Naogma an Gabos sa Pagluwas kan Bagong Libro sa Pandistritong Kombension
Itinatampok kan Bagong Libro an Kaaraman nin Dios
1 Sa satong pandistritong kombension kan Disyembre, kanigoan an satong kaogmahan sa bilog na programa! Kan Sabadong hapon nagsopay an satong kagayagayahan kan madangog niato an paisi manongod sa bagong libro, an Kaaraman na Minagiya Pasiring sa Buhay na Daing Katapusan, asin sa konektadong impormasyon na suminunod. Kaipuhan kan binilyon na tawo digdi sa daga an kaaraman na solamente an Dios an makatatao—kaaraman dapit sa Dios asin sa saiyang Aki, si Jesu-Cristo.—Tal. 2:1-6; Juan 17:3.
2 Abaa kalinaw na ilinadawan kan espiker an mga kabtang kan libro! An nakaaakit na mga tema kan kapitulo, praktikal na mga ilustrasyon, positibong pag-atubang kan katotoohan, bakong komplikadong mga hapot, asin, sa poro kan kada kapitulo, sarong kahon na may temang “Baloon an Saindong Kaaraman” kabilang sa tampok na mga kabtang na makaaakit sa gabos na nagbabasa kaiyan.
3 Durante kan pantapos na mga pahayag kan Sabado asin Domingo, naparigon an boot niato na magkaigwa nin pampamilyang pag-adal na ginagamit an bagong librong ini. Ngonyan, posibleng pamilyar na kita sa mga laog kaiyan. Daing duwa-duwa na napag-olayan na nindo an mga punto na isasaisip kun nag-aalok kan bagong librong ini sa langtad.
4 Mga Punto sa Pagrepaso: Tibaad nagigirumdoman nindo na kan iinaatubang an temang “Kun Taano ta Kaipuhan kan Katawohan an Kaaraman nin Dios,” idinoon kan espiker an nagkapirang punto, kabale an minasunod: (1) Kun ginagamit nindo an librong ini sa pagkondukta nin mga pag-adal, bakong madonong na magdagdag nin materyal, na puedeng makapalibog sa pangenot na mga punto; magkonsentrar sana sa pagpasabot kan pinatutunayan kan libro sa kada kapitulo. (2) May tama sanang laba an mga kapitulo tangani na sa parate makobrehan nindo an saro sa kada pag-adal nindo. (3) Sa poro kan kada kapitulo, an mga hapot sa kahon na may temang “Baloon an Saindong Kaaraman” matao nin halipot na repaso.
5 Gamiton sa mga Inaadalan sa Biblia: Nagkapira nang parahayag an naghapot kun baga madonong na ibalyo an saindang mga inaadalan sa Biblia sa bagong librong ini. Kun haloy-haloy na kamo sa libro na pinag-aadalan sa presente, magigin praktikal na taposon an pag-adal sa publikasyon na iyan. Kun bako pa, irinerekomendar na bumalyo kamo sa librong Kaaraman. Kun ginamit nindo an sarong brochure o tract sa pagpoon nin pag-adal sa Biblia, sa tamang panahon, iintrodusir an bagong libro asin gamiton iyan sa saindong pag-adal sa Biblia sa harong. An dugang pang impormasyon manongod sa paggamit kan librong Kaaraman maluwas sa An Satong Ministeryo sa Kahadean sa masunod na mga bulan.
6 Itinao ni Jehova an bagong librong ini tangani na tabangan kitang tokdoan an iba dapit sa kaaraman na minagiya pasiring sa buhay na daing katapusan. Ngonyan kaipuhan kitang mag-andam na marhay asin lubos na makikabtang sa gibohon na dapat pang gibohon.