Sarong Progresibong Paghorophorop sa Apuradong Paggibo nin mga Disipulo
1 Bago maghale digdi sa daga, pinagbotan ni Jesus an saiyang mga parasunod na ‘gumibo nin mga disipulo sa mga tawo kan gabos na nasyon.’ Nagkaipo ini na ponan ninda an sigidong kampanya nin paghuhulit asin pagtotokdo patin pahiwason an saindang aktibidad sa bilog na ineerokan na daga. (Mat. 28:19, 20; Gibo 1:8) Minansay daw ninda an sugong ini na sarong pagabat—na masakit na marhay na pasanon? Dai sono ki apostol Juan. Pakatapos nin 65 taon bilang paragibo nin disipulo, sia nagsurat: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakapagagabat.”—1 Juan 5:3.
2 Pinatutunayan kan Makakasuratan na rekord kan aktibidad kan enot na mga Kristiano na ginibo ninda na may pagkaapurado an sugo sa sainda na gumibo nin mga disipulo ni Jesu-Cristo. (2 Tim. 4:1, 2) Ginibo ninda ini, bako sanang huli ta obligasyon, kundi huli sa saindang mamomoton na kamawotan na omawon an Dios asin darahon sa iba an paglaom na kaligtasan. (Gibo 13:47-49) Huling an gabos na nagin disipulo nagin man mismong paragibo nin mga disipulo pakatapos kaiyan, an Kristianong kongregasyon marikas na nag-oswag kan enot na siglo.—Gibo 5:14; 6:7; 16:5.
3 Pinaririkas an Paggibo nin mga Disipulo: Ginigibo sa ika-20 siglong ini an nakalalabi sa gabos na paggibo nin mga disipulo sa gabos na panahon! Sagkod sa presente, minilyon na tawo an nag-ako kan maogmang bareta asin naghiro oyon dian. (Luc. 8:15) Mantang marikas nang nauubos an panahon kan presenteng palakaw nin mga bagay, tinawan kita kan “fiel asin madonong na oripon” nin mga kasangkapan na nagpapagin posible na an mga tawo na sadiosan an puso marikas na makanood kan katotoohan.—Mat. 24:45.
4 Kan 1995 naresibi niato an librong Kaaraman na Minagiya Pasiring sa Buhay na Daing Katapusan, asin kan 1996 sinundan iyan kan brosyur na Ano an Kahagadan sa Sato nin Dios? Mapadapit sa librong Kaaraman, an luwas na Enero 15, 1996 kan An Torrengbantayan, pahina 14, nagsabi: “An 192-pahinas na librong ini puedeng pag-adalan sa medyo halipot na panahon, asin an mga ‘may tamang tendensia sa buhay na daing katapusan’ maninigong makanood nin bastante sa pag-adal kaiyan tanganing magdusay ki Jehova asin magpabautismo.”—Gibo 13:48.
5 An Hunyo 1996 na suplemento kan An Satong Ministeryo sa Kahadean, “Kun Paano Magibo nin mga Disipulo Paagi sa Librong Kaaraman,” itinao sa sato an pasohan na ini: “Depende sa mga kamugtakan asin kakayahan kan estudyante, tibaad posibleng makobrehan nindo an kadaklan na kapitulo sa laog nin mga sarong oras na sesyon, na dai man hinihidale an pag-adal. Mas maoswag an mga estudyante kun kapwa an nagtotokdo asin estudyante sinusunod an saindang iskedyul sa pag-adal kada semana.” An artikulo nagsabi pa: “Maninigong laoman na sa panahon na matapos na nin saro an pag-adal sa librong Kaaraman, an sinseridad asin rarom kan interes nia na maglingkod sa Dios risa na.” An “Hapot” sa An Satong Ministeryo sa Kahadean na Oktubre 1996 nagpaliwanag: “Linalaoman na sa laog nin halipot sanang panahon, matatabangan nin epektibong paratokdo an sarong sinserong estudyante na magkamit nin supisyenteng kaaraman tangani na gumibo nin madonong na desisyon na maglingkod ki Jehova.”
