Kaipuhan kan Katawohan an Kaaraman nin Dios

“Masasabotan mo an pagkatakot ki Jehova, asin makukua mo an mismong kaaraman nin Dios.”​—TALINHAGA 2:5.

1. Taano ta masasabi na an puso nin tawo sarong obra maestra kan inhenieriya nin Dios?

MGA 5,600,000,000 na puso nin tawo an nagkukutab digdi sa daga ngonyan mismo. Kada aldaw, an saindong puso nagkukutab nin 100,000 na beses asin katimbang nin 7,600 na litro nin dugo an ibinobomba sa 100,000 kilometros na sistema nin mga ugat sa saindong hawak. Mayo nang ibang kalamnan na mas magabat an pagpunsionar kisa sa obra maestrang ini kan inhenieriya nin Dios.

2. Paano nindo ilaladawan an piguratibong puso?

² May nagpupunsionar man na 5,600,000,000 na piguratibong puso digdi sa daga. Nasa piguratibong puso an satong mga emosyon, an satong mga motibasyon, an satong mga kamawotan. Iyan an sentro kan satong kaisipan, kan satong pakasabot, kan satong kabotan. An piguratibong puso puedeng mapalangkaw o mapakumbaba, mamondo o maogma, duminiklom o naliwanagan.​—Nehemias 2:2; Talinhaga 16:5; Mateo 11:29; Gibo 14:17; 2 Corinto 4:6; Efeso 1:​16-18.

3, 4. Paano napaaabotan kan maogmang bareta an mga puso?

³ Nababasa ni Jehova Dios an puso nin tawo. Sinasabi kan Talinhaga 17:3: “An tunawan para sa pirak asin an horno para sa bulawan, alagad ta si Jehova an parasiyasat sa mga puso.” Minsan siring, imbes na basahon sana an kada puso asin hokoman iyan, ginagamit ni Jehova an saiyang mga Saksi tanganing mapaabotan kan maogmang bareta an mga puso nin tawo. Kaoyon ini kan mga tataramon ni apostol Pablo: “‘An gabos na nag-aapod sa ngaran ni Jehova maliligtas.’ Minsan siring, paano sinda mag-aapod sa saiya na dai ninda tinutubod? Paano man sinda matubod sa saiya na dai ninda nadangog? Paano man sinda makadadangog kun mayo nin parahulit? Paano man sinda maghuhulit kun dai sinda isinugo? Siring sa nasusurat: ‘Abaang gayon kan mga bitis kan mga nagpapahayag kan maogmang bareta nin marahay na mga bagay!’”​—Roma 10:​13-15.

⁴ Ikinaoogma ni Jehova na sugoon an saiyang mga Saksi sagkod sa kaporoporohi kan daga tanganing ‘magpahayag kan maogmang bareta nin marahay na mga bagay’ asin hanapon an mga igwa nin pusong nag-aako. Labing 5,000,000 na kita ngonyan​—na an katimbang 1 Saksi sa mga 1,200 katawo digdi sa daga. Bakong pasil an pagpaabot kan maogmang bareta sa binilyon digdi sa daga. Alagad ginigiyahan nin Dios an gibohon na ini paagi ki Jesu-Cristo asin dinadagka nia an mga sadiosan an puso. Sa siring, an hula na nasusurat sa Isaias 60:22 nagkakatotoo: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.”

5. Ano an kaaraman, asin ano an masasabi dapit sa kadonongan kan kinaban?

⁵ Ngonyan na an kapanahonan na iyan, asin sarong bagay an malinaw​—an binilyon digdi sa daga nangangaipo nin kaaraman. Sa pundamental, an kaaraman pagigin pamilyar sa mga katunayan na nakua paagi sa eksperyensia, obserbasyon, o pag-adal. Dakol nang kaaraman an natipon kan kinaban. May nagibo nang pag-oswag sa mga langtad na arog baga kan transportasyon, pag-ataman sa salud, asin komunikasyon. Alagad kaaraman daw kan kinaban an talagang kaipuhan kan katawohan? Bako nanggad! An guerra, pan-aapi, helang, asin kagadanan padagos na nandadamat sa katawohan. An kadonongan kan kinaban parateng nagigin arog nanggad sa ipinapadpad na mga baybay sa sarong bagyo sa disyerto.

