagpabautismo, asin patoodon sinda na magin biyong kualipikado sa pagtokdo sa iba.—2 Tim. 2:2.
7 Kaipuhan na Marhay an Orog Pang mga Paratokdo: Kun kita naghuhulit, kita nagbabalangibog kan maogmang bareta sa publiko. Minsan siring, kalabot sa pagtotokdo an pagtao nin instruksion sa saro sa progresibong paagi. Mantang paagi sa paghuhulit naaaraman kan iba an mensahe kan Kahadean, an pagtotokdo nakatatabang sa mga indibiduwal na akoon an maogmang bareta asin humiro kaoyon kaiyan. (Luc. 8:15) Bako sanang pagbalangibog an ginigibo nin paratokdo; sia nagpapaliwanag, nakikipagrasonan na may marahay na argumento, nagtatao nin mga prueba, asin nagbebensir.
8 An dakol sa sato sagkod na mapupuede kaipuhan na magin mga paratokdo, bako sanang mga parahulit. (Heb. 5:12a) An pagdistribwir nin mga babasahon sarong mahalagang marhay na kabtang kan satong gibohon, alagad an pakagibo kan ikaduwang obheto sa satong ministeryo sa katapustapusi madepende sa kun ano an satong ginigibo bilang mga paratokdo. Minsan ngani naoogma kita kun nakakapasakamot kita nin babasahon, tanganing maotob niato nin lubos an satong ministeryo, dai ta maninigong mansayon na an pagpasakamot an satong pangultimong pasohan. (2 Tim. 4:5) An mga ikinapasakamot epektibong instrumento sa pagbukas kan oportunidad na ikatokdo sa iba an katotoohan.
9 Dumalaw Liwat Tanganing Makapoon nin mga Pag-adal sa Biblia: Segurado na gabos kita nakapasakamot na nin nagkapirang libro, brosyur, asin magasin, na nagkokompilar nin medyo dakol na lista nin mga dadalawon liwat. Maninigong mag-iskedyul kita nin regular na panahon sa pagbalik liwat tanganing pumukaw nin interes. An satong pangenot na katuyohan sa pagdalaw liwat bakong an magpasakamot giraray nin babasahon kundi enkaminaron an mga tawo na basahon asin pakinabangan an yaon na sa sainda. Gurano na daw an satong pag-oswag sa espirituwal kun bakong dahel duman sa nagparaburubuelta tanganing tabangan kita na magkaigwa nin tamang kaaraman?—Juan 17:3.
10 Kultibaron an gabos na interes na an katuyohan makapoon nin pag-adal sa Biblia magsalang sa brosyur na Ano an Kahagadan sa Sato nin Dios? o sa librong Kaaraman na Minagiya Pasiring sa Buhay na Daing Katapusan. An duwang publikasyon na ini ipinipresentar an mensahe kan Kahadean sa paaging pasil maintindihan. An brosyur na Kahagadan igwa nin kompletong leksion sa pag-adal, na kinokobrehan an pundamental na mga katokdoan kan Biblia. An librong Kaaraman nagpapangyari sa saro na itokdo an katotoohan nin mas detalyado, pero simple, klaro, asin halipot.
11 An pinasimpleng programa sa pagtotokdo, siring sa ipinaliwanag sa suplemento kan Hunyo 1996 na An Satong Ministeryo sa Kahadean, pinapapasil an pagtokdo kan paratokdo asin an pakanood kan estudyante. Magsaray nin kopya kan suplementong iyan na magagamit tolos-tolos sa pagrepaso kan mga metodo asin pamamaagi sa pagtotokdo na napatunayan nang epektibo. An nagkapira sa mga suhestion na itinatao kaiyan may labot sa kun paano magkaigwa nin tunay na personal na interes sa estudyante, gurano kadakol na materyal an dapat makobrehan sa sarong sesyon, paano sisimbagon an mga hapot na bakong konektado sa tema, paano an paratokdo asin an estudyante parehong makakaandam nin patienot para sa pag-adal, asin kun paano ididirehir an estudyante pasiring sa organisasyon ni Jehova. Sa pagsunod sa mga suhestion, dakol sa sato, kabale na an mga bagohan, an makakokondukta nin progresibong pag-adal.
12 Mga Bareta nin Kapangganahan Hale sa Langtad: An brosyur na Kahagadan asin an librong Kaaraman nagin mahalagang pantabang sa pagparikas kan paagi nin paggibo nin mga disipulo. Kan maresibi an brosyur na Kahagadan, an sarong tugang na lalaki sa Bolivia tolos-tolos na ginamit iyan sa pagpoon nin pag-adal kaiba an arong lalaki. Pakalihis nin apat na bulan sa sarong pandistritong kombension, an estudyanteng ini kabale sa maogmang mga kandidato para sa bautismo!
13 Dakol an napahihiro na idusay an saindang buhay ki Jehova pakatapos nindang adalan an librong Kaaraman. Sa sarong kongregasyon sa Angola, an bilang nin mga nag-aadal sa Biblia na kinokonduktahan kan mga parahayag naglangkaw nin hale sa 190 sagkod 260 asin an bilang nin mga nag-aatender sa pagtiripon nagin doble hale sa 180 sagkod 360 sa laog sana nin apat na bulan pakalihis na an librong Kaaraman pinonan na gamiton sa lugar na iyan. Dai nahaloy pakatapos kaiyan, kinaipuhan nang magporma nin saro pang kongregasyon.
14 Pakatapos na ponan an saiyang enot na pag-adal sa librong Kaaraman, an sarong tugang na lalaki nagsabi na an pagkondukta kaiyan “simple kun ihahapot sana kan konduktor an mga hapot, babasahon an pirang aplikableng teksto, asin sisiertohon na naiintindihan kan estudyante.” Minsan ngani kaidto pa an paghona nia kualipikado sanang mga parahayag an puedeng magkondukta nin progresibong mga pag-adal sa Biblia asin na dai nia noarin man magigibo iyan, narealisar nia na kaya nia, asin sia nagsabi: “Kun kaya ko, kaya man nin maski siisay.”
15 Paagi sa pagkondukta nin mga pag-adal sa Biblia bilang parte kan satong ministeryo naootob niato an obheto na gumibo nin mga disipulo. Nanompongan kan mga nakapatalubo kan abilidad sa pakikikabtang sa aspektong ini nin ministeryo na iyan totoong nakakokontento asin kapakipakinabang na gayo. Masabi logod manongod sa sato na kita man “naghuhulit kan kahadean nin Dios . . . asin itinotokdo an mga bagay manongod sa Kagurangnan na si Jesu-Cristo na may lubos na katalingkasan nin pagtaram.”—Gibo 28:31.