6 Nagbubunga an Librong Kaaraman: Kan panahon na bautismohan an sarong hoben na babae, isinaysay nia kun ano an nagin saboot nia dapit sa pag-adal sa librong Kaaraman. Medyo haloy-haloy na siang nag-adal sa librong Mabuhay Sagkod Lamang. Kan iluwas an librong Kaaraman, buminalyo sa bagong libro an tugang na babae na nag-aadal sa saiya. Dai nahaloy, nasabotan kan estudyante na ini magkakaipo nin desisyon sa kabtang nia, asin sia namotibar na marikas na umoswag poon kaidto padagos. An hoben na babae, na ngonyan tugang na niato, nagsabi: “Tinabangan ako kan librong Mabuhay Sagkod Lamang na mamotan si Jehova, alagad tinabangan ako kan librong Kaaraman na magdesisyon na maglingkod ki Jehova.”
7 Isip-isipa kun gurano karikas na nakanood kan katotoohan an saro pang babae. Pakatapos kan saiyang ikaduwang pag-adal, nag-atender sia nin pagtiripon sa Kingdom Hall durante kan dalaw kan paraataman sa sirkito. Kan semanang idto, durante kan ikatolo niang pag-adal, nagsabi sia sa paraataman sa sirkito na sia nagdusay na ki Jehova asin boot nang magin dai pa bautisadong parahayag. Nakipag-olay sia sa kamagurangan, na inaprobaran sia bilang parahayag, asin kan sumunod na semana nagpoon na sia sa paglilingkod sa langtad. Nagin siang seryosong marhay sa saiyang pag-adal sa Biblia kaya nagbakasyon sia sa saiyang trabaho tanganing makapag-adal nin duwa o tolong beses sa sarong semana asin magkaigwa nin dakol na panahon sa ministeryo. Kun beses, kinokobrehan ninda an duwa o tolong kapitulo kada sesyon. Pinonan niang iaplikar an saiyang nanonodan sa gabos na aspekto kan saiyang buhay, natapos an librong Kaaraman sa laog nin apat na semana, asin nag-oswag sagkod na mabautismohan!
8 An agom na lalaki nin sarong tugang na babae nagsasabi na kaidto pa saro na siang “tipikong daing pagtubod na agom.” Sarong aldaw, inalok sia nin sarong tugang na lalaki nin pag-adal sa Biblia sa librong Kaaraman sa kondisyon na an lalaki puedeng pumondo pakatapos kan enot na pag-adal o sa ano man na panahon pakatapos kaiyan. Uminoyon an agom na lalaki na probaran iyan, sa ibong kan pagigin maluyang estudyante kan sia hoben pa asin dai nakapag-adal nin ano man na klase nin relihiosong literatura sa laog nin labing 20 taon. Ano an nagin reaksion nia sa pag-adal sa librong Kaaraman? Sia nagsabi: “Tunay na sarong kaogmahan na manompongan na an pantabang na ini sa Biblia isinurat na may pagkasimple. An impormasyon iinatubang nin malinaw asin lohikong marhay kaya dai nahaloy, galaga na akong marhay sa pag-antisipar kan masunod niamong pag-adal. Ekspertong sinunod kan nagtotokdo sa sako an mga paagi nin paggibo nin disipulo na itinao kan Sosyedad, asin sa tabang kan espiritu ni Jehova, nabautismohan ako pakalihis nin apat na bulan. Totoong masasabi ko na kun patataluboon niato an pagkamoot sa paggibo nin mga disipulo, padagos na hahanapon sa ministeryo sa langtad an mga tama an kamugtakan nin puso, gagamiton an librong Kaaraman asin iba pang mga pantabang sa Biblia na isinusuplay kan Sosyedad asin, pinakaimportante, mamimibi para sa paggiya ni Jehova, magkakaigwa kita kan espesyal na marhay na pribilehio na tumabang sa paggibo nin mga disipulo.” Totoong pambihirang mga eksperyensia an nasa enotan. An kadaklan sa satong mga estudyante dai napapasa katotoohan nin siring kaini karikas.