6. Kun dapit sa dugo, paano nakakokomparar an kaaraman nin Dios sa kadonongan kan kinaban?

⁶ Sa pag-ilustrar: Kaidtong duwang siglo na an nakaagi, nakaugalean an pagpadugo bilang hinohonang bolong. Si George Washington, an enot na presidente kan Estados Unidos, paorootrong pinadugo sa huring mga oras kan saiyang buhay. Kaidto sia nagsabi: “Pabayae nindo akong magadan nin toninong; dai na ako maghahaloy.” Tama sia, ta nagadan sia kan mismong aldaw na idto​—Disyembre 14, 1799. Imbes na pagpadugo, ngonyan idinodoon an pag-ineksion nin dugo sa hawak nin tawo. An duwang paagi pareho may darang dakol na nakagagadan na problema. Minsan siring, durante kan bilog na panahon na ini, an Tataramon nin Dios nagsasabi: “Lumikay . . . sa dugo.” (Gibo 15:29) An kaaraman nin Dios perming tama, mapananarigan, sunod sa panahon.

7. Paano an tamang kaaraman sa Kasuratan nakakokomparar sa kadonongan kan kinaban kun dapit sa pagpadakula nin aki?

⁷ Horophoropa an saro pang halimbawa nin dai mapananarigan na kadonongan kan kinaban. Sa laog nin dakol na taon sinuportaran kan mga sikologo an mapagkonsinteng pagpadakula sa aki, alagad kan huri inadmitir kan saro sa mga nagsusuportar kaiyan na ini sala. An Asosasyon nin Pilolohiya sa Alemania sarong beses nagsabi na an pagkamapagkonsinte “minsan paano bakong direktang dahelan kan mga problema niato ngonyan sa mga hoben.” An kadonongan kan kinaban puedeng magpabarobago na garo ipinapadpad nin doros, alagad an tamang kaaraman sa Kasuratan marigon. An Biblia nagtatao nin timbang na hatol dapit sa pagpatood sa aki. “Sagweon mo an saimong aki asin dadarahan ka nia nin kapahingaloan patin tatawan ka nia nin kaogmahan sa saimong kalag,” an sabi kan Talinhaga 29:17. An siring na disiplina dapat na gibohon na may pagkamoot, ta si Pablo nagsurat: “Mga ama, dai nindo pagpaanggoton an saindong mga aki, kundi padagos na padakulaon sinda sa disiplina asin pagtatanos nin isip ni Jehova.”​—Efeso 6:4.

“An Mismong Kaaraman nin Dios”

8, 9. Paano nindo ipaliliwanag an sinasabi kan Talinhaga 2:​1-6 manongod sa kaaraman na talagang kaipuhan kan katawohan?

⁸ Minsan ngani si Pablo edukadong tawo, sia nagsabi: “Kun may naghohona dian sa saindo na sia madonong sa palakaw na ini nin mga bagay, magpakamangmang sia, tanganing sia magin madonong. Huli ta an kadonongan kan kinaban na ini kamangmangan sa Dios.” (1 Corinto 3:​18, 19) An Dios sana an makatatao kan kaaraman na talagang kaipuhan kan katawohan. Mapadapit kaiyan, an Talinhaga 2:​1-6 nagsasabi: “Aki ko, kun aakoon mo an sakong mga tataramon asin pahahalagahan mo an sakong mga togon, na magtao nin atension sa kadonongan paagi sa saimong talinga, tanganing ikakiling mo an saimong puso sa pakamansay; dugang pa, kun mag-apod ka sa pakasabot asin magkurahaw ka sa pakamansay, kun padagos mong hanapon iyan siring baga sa pirak, asin siring baga sa natatagong kayamanan padagos mong hanapon iyan, sa siring masasabotan mo an pagkatakot ki Jehova, asin makukua mo an mismong kaaraman nin Dios. Huli ta si Jehova nagtatao nin kadonongan; gikan sa saiyang ngoso an kaaraman asin pakamansay.”

⁹ An mga minomotibar nin marahay na puso nagtatao nin atension sa kadonongan paagi sa tamang paggamit kan kaaraman na tao nin Dios. Ikinikiling ninda an saindang puso sa pakamansay, na maingat na pinagtuturotimbang an mga katunayan na saindang nanonodan. Garo man sana sinda nag-aapod sa pakasabot, o an kakayahan na masabotan kun paano an mga aspekto nin sarong bagay konektado sa lambang saro. An mga matanos an puso nagtatrabaho na garo baga sinda nagkokotkot nin pirak asin naghahanap nin natatagong mga kayamanan. Alagad anong dakulang kayamanan an nakukua kan mga may pusong nag-aako? Iyan “an mismong kaaraman nin Dios.” Ano iyan? Sa simpleng pagtaram, iyan an kaaraman na yaon sa Tataramon nin Dios, an Biblia.

