Hapot

◼ Ngonyan na igwa na kita kan librong Kaaraman na Minagiya Pasiring sa Buhay na Daing Katapusan, gurano kahaloy maninigong konduktahan an pag-adal sa Biblia sa harong?

Irinekomendar kan An Satong Ministeryo sa Kahadean kan Setyembre 1993 na an pag-adal sa Biblia sa harong dapat na ipadagos sa bagong mga interesado sagkod na mapag-adalan an duwang librong Puwede Kamong Mabuhay Sagkod Lamang sa Paraiso Digdi sa Daga asin Nagkakasararo sa Pagsamba sa Iyo Sanang Tunay na Dios. Ngonyan na igwa na kita kan librong Kaaraman, minalataw na angay nang gumibo nin pagliliwat sa prosedimientong ini, siring sa sinumaryo sa pahina 13 asin 14 kan Enero 15, 1996 na luwas kan An Torrengbantayan.

Dinisenyo an librong Kaaraman sa pagtabang sa mga “may tamang tendensia sa buhay na daing katapusan” na manodan an kaipuhan nindang maaraman tangani na magdusay ki Jehova asin magpabautismo. (Gibo 13:48) Kun siring, pakatapos sa bagong publikasyon na ini, dai na kaipuhan na pag-adalan an ikaduwang libro sa iyo man sanang estudyante. Mantang nag-ooswag an saindong mga estudyante sa Biblia, puede nindong parigonon an boot ninda na dugangan an saindang kaaraman paagi sa pag-atender sa mga pagtiripon siring man paagi sa pagbasa kan Biblia asin manlaenlaen na Kristianong publikasyon.

Kun pamilyar kamo sa mga hapot sa pahina 175 sagkod 218 kan librong Organized to Accomplish Our Ministry, puedeng makatabang ini. Dawa ngani dai nindo maninigong basahon an mga hapot na ini o repasohon iyan sa estudyante sa Biblia, tibaad marahay na idoon an mga punto sa librong Kaaraman na magpapangyari sa estudyante na ipahayag an tamang pakasabot sa pundamental na mga katotoohan kan Biblia kun repasohon kan kamagurangan an mga hapot sa mga kandidato sa bautismo.

Sa parate dai na kaipuhan na dagdagan an impormasyon sa librong Kaaraman, na nagtatao nin dugang pang mga argumento tanganing pahimutikan an falsong mga doktrina. Palalawigon sana kaini an pag-adal sa haloy-haloy na panahon. Imbes, linalaoman na an libro makokobrehan tolos-tolos, tibaad sa laog nin mga anom na bulan. Idinodoon kaini an pangangaipo na kita mag-adal nin patienot tangani na ikaatubang niato iyan nin malinaw asin diretso sa punto. Maninigo man na dagkahon an estudyante na mag-adal nin patienot, helingon an sitadong mga teksto, asin pagmaigotan na saboton kun ano an itinotokdo sa kada kapitulo.

Idinoon kan An Torrengbantayan an pangangaipo na kita magkondukta nin dakol pang epektibong pag-adal sa Biblia sa mas halipot na peryodo nin panahon.​—Isa. 60:22.