Hapot

◼ Gurano kahaloy na maninigong konduktahan an pormal na pag-adal sa Biblia sa sarong indibiduwal sa librong Kaaraman?

Binebendisyonan ni Jehova an saiyang organisasyon ngonyan. Naheheling niato an ebidensia kaini kada taon mantang rinibong bagohan an naninindogan para sa katotoohan. An librong Kaaraman napatutunayan na epektibong kasangkapan sa paggibo kaini. Idinoon kan Enero 15, 1996 na luwas kan An Torrengbantayan na dinisenyo an librong ini tangani na tabangan an estudyante sa Biblia na gumibo nin marikas na pag-oswag sa espirituwal, na tibaad makaabot sa punto nin bautismo sa laog nin pira sanang bulan.

Huli kaini, an iyo man sanang Torrengbantayan, sa pahina 17, nagsadol: “Kun an indibiduwal nakatapos na sa saiyang pag-adal sa Biblia sa librong Kaaraman asin nabautismohan na, tibaad dai na kaipuhan na magkondukta nin pormal na pag-adal sa saiya sa saro pang libro.”

Kumusta man an saro na dai nagpabautismo pakatapos kan librong Kaaraman? An Hunyo 1996 na An Satong Ministeryo sa Kahadean, pahina 6, parapo 23, nagpagirumdom sa sato kan sinabi kan An Torrengbantayan manongod sa dai na pakipag-adal sa estudyante sa dagdag pang mga libro pakatapos kan librong Kaaraman. Ini daw nangangahulogan na bako na kitang interesado sa pagtabang sa estudyante sa Biblia nin lihis pa sa puntong ini? Dai. Boot niato na an mga tawo mag-ako nin pundamental na kaaraman manongod sa katotoohan. Minsan siring, linalaoman na sa laog nin halipot sanang panahon, matatabangan nin epektibong paratokdo an sarong sinserong estudyante na magkamit nin supisyenteng kaaraman tangani na gumibo nin desisyon na maglingkod ki Jehova. Tibaad may mga estudyante sa Biblia na magmamawot pa nganing mag-adal nin labi sa sarong beses kada semana.

Totoo na may mga estudyanteng mas maluway umoswag kisa sa iba. Alagad kun pakatapos mapag-adalan an librong Kaaraman, na tibaad mas luminawig kisa sa ordinaryong kamugtakan, an saro dai pa nagdesisyon na boot niang makiasosyar sa kongregasyon, marahay na ipakipag-olay ini kan parahayag sa saro sa kamagurangan sa Komite nin Paglilingkod kan Kongregasyon. Kun kalabot an napapalaen na mga kamugtakan, tibaad kaipuhan an dagdag pang tabang. Kaoyon ini sa prinsipyo kan sinasabi sa parapo 11 asin 12 sa pahina 17 kan Enero 15, 1996 na Torrengbantayan.

An pagpahalaga dawa sa sarong pundamental na kaaraman manongod sa katotoohan maninigong magmotibar sa estudyante na umatender sa Kristianong mga pagtiripon. Puede kaining giyahan an estudyante na magtao nin malinaw na ebidensia kan saiyang pagmawot na maglingkod ki Jehova. Kun an siring na espirituwal na pagpahalaga dai naheheling pakatapos na makonduktahan an pag-adal sa librong Kaaraman sa laog nin halawig na peryodo, tibaad mas marahay na iontok na an pag-adal.