9 An mga Estudyante Nag-ooswag sa Laen-Laen na Rikas: Dapat admitiron na an mga abilidad kapwa kan mga nagtotokdo asin estudyante kan Tataramon nin Dios puedeng dakula an pagkakalaen. An pagtalubo sa espirituwal puedeng maluway o marikas. An nagkapirang estudyante nag-ooswag sa laog sana nin pirang bulan mantang an iba tibaad mas halawig. An rikas kan pagtalubo nin saro sa espirituwal apektado kan saiyang edukasyon, kan sokol kan saiyang pagpahalaga sa espirituwal na mga bagay, asin kan rarom kan saiyang debosyon ki Jehova. Bakong gabos na inaadalan niato igwa kan “pinakadakulang pagkagalaga sa isip” na mag-adal kan Kasuratan aroaldaw, siring kan suanoy na mga taga Berea na nagturubod.—Gibo 17:11, 12.
10 Iyan an dahelan na an Abril 1998 suplemento kan An Satong Ministeryo sa Kahadean, na “Hinahanap—Dakol Pang Pag-adal sa Biblia,” itinatao an realistikong instruksion na ini: “Siempre, bakong gabos na estudyante sa Biblia parareho an rikas nin pag-oswag. An nagkapira bakong kapareho kan iba an inklinasyon sa espirituwal ni kapareho an rikas kan pagsabot sa itinotokdo. An iba sibot-sibot na marhay sa buhay asin tibaad dai ikadusay an panahon na kaipuhan tangani na matapos an bilog na kapitulo kada semana. Sa siring, sa nagkapirang situwasyon tibaad labi sa sarong sesyon nin pag-adal an kaipuhan tangani na matapos an nagkapirang kapitulo asin nagkapirang dagdag na bulan tangani na matapos an libro.”
11 An mga Paragibo nin Disipulo Pinagdadanay an Timbang na Pagmansay: Kaipuhan na turotimbangon an rikas kan pag-adal sono sa mga kamugtakan asin kakayahan kan estudyante. Huling ineenkaminar kita na pumoon nin mga pag-adal sa brosyur na Kahagadan, tibaad kaipuhan na duwa sagkod tolong bulan tangani na makobrehan iyan bago bumalyo sa librong Kaaraman. Kun gagamiton ta an gabos na suhestion na itinao sa Hunyo 1996 na suplemento kan An Satong Ministeryo sa Kahadean, puedeng anom sagkod siyam na bulan pa an kaipuhan tangani na matapos an librong Kaaraman. An iba na nagpoon pa sanang mag-adal sa librong Kaaraman buminalyo sa brosyur na Kahagadan tangani na matabangan an estudyante na manodan nin mas marikas an pundamental na mga katotoohan sa Biblia. Dangan ipinapadagos an pag-adal sa librong Kaaraman. Kun an pag-adal naponan sa librong Kaaraman asin halawig na an nakokobrehan, tibaad marahay na pag-adalan an brosyur na Kahagadan pakatapos kan libro, sa siring marikas na narerepaso an pundamental na mga katotoohan sa Tataramon nin Dios. Sa arin man na kamugtakan, habo niatong isakripisyo an pagkaigwa kan estudyante nin malinaw na pakasabot huli sana sa rikas. An lambang estudyante nangangaipo nin masarig na basehan para sa saiyang bago pa sanang makuang pagtubod sa Tataramon nin Dios.
12 Nakaaaram kun haen na kita sa sulog nin panahon, orog na apurado kisa kasuarin man na tabangan an iba na makanood kan katotoohan. Apuera sa padagos na pamimibi na logod makapoon nin bagong mga pag-adal sa Biblia, ipamibi niato an mga nakikipag-adal na sa sato. Dangan magigin kagayagayahan niato an padagos na pagbautismo nin dakol pang disipulo na ‘danay sagkod sa pagtatapos kan palakaw nin mga bagay.’—Mat. 28:20.