10. Ano an dapat niatong gibohon tanganing magkamit nin marahay na espirituwal na salud?

¹⁰ An kaaraman nin Dios daing depekto, marigon, nagtataong buhay. Iyan nagpapaoswag sa espirituwal na salud. Sinadol ni Pablo si Timoteo: “Ingatan mo an arogan nin marahay na mga tataramon na nadangog mo sako sa pagtubod asin pagkamoot na yaon ki Cristo Jesus.” (2 Timoteo 1:13) An lenguahe igwa nin arogan nin mga tataramon. Kaagid kaiyan, yaon sa “dalisay na tataramon” nin Makakasuratan na katotoohan “an arogan nin marahay na mga tataramon,” na sa pangenot basado sa tema kan Biblia na pagbindikar sa soberaniya ni Jehova paagi sa Kahadean. (Sofonias 3:9) Kaipuhan niatong isaisip asin isapuso an arogan na ini nin marahay na mga tataramon. Kun boot niatong malikayan an helang sa piguratibong puso asin magdanay na mabagsik sa espirituwal, an Biblia dapat niatong iaplikar sa buhay asin lubos na gamiton an espirituwal na mga probisyon na itinatao nin Dios paagi sa “maimbod asin madonong na oripon.” (Mateo 24:​45-47; Tito 2:2) Permi niatong girumdomon na para sa marahay na espirituwal na salud, kaipuhan niato an kaaraman nin Dios.

11. Ano an pirang dahelan kun taano ta kaipuhan kan katawohan an kaaraman nin Dios?

¹¹ Horophoropa an iba pang dahelan kun taano ta kaipuhan kan binilyon digdi sa daga an kaaraman nin Dios. Aram daw ninda gabos kun paano nag-eksister an daga asin mga tawo? Dai, dai ninda aram. Midbid daw kan bilog na katawohan an tunay na Dios asin an saiyang Aki? An gabos daw nakaiisi kan mga isyu na pinalataw ni Satanas mapadapit sa pagkasoberano nin Dios asin integridad nin tawo? Dai man. An kadaklan daw na tawo nakaaaram kun taano kita ta naggugurang asin nagagadan? Sa giraray sasabihon niato na dai. Minimidbid daw kan gabos na nag-eerok sa daga na an Kahadean nin Dios namamahala na ngonyan asin na kita nabubuhay na sa huring mga aldaw? May pakaisi daw sinda dapit sa maraot na espiritung mga puersa? An gabos daw na tawo igwa nin mapananarigan na kaaraman manongod sa kun paano magkakaigwa nin maogmang buhay pampamilya? Asin aram daw kan mga tawo na magayagayang buhay sa Paraiso an katuyohan kan satong Kaglalang para sa makinuyog na katawohan? Sa mga hapot man na ini an simbag dai. Malinaw nanggad, kun siring, kaipuhan kan katawohan an kaaraman nin Dios.

12. Paano niato masasamba an Dios “sa espiritu asin katotoohan”?

¹² Kaipuhan man kan katawohan an kaaraman nin Dios huli sa ipinamibi ni Jesus kaidtong ultimong banggi kan saiyang buhay digdi sa daga. An saiyang mga apostol siertong odok na napahiro na madangog siang magsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) An pag-aplikar kan siring na kaaraman iyo sana an paagi na akoon an pagsamba sa Dios. “An Dios Espiritu, asin idtong nagsasamba saiya kaipuhan na magsamba sa espiritu asin katotoohan,” an sabi ni Jesus. (Juan 4:24) Sinasamba niato an Dios “sa espiritu” kun kita pinahihiro nin puso na pano nin pagtubod asin pagkamoot. Paano niato sia sinasamba ‘sa katotoohan’? Paagi sa pag-adal sa saiyang Tataramon asin pagsamba sa saiya sono sa saiyang ihinayag na katotoohan​—“an mismong kaaraman nin Dios.”

