‘Paano Ko Magigibo Iyan Kun Daing Gumiya sa Sako?’
1 Kan hapoton kan paraebanghelyong si Felipe an kapon na Etiope kun nasasabotan nia an saiyang binabasa sa Tataramon nin Dios, an lalaki nagsimbag: “An totoo, paano ko magigibo iyan, kun daing gumiya sa sako?” Sia maogmang tinabangan ni Felipe na masabotan an maogmang bareta manongod ki Jesus, na nagresulta sa pagpabautismo tolos-tolos kan lalaki. (Gibo 8:26-38) Kinukuyog ni Felipe an sugo gikan ki Cristo na ‘gumibo nin mga disipulo sa mga tawo kan gabos na nasyon, na bautismohan sinda asin tokdoan sinda.’—Mat. 28:19, 20.
2 Kaipuhan niatong kuyogon an sugo na gumibo nin mga disipulo, siring kan ginibo nin Felipe. Minsan siring, an klase nin marikas na pag-oswag sa espirituwal kan kapon na Etiope dai parateng naheheling sa mga tawo na inaadalan niato sa Biblia. An lalaking iyan, sarong Judiong proselito na tuodan na marhay sa Kasuratan, may pusong mapaghimate asin nagkakaipo na sanang akoon na si Jesus an ipinanugang Mesiyas. Sarong angat kun an mga inaadalan niato bakong pamilyar sa Biblia, nalagalag nin falsong relihiosong mga katokdoan, o nagagabatan sa depisil na personal na mga problema. Ano an makatatabang sa sato na magin mapanggana sa paggiya sa mga inaadalan sa Biblia sa pagdusay asin bautismo?
3 Mansayon an Espirituwal na mga Pangangaipo kan Inaadalan sa Biblia: An suplemento kan An Satong Ministeryo sa Kahadean na Agosto 1998 trinatar an lawig nin panahon na puede kitang makipag-adal sa mga tawo, na ginagamit an brosyur na Kahagadan asin an librong Kaaraman. Itinao kaiyan an instruksion na ini: “Kaipuhan na turotimbangon an rikas kan pag-adal sono sa mga kamugtakan asin kakayahan kan estudyante. . . . Habo niatong isakripisyo an pagkaigwa kan estudyante nin malinaw na pakasabot huli sana sa rikas. An lambang estudyante nangangaipo nin masarig na basehan para sa saiyang bago pa sanang makuang pagtubod sa Tataramon nin Dios.” Huli kaini, marahay na dai hidalion na matapos an pinag-aadalan sa librong Kaaraman na nasa isip an paghihingoang matapos an libro sa laog nin anom na bulan. Tibaad labi pa sa anom na bulan an kaipuhan tangani na matabangan an nagkapirang indibiduwal na umoswag sagkod sa punto nin bautismo. Mantang pinamamayohan nindo an pag-adal serosemana, gamiton an ano man na oras na kaipuhan tangani na matabangan an inaadalan na masabotan asin akoon an saiyang nanonodan sa Tataramon nin Dios. Sa nagkapirang kamugtakan, tibaad kaipuhan nin duwa o tolong semana tangani na makobrehan an sarong kapitulo sa librong Kaaraman. Tatawan kaini nin panahon na basahon asin linawon an dakol na sitadong teksto.—Roma 12:2.
4 Minsan siring, kumusta kun pakatapos kan librong Kaaraman, naririsa nindo na an pakasabot kan inaadalan sa katotoohan nangangaipo pang pataluboon o na sia dai pa lubos na namomotibar na manindogan para sa katotoohan asin idusay an saiyang buhay sa Dios? (1 Cor. 14:20) Ano pa an magigibo nindo tangani na magiyahan sia sa dalan pasiring sa buhay?—Mat. 7:14.
5 Panigoan an Espirituwal na mga Pangangaipo kan Inaadalan sa Biblia: Kun risang-risa na an saro nag-ooswag, dawa ngani maluway, asin na nagtatalubo an pag-apresyar nia sa saiyang nanonodan, kun siring ipadagos an pag-adal sa Biblia sa ikaduwang libro pakatapos kan brosyur na Kahagadan asin kan librong Kaaraman. Tibaad dai ini kaipuhan sa lambang kamugtakan, alagad kun iyan kaipuhan, ipadagos an pag-adal sa librong Tunay na Katoninongan, Nagkakasararo sa Pagsamba, o God’s Word. An kadaklan na parahayag igwa nin personal na kopya kan mga librong ini na magagamit kun mayo nin suplay an kongregasyon. Kun kaipuhan, an mga librong ini puedeng pedidohon sa sangang opisina. Sa gabos na kamugtakan, an pag-aadalan nguna brosyur na Kahagadan asin librong Kaaraman. An pag-adal sa Biblia, mga pagdalaw liwat, asin oras na ginamit sa pagpadagos kan pag-adal maninigong iiba sa bilang asin ireport, dawa kun an inaadalan mabautismohan bago matapos an ikaduwang libro.
6 Nangangahulogan daw ini na an mga bago pa sanang mabautismohan alagad nakapag-adal sa saro sanang libro maninigo ngonyan na mag-ako giraray nin tabang na adalan an ikaduwang libro? Dai man. Minsan siring, tibaad sinda nagin inaktibo o tibaad sinda dai nag-oswag sa katotoohan, asin tibaad sa pagmate ninda kaipuhan ninda an personal na tabang tanganing orog na ikaaplikar an katotoohan sa saindang buhay. Maninigong konsultahon an paraataman sa paglilingkod bago pamayohan giraray an pag-adal sa sarong bautisadong parahayag. Minsan siring, kun may midbid kamong nagkapira na nag-adal kan librong Kaaraman kan nakaagi alagad nungkang nag-oswag sa pagdusay asin bautismo, tibaad boot nindong boluntad na aramon kun gusto nindang ipagpadagos an saindang pag-adal sa Biblia.
7 Tanda nin Kristianong pagkamoot an pagtao nin dayupot, personal na atension sa balang interesado na inaadalan niato. An obheto niato iyo na tabangan an inaadalan na makamtan an orog na pakarorop sa katotoohan kan Tataramon nin Dios. Kun siring puede na siang gumibo nin depinido, basado sa kaaraman na paninindogan para sa katotoohan asin idusay an saiyang buhay ki Jehova, na sinisimbolisaran an pagdusay na iyan paagi sa bautismo sa tubig.—Sal. 40:8; Efe. 3:17-19.
8 Nagigirumdoman daw nindo an nangyari pakapabautismo kan kapon na Etiope? “Sia nagdagos na naggagayagaya” bilang sarong bagong disipulo ni Jesu-Cristo. (Gibo 8:39, 40) Logod na kita asin an mga mapanggana niatong ginigiyahan sa dalan kan katotoohan makanompong nin dakulang kagayagayahan sa paglilingkod ki Jehova Dios—ngonyan asin sagkod lamang!