13. Anong pangyayari an nasusurat sa Gibo 16:​25-34, asin ano an manonodan niato dian?

¹³ Rinibo an minapoon na sumamba ki Jehova kada taon. Pero, dapat daw na konduktahan nin pag-adal sa Biblia an interesadong mga tawo sa halawig na panahon, o posible daw para sa mga sadiosan an puso na mas marikas na makaabot sa pagpabautismo? Bueno, horophoropa an nangyari sa kaso kan bantay sa bilanggoan asin kan saiyang pamilya na nasambitan sa Gibo 16:​25-34. Si Pablo asin Silas nabibilanggo sa Filipos, alagad sa kamatangaan kan banggi, sarong makosog na linog an nagbukas sa mga pinto kan bilanggoan. Naghohona na nakadulag an gabos na bilanggo asin na sia padudusahan nin makuri, an bantay sa bilanggoan mahugot na kutana kan sabihan sia ni Pablo na sinda gabos yaon duman. Si Pablo asin Silas “nagtaram kan tataramon ni Jehova sa saiya kaiba kan gabos na nasa saiyang harong.” An bantay na idto sa bilanggoan asin an saiyang pamilya mga Hentil na dai tatao sa Banal na Kasuratan. Pero, sa sarong bangging idto, sinda nagturubod. Labi pa kaiyan, ‘an gabos, sia asin an saiyang harong nabautismohan.’ Idto pambihirang mga kamugtakan, alagad an mga bagohan tinokdoan nin pundamental na mga katotoohan dangan nakanood nin iba pang mga bagay sa mga pagtiripon kan kongregasyon. An kapareho kaiyan posible ngonyan.

An Anihon Mahiwas!

14. Taano ta may pangangaipong magkondukta nin mas dakol na epektibong pag-adal sa Biblia sa mas halipot na peryodo nin panahon?

¹⁴ Marahay kun an Mga Saksi ni Jehova makakokondukta nin mas dakol na epektibong pag-adal sa Biblia sa mas halipot na peryodo nin panahon. Igwa nin tunay na pangangaipo kaini. Halimbawa, sa kadagaan sa Sirangan na Europa an mga tawo dapat na magpalista asin maghalat na sinda adalan sa Biblia. Nangyayari man iyan sa iba pang lugar. Sa sarong banwaan sa Republika nin Dominica, kadakoldakol kan nakikiolay sa limang Saksi kaya dai ninda nakakayang konduktahan an gabos na inaadalan. Ano an ginibo ninda? Dinagka ninda an mga interesado na umatender sa mga pagtiripon sa Kingdom Hall saka magpalista asin maghalat na adalan sinda sa Biblia. Pareho an situwasyon sa dakol na lugar sa bilog na daga.

15, 16. Ano an itinao tanganing mas marikas na ikapalakop an kaaraman nin Dios, asin ano an nagkapirang katunayan manongod kaiyan?

¹⁵ Mahiwas na mga teritoryo​—darakulang oma na aanihon—​an nabubuksan para sa banwaan nin Dios. Minsan ngani si Jehova, an “Kagurangnan kan anihon,” nagsusugo nin dakol pang paraani, kadakol pa kan gigibohon. (Mateo 9:​37, 38) Kun siring, tanganing mas marikas na ikapalakop an kaaraman nin Dios, may itinao an ‘maimbod na oripon’ na diretso sa punto na nagtatao nin espesipikong impormasyon tangani na an mga inaadalan sa Biblia makagibo nin espirituwal na pag-oswag sa kada leksion. Iyan sarong bagong publikasyon na marikas na matatapos sa mga pag-adal sa Biblia sa harong​—posibleng sa laog nin pirang bulan. Asin iyan magian na darahon sa satong mga portpolyo, sa satong mga bag, o maski sa satong mga bulsa! An ginatos na ribong nagtiripon sa “Magayagayang mga Paraomaw” na Pandistritong mga Kombension kan Mga Saksi ni Jehova naogmang akoon an bagong 192-pahinas na librong ini na may titulong Kaaraman na Minagiya Pasiring sa Buhay na Daing Katapusan.

¹⁶ An mga parasurat sa laen-laen na kadagaan nag-andam nin materyal na maingat na tinapos asin inaprobaran para sa librong Kaaraman. Sierto kun siring na magugustohan iyan sa gabos na nasyon. Alagad mahahaloy pa daw bago iluwas an bagong librong ini sa mga tataramon kan mga tawo sa bilog na kinaban? Dai, huli ta an 192-pahinas na libro mas marikas na ikatatradusir kisa sa darakulang libro. Kan Oktubre 1995, inaprobaran kan Komite sa Pagsurat kan Namamahalang Grupo an pagtradusir kan librong ini hale sa Ingles pasiring sa labing 130 tataramon.

17. Anong mga bagay an maninigong magpagin pasil sa paggamit kan librong Kaaraman?

¹⁷ An mga detalye sa kada kapitulo kan librong Kaaraman maninigong magpangyari sa mga inaadalan na umoswag nin marikasrikas sa espirituwal. Iinaatubang kan libro an Makakasuratan na mga katotoohan sa nakapakokosog na paagi. Dai kaiyan ipinaliliwanag nin detalyado an falsong mga doktrina. An pagigin klaro kan tataramon asin lohikong pagkapaliwanag maninigong magpagin pasil sa paggamit kan libro sa pagkondukta nin mga pag-adal sa Biblia asin sa pagtabang sa mga tawo na masabotan an kaaraman nin Dios. Apuera sa kotadong mga teksto, may sitadong mga teksto sa Biblia na puedeng basahon kan inaadalan sa pag-andam nia para sa orolay. Puede ining basahon durante kan pag-adal kun itinotogot nin panahon, minsan ngani bakong madonong na magdagdag nin materyal na puedeng makapalibog sa pangenot na mga punto. Imbes, maninigong hingoahon kan mga nagkokondukta nin mga pag-adal sa Biblia na mamansayan asin ikapasabot sa inaadalan an pinatutunayan kan libro sa kada kapitulo. Nangangahulogan ini na an nagtotokdo dapat na mahigos na mag-adal, tanganing magin malinaw na gayo sa saiyang isip an pangenot na mga punto.

18. Ano an mga isinusuherir mapadapit sa paggamit kan librong Kaaraman?

¹⁸ Paano maparirikas kan librong Kaaraman na Minagiya Pasiring sa Buhay na Daing Katapusan an paggibo nin mga disipulo? An 192-pahinas na librong ini puedeng pag-adalan sa medyo halipot na panahon, asin an mga “may tamang tendensia sa buhay na daing katapusan” maninigong makanood nin bastante sa pag-adal kaiyan tanganing magdusay ki Jehova asin magpabautismo. (Gibo 13:48) Kaya gamiton niato nin marahay sa ministeryo an librong Kaaraman. Kun an sarong inaadalan sa Biblia haloy-haloy nang nag-aadal sa saro pang libro, tibaad praktikal na taposon iyan. Kun bako, isinusuherir na an mga pag-adal sa Biblia ibalyo sa librong Kaaraman. Pagkatapos kan bagong publikasyon na ini, dai isinusuherir na magkondukta nin pag-adal sa saro pang libro sa iyo man sanang inaadalan. Puedeng luboson kan mga minaako kan katotoohan an saindang kaaraman paagi sa pag-atender sa mga pagtiripon kan Mga Saksi ni Jehova siring man sa sainda mismong pagbasa sa Biblia asin manlaenlaen na Kristianong publikasyon.​—2 Juan 1.

19. Bago magkondukta nin mga pag-adal sa Biblia sa librong Kaaraman, taano ta makatatabang na repasohon an pahina 175 sagkod 218 kan Organized to Accomplish Our Ministry?

¹⁹ Isinurat an librong Kaaraman sa katuyohan na tabangan an saro na masimbag an gabos na hapot na rinerepaso kan kamagurangan sa dai pa bautisadong mga parahayag na nagmamawot na magpabautismo bilang Saksi ni Jehova. Huli kaini, bago nindo ibalyo sa bagong publikasyon na ini an saindong presenteng mga inaadalan sa Biblia, irinerekomendar na tawan nindo nin pirang oras an pagrepaso sa mga hapot na nasa pahina 175 sagkod 218 kan librong Organized to Accomplish Our Ministry.a Tatabangan kamo kaini na idoon an simbag sa mga hapot na iyan durante kan mga pag-adal sa Biblia sa librong Kaaraman.

20. Ano an pinaplano nindong gibohon sa librong Kaaraman na Minagiya Pasiring sa Buhay na Daing Katapusan?

²⁰ An mga tawo sa gabos na lugar maninigong makadangog kan maogmang bareta. Iyo, kaipuhan kan katawohan an kaaraman nin Dios, asin si Jehova igwa nin mga Saksi tanganing magpahayag kaiyan. Ngonyan yaon sa sato an bagong libro na itinao kan satong mamomoton na langitnon na Ama paagi sa maimbod asin madonong na oripon. Gagamiton daw nindo iyan tanganing itokdo an katotoohan asin magtao nin onra sa banal na ngaran ni Jehova? Siertong bebendisyonan kamo ni Jehova mantang kamo lubos na naghihingoang ikapaabot sa dakol an kaaraman na minagiya pasiring sa buhay na daing katapusan.

[Nota sa Ibaba]

Ano an Saindong Simbag?

◻ Paano nindo ilaladawan an piguratibong puso?

◻ Ano an kaaraman nin Dios?

◻ Taano ta kaipuhan kan katawohan an kaaraman nin Dios?

◻ Ano an makukuang bagong libro, asin paano nindo pinaplanong gamiton iyan?

[Retrato sa pahina 10]

Kadakol kan dahelan kun taano ta kaipuhan kan binilyon digdi sa daga an kaaraman nin Dios